ENCONTRO INTERXENERACIONAL

O xoves 28 de abril, usuarios e usuarias do Centro de Día Atendo, achegaronse a nosa biblioteca para ler un conto ao alumnado de educación infantil de cinco anos: ¿Quién es Parky? (Explicar a enfermidade do parkinson a un neno/nena).

Despois saimos ao patio e xogamos ao xogo da rá. Canto disfrutamos  e que ben o pasamos!!!

Posteriormente, o voluntariado da biblioteca contoulles o conto: “A escaleira”(Ed. OQO) que fixo a ledicia dos alí presentes.Tamén lles fixemos entrega dun lote de libros para a súa biblioteca e marcapáxinas como agasallo polo mes dos libros.

Foi unha experiencia moi enriquecedora establecendo un vínculo emocional entre ambas xeracións e punto de partida para moitos máis encontros.

Moitas grazas pola visita!!!

Esta actividade enmárcase dentro da Semana da Solidariedade Interxeneracional.

VISITA DE PERE TOBARUELA

Co gallo do mes dos libros, continuamos recibindo a visita de diferentes autores. Nesta ocasión, foi a quenda de PERE TOBARUELA, autor da colección FORMIG4S.

Pere viu visitar ao alumnado de 5ºEP que tras ler o seu libro FORMIG4S: Misión Camiño de Santiago, estaba desexoso de facerlle mil e unha preguntas sobre o libro e a súa traxectoria profesional en xeral.

A actividade comezou cunha breve presentación do alumnado e, de seguida, Pere colleu o temón para embarcarnos no seu mundo de creatividade, imaxinación, historias e humor, explicándonos como se pode crear unha historia que sexa boa, sendo sempre o obxectivo espertar o interese dos lectores/lectoras e atrapalos para que queiran seguir lendo o escrito.

Enseguida chegou o momento tan esperado polo alumnado, o momento de preguntar todo aquilo que querían coñecer sobre as FORMIG4S. E así foi como descubriron que si vai haber unha nova entrega desta colección pero que haberá que esperar un pouquiño. 

Que o elixir as formigas como personaxes principais das historia se debe a que son uns animais que lle gustan moito e que ademais lle parecía gracioso empregar a insectos como personaxes para as súas historias. E outras cousas máis que, os rapaces e rapazas de 5º, van gardar na memoria como privilexio de participar nesta actividade.

Finalmente tocou despedirse, pero non sen antes, cunha bonito agasallo por parte de Pere, a súa sinatura nos libros dos nenos e nenas que, de seguro, han atesourar na súa biblioteca persoal.

Moitas grazas Pere!!!

CHARLA DISCAMINO

O luns 25 de abril, recibimos a visita dalgúns membros de DisCamino, unha asociación que axuda as persoas con discapacidade a cumprir os seus soños, sexan estes dar un paseo en bici, participar nunha carreira, nun campionato ou realizar o Camiño de Santiago. 

Durante esta interesante charla, coordinada por Javier Pitillas, o alumnado de 5º puido coñecer a persoas que se esforzan a diario para conseguir as súas metas. Por exemplo, Gerardo explicounos que fixo o Camiño de Santiago dende Roncesvalles ata Santiago e que o que recorda del é o seu olor e as figuras, que para el, son todas aquelas cousas que pode percibir coas mans, xa que Gerardo é unha persoa xordo-cega que ve a través das súas mans.

Por outra banda, David contounos como se namorou do Camiño, unha experiencia que lle cambiou a vida, xa que nel coñeceu a súa parella.

Ana tamén nos contou que fixo o Camiño pero ademais mostrounos como a súa discapacidade non lle impide realizar slalom; é máis, Ana gañou 13 campionatos de España de slalom en cadeira de rodas.

Fani tamén fixo o Camiño dende Roncesvalles e a través de imaxes ensinounos o significativo que para ela foi realizalo.

Finalmente Javi púxolle un toque de humor a xornada xa que nos amosou como durante o Camiño e a vida en xeral, desborda optimismo e positividade, animando aos seus compañeiros e facendo algunha broma.

Grazas por acompañarnos e compartir con nós unha experiencia tan bonita e inspiradora.

Bo Camiño bicigrinos!!!

DÍA MUNDIAL DO LIBRO 2022

Achégase o Día Mundial do Libro e do Dereito de Autor, en acepción da UNESCO, e desde a Consellería de Cultura, Educación e Universidade  edítase o cartel para conmemorar este día 23 de abril de 2022.

Acudiuse, como en anos anteriores a unha persoa referente da literatura galega actual, neste caso o escritor, editor e tradutor, Xosé Ballesteros, quen creou un texto orixinal cedido xenerosamente para esta pequena peza de difusión do Día do Libro, centrándose  na parte menos visible do libro, esa marabillosa viaxe colectiva que inician autores/as e ilustradores/as, con parada en editoriais, imprentas, librarías, para atopar, finalmente,  porto seguro nas nosas bibliotecas escolares. 

  "Velaí o libro: unha faísca da memoria do mundo"

Neste mes, e todo o ano, non esquezamos que os libros chegan as nosas mans grazas a unha cadea de traballo colectivo que non debemos romper. Habitemos este espazo que creamos xuntos/as.

