MOCHILAS VIAXEIRAS

Unha nova aventura da Mochila Viaxeira está a piques de comezar! As historias xa están preparadas para percorrer as rúas do noso barrio, chegar ás vosas casas e encher de maxia, ilusión e momentos compartidos cada fogar. Son 19 mochilas que inician a súa viaxe!!!

Coia será o escenario desta fermosa viaxe, e cada familia, a protagonista dunha aventura na que os libros nos axudarán a soñar, descubrir e gozar xuntos. Porque un barrio tamén medra a través das historias que compartimos!

Dentro de cada mochila atoparedes

-Unha carta explicando o seu funcionamento e un listado do material.

-O Caderno Viaxeiro, o noso diario de aventuras. Queremos que o enchades de palabras, debuxos, cores, opinións e suxestións.

-Coia a través de Broli: Escolle o teu recuncho favorito de Coia e sácalle unha foto usando a Broli como marco.

Para que esta viaxe por Coia sexa todo un éxito, precisamos da colaboración de todas as familias.

Lembrade, a puntualidade é fundamental para que a mochila poida continuar a súa viaxe. Tratemos os libros e todos os materiais con agarimo, coma auténticos tesouros.

Busquemos un anaquiño de tempo para ler xuntos, mirar as ilustracións, contar historias e deixar voar a imaxinación.

BUSCAMOS COLABORADOR@S

A biblioteca é un espazo para imaxinar, aprender cousas novas e compartir historias, ideas e momentos.

Entre andeis, páxinas e palabras, cada xesto conta: unha man pode axudar a ordenar, unha ollada pode atopar unha lectura especial e unha voz pode contar unha historia que faga viaxar a quen escoita.

A biblioteca medra cando hai persoas que participan nela. Medra co coidado, coa ilusión, coa colaboración e coas ganas de facer deste espazo un lugar cheo de vida.

Se estás en 6º de Primaria e tes ganas de colaborar, aportar ideas e axudar na biblioteca, agardámoste no recreo do luns 21 de setembro no que explicaremos a súa organización e funcionamento.

BIBLIOTECA EN HORARIO DE TARDE

Co inicio das actividades extraescolares neste mes de setembro, retomamos tamén a apertura da biblioteca no horario de tarde co obxectivo de ofrecer un espazo de lectura, estudo e consulta.

Informamos dos horarios, normas e as actividades que se desenvolven. 

DESPEDIMOS AO VOLUNTARIADO DE 6º

Baixo a carpa do Seis, o curso chega a súa última función. As luces acéndense e os 18 colaboradores e colaboradoras de 6º de Primaria despídense tras un ano cheo de ilusión e compromiso na biblioteca.

Foron malabaristas dos libros, equilibristas dos andeis e axudantes de pista nos recreos. Prepararon contos, organizaron exposicións e levaron o seu espectáculo solidario ao Centro de Día Atendo, enchendo de sorrisos e aprendizaxes cada encontro. O seu traballo fixo brillar a biblioteca con máis cor e alegría.

Grazas, artistas do voluntariado, por facer deste curso unha función inesquecible. Que a vosa nova etapa siga chea de maxia, soños e solidariedade.

AS FAMILIAS CONTAN

Durante os meses de abril e maio, as familias do Seis participaron activamente na Hora de Ler, achegándose ás aulas e biblioteca para compartir contos co alumnado. Pais, nais, avós e avoas convertéronse en contadores e contadoras de historias, facendo desa hora unha aventura chea de emcoiósn, palabras e imaxinación compartida. 

Cada visita transformou a aula e a biblioteca nun pequeno escenario onde os libros cobraban vida. Houbo contos clásicos, relatos inventados, historias de risa e de soños. O alumnado escoitou, participou e descubriu que ler tamén é un acto de encontro e afecto.

Esta iniciativa, promovida pola biblioteca escolar, reforzou o vínculo entre escola e familia, e fixo da lectura un espazo común de aprendizaxe e pracer. A Hora de Ler converteuse así nun tempo máxico onde as voces das familias fixeron vibrar as páxinas dos libros. 

