VISITA DE LEDICIA COSTAS

Un curso máis, a nosa biblioteca engalanouse para recibir a nosa madriña, a escritora Ledicia Costas. Foi unha xornada moi intensa!!!

Primeiro compartiu un ratiño do seu tempo co alumnado de 4º de Primaria, para falar do seu libro “O neno de lume”.

Contoulles moitas curiosidades e puideron preguntarlle todas aquelas dúbidas sobre a historia, personaxes,... Comentounos que este é o libro que máis lle gusta de todos os que leva escrito.

Posteriormente co alumnado de 3º de Primaria a conversa xirou en torno a unha cuadrilla de nenos e nenas de ultratumba, "Os Minimortos". Unha sesión moi amena na que lle entregaron propostas e suxerencias con ideas para unha nova aventura desta serie.

Rematou asinando nos exemplares do alumnado e no libro de visitas. Grazas Ledicia!!!

O PLANETA QUE QUEREMOS

Recollemos nesta presentación as maquetas, murais e debuxos sobre “O Planeta que queremos”, que se realizaron polo Día da Nai Terra, traballando o Obxectivo ODS Nº13: Acción polo clima.

O Planeta que queremos de Biblioteca Seis do Nadal

LECTURA E FAMILIAS: LECTURA, ROBOTS E PROGRAMACIÓN

O pasado luns día 8 desenvolveuse unha nova actividade do programa “Lectura e Familias” a cargo de profesorado do Equipo de biblioteca, un Obradoiro de Lectura, robots e programación.

Nesta xornada as familias puideron desfrutar dun tempo de lecer coas súas crianzas compartindo historias como a de Carliños e as súas gafas de ver, os labirintos de Alicia, as peripecias de Amelia por conseguir ter unha mascota, a maxia das formas ou as aventuras da Axente Riciños. 

A súa vez estas lecturas estiveron acompañadas de actividades relacionadas coa programación con Scratch e mBlock, deseño 3D, creación de arte futurista empregando o mBot, deseño de labirintos para resolver retos a través dos Ozobots e de Colby ou emular as rúas da Cidade Labirinto do poeta Pedro Mañas...

 

Moitas grazas ás familias que vos animastes a participar!

Fixémoslles entrega dun folleto explicativo sobre o pensamento computacional e tamén recolle as diferentes lecturas traballadas.

RETO ODS: MAIO

Neste mes, aproveitando que o 15 de maio celebramos o Día da Familia, centrarémonos na diversidade familiar e poremos o foco no respecto e a non discriminación.

Teñen protagonismo o Obxectivo ODS Nº10, que nos fala de garantir a igualdade de oportunidades e reducir a desigualdade de resultados, mesmo eliminando as leis, políticas e prácticas discriminatorias e promovendo as adecuadas a ese respecto, e tamén o Obxectivo ODS Nº 16, coa súa meta de garantir a adopción en todos os niveis de decisións inclusivas, participativas e representativas que respondan ás necesidades.

No reto deste mes imos formar un vecindario de familias diversas na entrada do cole. Collede unha caixa de zapatos, montade unha habitación cos integrantes dunha familia e traédea ao cole para poder facer a composición entre todas.

Non é preciso que sexa a vosa familia, podedes inspirarvos nos seguintes contos para elexir o modelo de familia que queredes representar:

Mi familia es de otro mundo

Familias

Por un puñado de botones

CINE NA BIBLIOTECA

O xoves 27 de abril, co gallo do mes dos libros, proxectamos na biblioteca o principio da serie “Don Quijote de La Mancha” co fin de conmemorar o aniversario da morte do escritor Miguel de Cervantes. O obxectivo era achegar dunha maneira lúdica a súa principal obra.

Nesta ocasión, o alumnado tivo que coller entrada para acceder ao cine, esgotáronse enseguida.

OBRADOIRO PARA FAMILIAS

Continuamos coas actividades do programa “Lectura e Familias”.

Este terceiro obradoiro titúlase “Lectura, robots e programación”. Será impartido por profesorado do equipo de biblioteca.

Unha xornada de achegamento á lectura a través do pensamento computacional, da robótica, da linguaxe de programación e da realidade aumentada con actividades autónomas para experimentar con estas ferramentas.

Día: luns 8 de maio.

Lugar: Biblioteca.

Horario: de 16,00h a 18,00h.

Está dirixido ao alumnado de PRIMARIA (1º, 2º, 3º, 4º, 5º, 6º).

AFORO LIMITADO: 20 Familias: 1 adult@ +1 alumn@.

Por rigurosa orde de inscrición no correo da biblioteca.

As familias interesadas deberán enviar un email ao correo bibliotecaseisdonadal@gmail.com indicando o voso nome e o curso do voso fillo/filla.

Animádevos!!!

MERCADIÑO SOLIDARIO DE LIBROS

Entre as actividades programadas para Abril, a biblioteca organiza a campaña, VI Mercadiño Solidario de Libros Usados, enmarcada no programa Biblioteca Escolar Solidaria.

Do 24 de abril ao 5 de maio, no vestíbulo do centro, con fondos procedentes do expurgo da biblioteca co obxectivo de darlle unha segunda oportunidade a esos libros e fomentar actitudes de responsabilidade e solidariedade cos máis necesitados.

O voluntariado da biblioteca é o encargado de organizar esta actividade na hora dos recreos.

Trocamos libros por alimentos: o alumnado pode levar un libro a cambio de traer alimentos non perecedeiros (fariña, azucre, pastas,...).

Todos os alimentos recadados serán doados ao Banco de Alimentos de Vigo.

Grazas pola vosa colaboración!!! 

VISITA DE SABELA FERNÁNDEZ

O venres 28 de abril, recibimos á escritora Sabela Fernández Trelles coa que se divertiu e disfrutou o alumnado de 1º de Primaria.

Con diferentes dinámicas, Sabela falounos dos dous contos que lemos:

“O ladrón de soños”, metemos nun pequeno cofre os nosos pesadelos para que non volveran máis.

Que queres ser de maior, pequena? Debuxamos o que nos gustaría ser e coñecemos moitas cousas dos dous libros. Grazas Sabela!!!

PLAN PROXECTA +. INVESTIGAMOS SOBRE OS REFUXIADOS

Nas últimas semanas o alumnado de 6ºEP estivo investigando por grupos sobre os REFUXIADOS co fin de dar resposta ás preguntas que se fixeron na choiva de ideas inicial.

Cada grupo investigou sobre unha pregunta que plasmou nun cartel e con posterioridade expuxo ante os seus compañeiros/as; así tras a exposición de todas elas compúxose o quebracabezas que formaba esta fase de investigación.

Agora atopámonos nunha fase máis creativa que pronto compartiremos con vós.

PERE TOBARUELA CO CLUB DE LECTURA

O mércores 26 de abril, seguindo coas celebracións do mes dos libros, o Club de Lectura formado polo alumnado de 6º recibiu a visita de Pere Tobaruela para conversar sobre o seu último libro: Formig4s. Misión Rosalía.

Para esta reunión o alumnado preparara un pequeno taboleiro de xogo do estilo da oca, onde a través dun robot foron charlando co autor facéndolle preguntas sobre a creación do libro e tamén sobre o propio libro que responderon os/as rapaces/as. 

Esta dinámica fixo que resultase unha xuntanza un pouco diferente pero moi entretida na que o club descubriu que unha nova misión dos Formig4s xa está en marcha. Grazas Pere por compartir con nós o teu tempo!!!