“Hai lugares tranquilos no medio do ruído. Son illas, son oasis, son espazos entornados, silenciosos, en que podemos camiñar entre o pasado e o futuro. Espazos que acubillan os artefactos perfectos que nos conectan coa eternidade.

Desde os andeis das bibliotecas os lombos chaman a nosa atención. Chegaron os libros, de preto ou de moi lonxe, nunha viaxe que comezou cunha palabra ou unha imaxe. Despois xurdiron moitas máis, fervenza creativa.

Con esa materia prima necesaria, o editor deulle forma: alquimia.

Convocou forzas humanas e tecnolóxicas e actuou: corrección, maquetaxe, deseño; elección do papel, do tipo, do formato. E a maquinaria gráfica dispuxo os ferros, as probas de cor, os roletes de caucho e as catro tintas, para fusionar imaxes e palabras sobre a pasta vexetal.

Velaí o libro: unha faísca da memoria do mundo.”

DÍPTICO COMPLETO

FONTE: BIBLIOTECAS ESCOLARES

VISITA DE LEDICIA COSTAS

Hoxe 21 de abril, recibimos a visita da escritora Ledicia Costas, autora dos libros “Vampira de Biblioteca” e “A Señorita Bubble”, que leu o alumnado de 4º de Ed. Primaria.

Comenzamos cunha pequena presentación por parte do alumnado para despois ir respostando ás moitas preguntas que lle fixeron, curiosidades, como creou as historias, en que se inspirou, as personaxes, …

Contounos moitas cousas, que era unha gran lectora dende pequena, que lle encanta o inframundo, o mundo dos pantasmas, ….. tamén nos adiantou que xa ten escrito o terceiro libro da Señorita Bubble e que, en breve, poderemos desfrutar coa súa lectura.

Foi unha conversa moi entretida e amena!!!

Ao rematar, asinou nos exemplares do alumnado e no Libro de visitas do centro.

Grazas Ledicia!!!

ENCONTRO CON AUTORES/AUTORAS

Nas vindeiras semanas recibiremos a visita de varios autores e autora que compartirán momentos co alumnado para falarnos dos seus libros.

Poderemos facerlles as preguntas, dúbidas ou curiosidades que nos xurdiron coa lectura das súas obras.

Visitarán a nosa biblioteca:

O VOLUNTARIADO TEN A PALABRA

Para conmemorar o Día da Narración Oral e da Poesía, propuxemos ao voluntariado da biblioteca unha actividade con contos rimados/en verso a realizar, na Hora de Ler, do 30 de marzo ao 8 de abril para todo o centro.

O equipo de biblioteca fixo a selección de lecturas: O pirata Pata de Lata, Ovelliña, dáme la, A Cebra Camila, Marcelina en la cocina, Bo camiño, Valentiño!, Rata linda de Compostela, Dez gatiñas viaxeiras e Once damas atrevidas.

Despois reunímonos con todo o voluntariado, divididos en grupos (respetando o protocolo) escolleron o que ían contar, para empezar a organizarse e ensaiar.

Na súa posta en escea empregaron marionetas, disfraces, materiais diversos,….

Ao remate de cada contada entregáronlles ao alumnado un agasallo , para degustar, cunha frase vinculado a cada unha das lecturas (moedas de chocolate, corazóns de gominola,….).

Fixérono xenial!!! Grazas polo voso traballo!!!

ÁRBORES NO CAMIÑO

Pequena escolma cos traballos da investigación documental feita polo alumnado sobre as árbores e plantas que podemos atopar nos distintos camiños que estamos traballando nas aulas: carballo, castiñeiro, oliveira….

Obxectivo da Axenda 2030

RETO ABRIL

Os protagonistas do reto deste mes de Abril son os libros. Se unha nova etapa do camiño queres superar terás que crear historias coas portadas dos libros, ou máis ben cos seus lombos.

Busca na biblioteca do centro ou nos libros que tes na túa casa e apila ou agrupa os libros de modo que cos seus títulos poidas formar unha breve historia. 

Fai unha foto a túa creación e envíanola ao noso correo bibliotecaseisdonadal@gmail.com

Agardamos as vosas respostas!!!! Bo Camiño!!!! 

VISITA DE TERESA GONZÁLEZ COSTA

Co inicio de Abril, mes dos libros, damos comezo aos encontros cos autores/autoras.

O venres 1 de abril, recibimos a visita da escritora Teresa González Costa, autora de "Unha abella máxica no camiño", título que forma parte do itinerario lector de terceiro de primaria.

Dúas alumnas foron as encargadas  da súa presentación facendo un breve percorrido pola súa vida e obra.

A continuación Teresa, faloulles da nova aventura de Leopolda Diéguez, chea de maxia, fantasía e amizade.

As lectoras e lectores poideron desfrutar das súas historias,  atopar resposta ás diversas preguntas e amosarlle os debuxos feitos sobre o libro.

Foi un faladoiro moi ameno e rematou asinando nos exemplares das nenas e nenos e no Libro de visitas.

Moitas grazas Teresa!!!

Na biblioteca podemos atopar máis libros escritos por ela: Fred Quincalla, o nómade do mar, A filla do ladrón de bicicletas, A nena, o monstro e o mar e a A noite das bicicletas.