BIBLIOLAB: SAMAÍN

Durante o mes de outubro, a BiblioLab centrou as súa programación na celebración do SAMAÍN. As actividades espertaron no alumnado a imaxinación, a creatividade e aprender de forma divertida.

 CABAZA DE SAMAÍN

Usando tiras de papel de cor laranxa, cada neno e nena deu forma á súa propia cabaza, decorándoa ao seu gusto.

SPEED CUPS SAMAÍN e FANTASMA BLITZ

A diversión continuou cos xogos de mesa temáticos. O Speed Cups de samaín puxo a proba a súa rapidez e coordinación, mentres que o Fantasma Blitz, esixiu concentración e memoria para atrapar aos personaxes. Risas e emocións non faltaron!!!

HISTORIAS DE MEDO

Usando dados con imaxes e unha plantilla para guiar a narración, inventaron contos cheos de personaxes e situacións asustadizas. Cada historia foi única e orixinal!!!

ROBÓTICA

Programaron os robots para seguir o camiño correcto, demostrando as súas habilidades de pensamento lóxico e resolución de problemas.

CREA O TEU MONSTRO

Creamos os nosos monstros únicos coa axuda de “Monster kit”. Combinando diferentes pezas, cada neno/nena deseñou a súa propia criatura, dándolle un nome e un debuxo.

A NOITE DO MEIGALLO

Un xogo no que tiñan que resolver adiviñas e recoller ingredientes para preparar un meigallo. Traballando en equipo, demostraron o seu coñecemento e a súa habilidade para resolver problemas. 

CANTO SABES DOS MONSTROS?

Usando un libro de información, contestaron preguntas sobre diferentes criaturas.

EXPERIMENTO: A PANTASMA

Con este divertido experimento fixemos aparecer unha pantasma. Para elo seguimos as instrucións e empregamos os materiais necesarios para realizalo. Deixou a todos e todas abraiados!!!

EXPOSICIÓN DE CABAZAS CIRCENSES

Este ano, a nosa exposición de cabazas de Samaín transformouse nun incrible circo, grazas á imaxinación e creatividade das nosas familias! As cabazas cobraron vida, converténdose en personaxes e elementos circenses que nos transportaron a un mundo de maxia e diversión.

Carpas feitas de cabazas, pallasos sorrintes e algo sinistros, magos misteriosos, homes bala acrobáticos, forzudos impresionantes, trapecistas audaces… encheron o noso espazo de Samaín cun ambiente festivo e emocionante. Cada cabaza era unha obra de arte única, creada co agarimo e a colaboración das familias.

Esperamos que todos disfrutaran da exposición tanto como nós! Ata o ano que vén, e que a maxia do Samaín siga inspirándovos!

LER ÁS ESCURAS

O xoves 30 de outubro desfrutamos dunha experiencia de lectura emocionante: Ler ás escuras!!!

Imaxinade: unha carpa escura, onde a única luz provén de pequenas lanternas, como estrelas errantes na noite. Cada un de nós, transformados en artistas de circo, coa nosa propia lanterna e libro, listos para executar o acto máis emocionante de todos: a lectura!

As lanternas non só iluminaban as páxinas, senón tamén a imaxinación de cada un, creando un espectáculo de luces e sombras. Rimos, asustámonos e emocionámonos todo grazas a esta experiencia única!!!

A RADIO DO SEIS: "SAMAÍN"

A carpa radiofónica do Seis abre as súas portas (mellor dito, os seus micrófonos)! Prepárense para un espectáculo terroríficamente divertido!

A clase de 4ºB presenta o primeiro programa do curso, e vén cargado de misterio e tradición! Descubriremos xuntos as orixes do Samaín, esa noite máxica onde os mundos se tocan e as ánimas vagan entre nós.

Prepararon dúas historias orixinais cheas de imaxinación e suspense: "A cabaza viaxeira" e "O misterio do corredor escuro".

Agardamos que o desfrutedes! 

CINE DE SAMAÍN

Este Outubro, a biblioteca converteuse nun espazo de encontro e diversión, onde o cine e a lectura se fusionaron para crear experiencias motivadoras.

O venres 24, o alumnado de 2º a 6º de Primaria disfrutou dunha emocionante sesión de cine chea de medo e risas coa película "Scooby-Doo". A biblioteca tinguiuse de misterio e tod@s axudaron a resolver o caso!

