DÍA DA PAZ 2019

Ao longo destas semanas estivemos traballando o tema :

-Realizamos investigacións na biblioteca sobre persoas que loitaron  pola Paz non mundo ( Gandhi, Nelson Mandela, Malala,....)

-Tamén fixemos taboeiros para traballar cos escornabots a partir de investigacións e un xogo con pictogramas.

-Selección de Lecturas.

-Palabras Máxicas para a Paz.

Cada nivel elexiu unha palabra máxica para a Paz empregando diversos materiais e técnicas, seguindo o proxecto anual que estamos a desenvolver, e que foron expostas no vestíbulo do centro amosando a súa creatividade e imaxinación:  aperta, amizade, agarimo, supercalifragilístico, alegría, compartir, harmonia, serendipia e esperanza.

-Mural "Abracadabra que a Paz se faga" con pombas nas que escribiron diferentes palabras para conseguir a paz no mundo.

-Na hora do recreo, os integrantes do Club de Lectura prepararon o Programa de Radio sobre o Día da Paz na que nos falaron da maxia da esperanza, dos soños, do diálogo,....

E hoxe, 30 de xaneiro, para conmemorar o Día da Paz celebramos un acto colectivo co lema: "Coas palabras máxicas faremos a PAZ".

Todos e todas vestidos de branco subimos ao pavillón e alí, sentados en forma de u, coas letras que forman as palabras que cada curso elexiu , metémolas no sombreiro máxico e fixemos o noso "Feitizo da Paz".

Despois danzamos  ao son da canción "Baile da Paz" que, ademais de cantar, acompañamos dunha coreografía que aprendemos na clase de música. Para ver o vídeo preme na seguinte ligazón

VIDEO BAILE DA PAZ

CANCIÓN PARA O DÍA DA PAZ

O Día da Paz imos cantar o poema " Baile da Paz" de Carmen Gil musicado por Mamá Cabra do Libro-Cd "A bruxa Discordia".

Premendo na seguinte imaxe accederedes á musica e á letra en pictogramas para ir practicando.

LECTURAS PARA A PAZ

Desde 1964, para conmemorar a morte de Gandhi, o 30 de xaneiro celébrase o Día Escolar da Non Violencia e a Paz, recoñecido pola Unesco en 1993.

Lémbrase a necesidade da educación para a tolerancia, a solidaridade, o respeto aos Dereitos Humanos, a non violencia e a paz.

Estas son algunhas das lecturas seleccionadas que nos falan de convivencia, solidariedade, compartir, respetar,.... que están en exposición na biblioteca e no vestíbulo do centro.

POR QUE?Ed. Kalandraka

Fronte á barbarie da guerra, un libro visual que alenta os lectores a seren promotores do diálogo, da tolerancia, da convivencia e da paz.

IMAGINE. Ed. Flamboyant

É un álbum infantil sobre os valores da paz e a tolerancia. Coa letra da inmortal canción de John Lennon e prólogo de Yoko Ono en colaboración con Amnistía Internacional.

A BRUXA DISCORDIA.Ed.Galaxia.
Libro-Cd.Cancións para a Paz

Discordia é unha bruxa que é feliz destruíndo a Paz, facendo que todos os animais, e os humanos, se leven mal. E come olivas como unha tola...  Con todo un día vai acontecer algo que cambiará o seu mundo, e o mundo enteiro, para sempre...

O LAPIS MÁXICO DE MALALA.Ed.Xerais

Malala, como o personaxe dunha serie da televisión, desexaba ter un lapis máxico. Con el faría feliz a súa familia, borraría o cheiro a lixo da cidade, detería o tempo para durmir unha hora máis pola mañá... Pero nun momento dado caeu na conta de que había cousas máis importantes que arelar. Non lle gustaba o mundo que vía e quería mudalo. E aínda que nunca atopou un lapis máxico, decatouse de que podía traballar arreo para facer realidade os seus desexos.Este volume, fermosamente ilustrado, narra a historia de Malala para o lectorado máis novo e amosa como se pode abrazar a esperanza, mesmo nos momentos máis difíciles.

O PRINCIPIO. Ed. Kalandraka

Malia os efectos crueis e devastadores dunha guerra, este relato poético contado dende a infancia e que nos transporta con todo detallismo ata onde estouran as bombas, é unha mensaxe de esperanza.

CALENDARIO 2019 DO LIBRO E DA LECTURA

Calendario do Libro e da Lectura 2019, coas datas, efemérides e conmemoracións máis salientables en torno aos libros e a lectura. 

ACTIVIDADES EN NADAL

En Decembro desenvolvemos varias actividades:

-Visita do Apalpador

O venres 21 de decembro cando chegamos as nosas clases atopámonos cunha sorpresa, en cada das nosas mesas había unha castaña. Quen a deixara alí? A resposta as nosas preguntas non tardou en chegar. Ao longo da mañá recibimos a visita do Apalpador.

En Educación infantil contáronlle o que estivemos aprendendo sobre este personaxe que nos visita cada ano por estas datas.

Poesías, debuxos, libriños, .... foron alguns das actividades traballadas para achegarnos a este figura do noso nadal.

-Contos en Familia

Jimena, nai de Nicolás e Leandro, de infantil de catro anos contounos un conto de nadal : " O Apalpador". Grazas!!!

-En Nadal adopta un libro

Un curso máis, na última semana de decembro, montamos esta campaña co obxecto de darlle unha segunda oportunidade a eses libros que, por diversos motivos (antigüidade, falta de espazo, fondos actualizados,...), temos que retirar da nosa biblioteca.