Queremos agradecer a todas as familias que nos acompañastes durante estes meses, compartindo connosco esas lecturas que tanto desfrutamos e que nos permitiron pasar momentos  moi agradables e cheos de complicidade. Grazas por participar nesta fermosa experiencia. Agardámosvos no vindeiro curso!

CINEMA NA BIBLIO

Durante o mes de maio, a nosa biblioteca encheuse de imaxes, risas e emocións coa celebración dun ciclo de cine en galego. Foi unha oportuidade para gozar do audiovisual na nosa lingua e redescubrir pequenas xoias que gardan os arquivos do Xabarín Club. 

Os nenos e nenas de Infantil e primeiros cursos de Primaria mergulláronse nas aventuras dun osiño entrañable: "As aventuras de Paddington". Nesta historia, o señor Gruber agasállalle a Paddington unha caixa de maxia para que aprenda os segredos dos grandes magos. Entre risas e ilusións, o público máis novo gozou dunha sesión chea de fantasía e amizade.

O alumnado de cursos superiores tivo a oportunidade de descubrir unha serie rodada en Galicia: "Os argonautas". A protagonista, Alba, chega á vila de Rodas  para pasar o verán coa tía Helena. O que semellaba un tempo aburrido e solitario convértese nunha aventura chea de misterio, amizade e descubrimentos. A rapazada quedou tan intrigada que prometeu seguir a historia para saber que acontecera ese verán insquecible.

ABRIL DE CINE E LIBROS

Durante o mes de abril, para celebrar o Día do Libro, o noso Cine da Biblio encheuse de aventuras, risas e moita imaxinación. Este ano, o protagonista foi o noso ilustre escritor Miguel de Cervantes e a súa obra máis coñecida: “El Quijote”.

Os nenos e nenas máis pequenos gozaron coa proxección dos “Lunnis de leyenda”, que lles amosaron quen foi Cervantes e quen era ese cabaleiro soñador chamado Don Quijote de La Mancha. Entre cancións e contos, descubriron que ler tamén é unha forma de viaxar e de soñar esperto.

Os maiores mergulláronse nun capítulo da serie “Don Quijote de La Mancha”, onde se narra a famosa aventura do barco encantado. A emoción foi en aumento ata o final, cando todos se preguntaron: onde estaba o barco encantado? A resposta, como ben aprendeu Don Quijote, estaba na imaxinación.

Estas sesións de cine deixáronnos unha gran ensinanza: a imaxinación é o mellor barco para viaxar por mares de historias. E, como Don Quijote, tamén nós podemos soñar con aventuras imposibles cada vez que abrimos un libro.

IX MERCADO SOLIDARIO DE LIBROS USADOS

A biblioteca organiza durante este mes de abril o IX Mercado Solidario de Libros usados, unha actividade que forma parte do programa Bibliotecas Escolares Solidarias.

O obxectivo principal deste mercado é dar unha segunda vida aos libros procedentes do expurgo da biblioteca, promovendo ao mesmo tempo valores de responsabilidade e solidariedade entre o alumnado. Trátase dunha excelente oportunidade para compartir, axudar e contribuír a un mundo máis xusto.

          -Datas: Do 21 de abril ao 8 de maio

       -Lugar: Vestíbulo do centro

O alumnado poderá levar un libro a cambio de achegar alimentos non perecedoiros (fariña, azucre, pastas, conservas...). Deste xeito, cada intercambio convértese nun xesto solidario.

A actividade está organizada polo voluntariado da biblioteca durante os recreos, de 11,30h a 12,00h.

Todos os alimentos recadados serán doados ao Banco de Alimentos de Vigo, contribuíndo así a apoiar ás persoas que máis o necesitan.

Grazas pola vosa colaboración nesta iniciativa solidaria!!