O luns 27, a biblioteca acolleu unha sesión especial de Samaín protagonizada polos "Bolechas", dirixida aos máis pequenos e pequenas de Edº Infantil e 1º de Primaria. O ambiente encheuse de medo divertido!.

Cada alumno/alumna recibiu unha entrada especial para as sesións de cine. Pero as entradas escondían un segredo! Incluían un código QR que permitía ver as curtas na casa, prolongando a diversión máis aló da biblioteca. A maxia do cine continuaba en cada fogar!

As sesións de Cine na Biblio de outubro foron un éxito! Unha oportunidade para celebrar o mes das bibliotecas, fomentar a lectura, o visionado de contido audiovisual, e crear momentos de diversión e convivencia.

EXPOSICIÓN TEMÁTICA DE SAMAÍN

O Equipo de Biblioteca, coa chegada do Samaín, preparou unha selección de fondos bibliográficos que che farán tremer de emoción. Pantasmas, bruxas, cabazas encantadas e outras criaturas da noite agardan por ti entre os nosos andeis.

Sumérxete nunha atmosfera de misterio e descubre a nosa exposición temática de Samaín. Libros e contos de medo... todo o que necesitas para vivir un Samaín inesquecible!!!

Ademais, incorporamos novidades ao noso catálogo. Non perdas a oportunidade de ser o primeiro/a en desvelar os segredos que agochan estes novos libros. 

A Biblioteca énchese de maxia e misterio para celebrar o Samaín. Non faltes á nosa exposición e atrévete a descubrir as historias máis arrepiantes.

A nosa Guía de recomendacións para estas datas:

Guía de Lecturas Samaín 2025 de Biblioteca Seis do Nadal

LECTURAS ÁS ESCURAS

Prepara o teu espírito aventureiro, porque o 30 de outubro, imos celebrar a Hora de Ler ás escuras!!!

Imaxina un espazo envolto na penumbra, onde cada libro se transforma nun tesouro escondido. Cada personaxe, nun misterio por resolver. As palabras, como constelacións, brillarán con forza entre as páxinas.

Para esta viaxe máxica, non esquezas a túa lanterna. Será a túa guía, o faro que ilumine os camiños da imaxinación. Co seu feixe de luz, desvelarás segredos, vivirás aventuras e sentirás a emoción de cada historia coma se fose túa.

Unha experiencia de lectura única e emocionante! Pasarémolo de medooo…lendooo!!!!

SEMANA DE SAMAÍN

Durante a semana do 27 ao 30 de outubro celebraremos o SAMAÍN cunha programación chea de actividades pensadas para desfrutar, aprender e compartir tradicións.

Ao longo destes días haberá lecturas de contos de medo,  exposicións de cabazas decoradas, sesións de contacontos, proxeccións de cine... 

MOCHILAS VIAXEIRAS

Un curso máis, as Mochilas Viaxeiras iniciaron a súa viaxe. 20 mochilas, coma acróbatas expertas, voarán de fogar en fogar, levando consigo un universo de posibilidades. Preparádevos para ser os/as protagonistas dun espectáculo único, onde a maxia dos libros cobra vida nas vosas casas.

Dentro de cada mochila atoparedes:

-Unha carta explicando o seu funcionamento e un listado do material.

-O Caderno Viaxeiro, o noso particular diario de abordo. Invitámosvos a encherme de cores, palabras, impresións, suxestións e debuxos. Contádenos que vos pareceu o contido da mochila, que vos inspirou, que vos fixo sorrir.

-Un truco de maxia para sorprender e divertirse en familia.

Como mestr@s de cerimonia desta marabillosa función, a vosa participación é esencial para o éxito da Mochila Viaxeira. 

Lembrade, a puntualidade é fundamental para que a función continúe sen interrupcións. Tratar a mochila e o seu contido con agarimo, coma se fosen obxectos máxicos. E, sobre todo, desfrutar de cada instante, de cada palabra, de cada sorriso compartido. A maxia reside na conexión familiar e no amor pola lectura.

Grazas por formar parte desta aventura. Xunt@s, faremos da Mochila Viaxeira un espectáculo inesquecible!  

DÍA DAS BIBLIOTECAS 2025

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administración autonómicas.

A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2025. 

O lema deste ano, “Contra a desinformación: bibliotecas”, pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.

As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas. 

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio, lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que pon en contacto con ese outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.

FONTE: BIBLIOTECAS ESCOLARES