 

Aqueles nenos e nenas que lles interesou, achegáronse ao vestíbulo do cole, onde estaban expostos os libros, organizados por idades, para que poideran adoptalos e colleron o que máis lles gustou para levalo para casa.

GUÍA DE LECTURAS DE NADAL

Coma todos os anos por estas datas achegamos a nosa Guía de Lecturas.

Contos, poesía, música, receitas, libros para coñecer as nosas tradicións e a nosa cultura,… para compartir momentos máxicos en familia.

Podedes facer as vosas peticións ao Apalpador, a Papa Noel ou aos Reis Magos.

Serán as lecturas que traballaremos á volta de Nadal e  contaremos coa presenza dos autores e autoras que nos visitarán para falar dos seus libros.

Este Nadal, agasalla maxia, agasalla libros!!!

Bo Nadal e Felices Lecturas!!!

RECANTO MAKER

Unha das novidades na biblioteca este ano é o Recanto Maker.

Un espazo para a creatividade e a imaxinación. Orientado para aprender fedellando, fomentar o pensamento creativo,  compartir e asimilar coñecementos.

Normas do recanto:

Materiais que o conforman:

-Escornabots e tableros coas instruccións de cada un dos xogos en pictogramas.

-Xadrez, dominós, tres en raia, parchís, damas,....

-Tangram.

-Dados para contar historias e contos.

-Xogos e kits diversos de pezas e montaxe.

-Libros e contos de robótica e programación.

Ao longo do curso iremos dotando de máis materiais o espazo.

E chegan os venres, na hora do recreo, a ocupación da biblioteca é total, todos e todas agardan para poder desfrutar desos xogos. Os voluntarios e voluntarias son os encargados de explicar e axudar aos máis pequenos neste tempo.

EXPOSICIÓN DE LIBROS SOBRE O NADAL

Exposición de contos sobre o nadal e a súa maxia.

Na biblioteca e noutros recantos temos preparada unha selección de lecturas para estas datas,libros que falan do Apalpador,Papa Noel,os Reis Magos,historias e contos de Nadal....

Achégate a biblioteca e desfruta desta exposición!!!

O APALPADOR

Nos últimos anos estase a recuperar a figura de O Apalpador, Apalpabarrigas ou Pandigueiro. É un personaxe que vivía nas altas montañas das serras orientais de Galicia e que nos días do inverno baixa ás aldeas e vilas dos vales para apalparlles a barriguiña ás meniñas e aos meniños por ver se comeran ben durante todo o ano, decíndolles "Así, así esteas todo o ano", achegándolles castañas e agasallos feitos a man.

Ilustración de Leandro Lamas

O Apalpador, de profesión carboeiro, mora nas devesas das montañas do Caurel e outras serras orientais de Galicia e caracterízase fisicamente por ser un xigante bonachón que viste boina e traxe esfarrapado e con remendos, fuma en pipa e aliméntase con baias salvaxes e os porcos bravos que caza no monte.

O Apalpador é moi lambereteiro e se as nenas e os nenos lle deixan un calcetín ou uns zapatos con algo doce para axudarlle a andar toda a noite visitando todas as casas de todos os nenos e nenas galegos, el entrégalles os  agasallos de madeira, tea e cartón que fixo coas súas mans no tempo de lecer do resto do ano. Ao Apalpador gústanlle máis os xoguetes feitos á man con materiais naturais como a madeira ou o barro, cheos de cariño e respectuosos co medio ambiente, que aqueles de plástico, automáticos e con pilas que gastan moita enerxía e empobrecen os nenos e nenas doutras partes do planeta.

O Apalpador recupera unha figura da nosa tradición relacionada co Pai Inverno e mesmo co propio Papá Noel, propia dos pobos preindoeuropeos e espallada por toda Europa, quizais relacionada cos ancestrais cultos á divinidades do Inverno, protectores das colleitas e do gando que, por influencia do cristianismo foi desaparecendo. Recuperar o Apalpador é un acto de reivindicación das nosas tradicións e dun consumo solidario e responsable.

Máis información e recursos nas seguintes ligazóns:

-Páxina web

-Páxina da Coordinadora Galega dos Equipos de Normalización

      http://coordinadoraendl.org/nadal/index.php?pax=pax5.php

Pasade pola biblioteca e  poderedes  ler os libros que temos sobre o Apalpador.

    Conto en pictogramas (preme na imaxe)

Cancións sobre o Apalpador

-Canción  de Malvela

-Canción "O Apalpador" incluída no libro  "TOC TOC", de Pablo Díaz.

-Canción "O Apalpador" incluída no libro "Estación Nadal", de Mamá Cabra

-Canción"O Apalpador" no libro  "Brinca Vai" de Paco Nogueiras

-Canción "O Apalpador" incluída no libro "Lucecús", de Pirilampo.

CONTOS NA LAREIRA

O mes de Novembro adicámolo á Tradición Oral. Nun recanto  recreamos a  cociña  dunha aldea  e  convidamos á Comunidade Educativa a que viñera contar contos populares e lendas de tradición oral.

Viñeron avoas, mamás , papá, madriña e mestras a contarnos esas historias fantásticas e máxicas (de mouras, de personaxes da nosa mitoloxía,....) que se trasmitiron ao longo das xeracións de boca en boca e que son reflexo da nosa identidade.

Pola súa participación recibiron un diploma. Grazas por compartir o voso tempo con nós !!!!

Na biblioteca tivemos unha exposición de : contos populares (A Nosa Terra), Contos marabillosos (Edicións do Cumio), a colección Cabalo Buligan (Ed.Xerais), ...

Tedes información sobre a nosa tradición nas seguintes ligazóns:

-Galicia Encantada

-Orella Pendella