O VOLUNTARIADO NO CENTRO DE DÍA ATENDO

O 15 de abril o voluntariado da biblioteca realizou unha visita ao Centro de Día Atendo. Dende hai varios cursos, desenvolvemos un proxecto de colaboración con este centro co obxectivo de establecer lazos interxeracionais e acompañar ás persoas maiores, dentro do Programa Bibliotecas Escolares Solidarias.

A xornada comezou coa lectura do libro “Nuestro circo” da editorial Takatuka. A continuación, varias usuarias do centro sorprenderon ao alumnado con adiviñas, ás que os nenos e nenas responderon con entusiasmo e moita alegría.

Despois compartimos merenda e conversas, un momento cheo de risas, lembranzas e afecto. Máis tarde, houbo tempo para lecturas compartidas, nas que gozamos de contos con temáticas diversas, e tamén para xogos de mesa circenses, que fixeron as delicias de maiores e pequenos.

A actividade rematou coa entrega de agasallos e unhas palabras de agradecemento que puxeron o broche final a unha mañá chea de emocións, aprendizaxes e sentimentos. Porque cada visita é unha semente de afecto que medra entre libros, voces e miradas.

Grazas a todo o equipo do Centro de Día Atendo por acollernos con tanto cariño e por facer posible esta fermosa experiencia de encontro entre xeracións!!!

AS FAMILIAS CONTAN

Durante os meses de abril e maio, a biblioteca transformarase nun auténtico circo das palabras, un espazo cheo de emocións onde cada historia será unha función especial.

Queremos convidar ás familias a achegarse á escola para contar un conto e compartir un intre cheo de complicidade, ilusión e pracer pola lectura.

A actividade terá lugar na biblioteca, durante a Hora de Ler (de 12,00 a 12,20h).

Se eres membro da nosa comunidade educativa (pai, nai, avoa, avó...) e queres participar nesta aventura circense, só tes que enviarnos un correo a: bibliotecaseisdonadal@gmail.com indicando o teu nome, o nome do teu fillo/filla, o curso e a data proposta para a túa actuación.

"As familias contan" desenvolverase os meses de abril e maio, e cada sesión será unha nova función chea de contos, risas e emocións.

Animádevos a subir ao noso escenario lector e facer soar a maxia das palabras!!!

CINEMA: MULLERES ARTISTAS DO CIRCO

A actividade "Cinema na Biblio" do mes de marzo estivo dedicada ás mulleres artistas do circo. Exploramos a evolución do papel da muller no mundo circense, dende ser consideradas obxectos de admiración ata ser recoñecidas e admiradas polas súas habilidades excepcionais e a súa contribución artística. 

Proxectamos unha escolma do espectáculo "Amaluna", do prestixioso Circo do Sol (Cirque du Soleil), unha produción estreada en 2012 que rende un sentido homenaxe á forza e á feminidade das mulleres. Esta proxección foi pensada para un público de todas as idades, dende os máis pequenos ata os maiores. 

Dirixido por Diane Paulus, "Amaluna" narra unha cativadora historia de amor e equilibrio que se desenvolve nunha misteriosa illa gobernada por deusas. Un elemento distintivo é que o elenco está composto nun 70% por mulleres, subliñando o talento feminino no mundo do circo.

A trama de Amaluna inspírase libremente en "A tempestade" de Skhakespeare e nos mitos da Grecia Antiga, creando unha atmósfera máxica e evocadora. A música, interpretada por unha banda sonora composta exclusivamente por mulleres, engade unha capa adicional de beleza e poder á experiencia circense.

O VOLUNTARIADO CONTA

O voluntariado preparou dúas lecturas para contar ao alumnado de Infantil e 1º de Primaria na semana do 8M.

Mateo e Leo transportaron ao alumnado a un mundo de aventuras co conto popular "Once damas atrevidas". A través dunha viaxe imaxinaria por diferentes países, os nenos e nenas descubriron fitos culturais e paisaxísticos, participando activamente na narración e explorando a riqueza do noso planeta. Aprenderon sobre a importancia de perseguir os seus soños e non renderse ante as dificultades. 

Antía e Eva emocionaron aos nenos e nenas coa historia de "Salvaje", unha nena que vive en harmonía coa natureza. Esta inspiradora narración transmitiu valores como a liberdade, a valentía e a importancia de aprender do mundo que nos rodea. Unha oda á conexión coa natureza e ao poder da individualidade.

A través de contos buscamos inspirar ao noso alumnado a construír un futuro máis xusto e igualitario, onde todas as persoas teñan as mesmas oportunidades para crecer e desenvolverse plenamente.

Grazas ao voluntariado polo seu traballo e por compartir a súa paixón pola lectura!!!

ACTUALIZAMOS OS XOGOS NAS MOCHILAS

Informámosvos de que renovamos os xogos dispoñibles nas nosas 7 Mochilas de Xogos este mes de febreiro. Cada mochila contén dous xogos diferentes, deseñados para ofrecer diversión e aprendizaxe en familia.

Se estades interesados en solicitar unha mochila en préstamo, tedes que enviar un correo electrónico a bibliotecaseisdonadal@gmail.com indicando o nome e o curso do/da fillo/filla.

As mochilas préstanse por unha semana. Asignaranse por orde de solicitude e entregaranse ao voso fillo/filla. Rexistraranse co número de carné da biblioteca do alumnado.

Dentro de cada mochila atoparedes as normas de uso correspondente a cada xogo e un QR.

Para ver os xogos incluidos en cada mochila con máis detalle, consultade a seguinte presentación.

Mochilas de xogos de Biblioteca Seis do Nadal

VOLUNTARIADO: CONTO POLA PAZ

Na nosa biblioteca, a colaboración do voluntariado é fundamental. Grazas ao seu compromiso, preparan e comparten lecturas adaptadas ás diferentes idades, achegando os libros ao alumnado máis pequeno dun xeito próximo, afectivo e motivador.

Para celebrar a Semana da Paz, o voluntariado preparou unha lectura moi especial para o alumnado de 1º de Educación Primaria: "Wangari y los árboles de la Paz", escrito por Jeanette Winter e publicado por Ed. Ekaré. 

Este fermoso conto narra a vida de Wangari Maathai, unha muller africana de kenia que gañou o premio Nobel da Paz en 2004. A través dunha linguaxe sinxela e ilustracións evocadoras, o libro conta a súa inspiradora loita a través do Movemento Verde, demostrando como unha soa persoa pode motivar a miles a tomar acción en defensa do medio ambiente e da paz. 

O voluntariado, coa súa dedicación e entusiasmo, logrou transmitir a esencia da historia de Wangari, inspirando aos nenos e nenas a reflexionar sobre a importancia da paz, o respecto, a solidariedade e o coidado polo medio ambiente.

MOCHILAS TEMÁTICAS

A biblioteca pon en marcha de novo a iniciativa “Mochilas Temáticas”, unha proposta que xa tivo moito éxito hai dous cursos. Trátase de 12 mochilas con libros e materiais sobre temas concretos, pensadas para achegar diferentes lecturas aos fogares e compartir momentos de aprendizaxe e lecer en familia.

As familias podedes escoller entre as seguintes mochilas:

-Estimulación da linguaxe oral para Edº Infantil: para os máis pequen@s, con contos para fomentar a comunicación.

-Cociña: receitas divertidas e libros sobre alimentación saudable para desfrutar cociñando en familia.

-Creativa: ideas para dar renda solta á imaxinación e crear obras de arte.

-Científica: experimentos e libros sobre ciencia para descubrir o mundo que nos rodea.

-Mitoloxía: para descubrir lendas e seres fantásticos.

-Coidado do Planeta: libros para aprender a respectar o medio ambiente e como protexelo.

Cada mochila préstase por unha semana.

Para solicitala, debes enviar un correo electrónico a bibliotecaseisdonadal@gmail.com, indicando: nome da mochila, curso e nome do fillo/filla.

As mochilas asignaranse por orde de solicitude e entregaránse ao voso/a fillo/filla. Rexistrarase con nº de carné da biblioteca do alumnado.

Animámosvos a participar nesta iniciativa e desfrutar en familia!