BANDA DESEÑADA NOS CLUBS DE LECTURA

A última xuntanza, 4 e 5 de xuño, dos Clubs de Lectura deste curso centrouse en dúas obras de banda deseñada en galego: "Nerea. A invasión dos trastos" e "Idol!".

As lecturas proporcionaron unha oportunidade para explorar temas importantes e actuais que fomentaron as conversas entre o alumnado de 5º e 6º curso.

Nesta nova aventura de Nerea, o alumnado de 5º explorou cuestións emocionais profundas, como a relación interxeracional entre o avó e a súa neta. Esta dinámica familiar ofreceu un espazo para reflexionar sobre a importancia das conexións persoais e o valor do apoio familiar.

Outro tema central foi o exceso no uso das tecnoloxías e o abuso das pantallas. Foi unha oportunidade para reflexionar sobre os seus propios hábitos dixitais e a necesidade dun uso equilibrado da tecnoloxía.

Para o alumnado de 6º, a lectura de “Idol!” centrouse na vida de dúas amigas e as súas dispares relacións familiares.

Ademais, a historia introduce ao lector no mundo do K-pop coreano, un fenómeno cultural a nivel mundial.

A estrutura gráfica da obra, inspirada no estilo do manga xaponés, tamén ofreceu unha experiencia visual única, enriquecendo a comprensión e o disfrute da historia.

BIBLIOLAB: A FOLIADA DAS LETRAS

Durante o mes de maio, a BiblioLab centrou as súas actividades na celebración de “A Foliada da Letras” co obxectivo de fomentar o coñecemento das homenaxeadas nas Letras Galegas.

BUSCA A PARELLA

Xogo de memoria no que temos que atopar as parellas de instrumentos tradicionais.

A FOLIADA

Coloreamos as marionetas, recortámolas e empregamos as pezas de Korbo para crear unha foliada de grupo.

A LUPA MÁXICA

Descubrimos os datos máis relevantes das homenaxeadas das Letras Galegas a través da lupa máxica que nos permitiu cubrir a ficha de investigación.

ATURUXA

Xogo de mesa estilo “Dobble” con temática de instrumentos e prendas típicas do baile tradicional galego.

ROBÓTICA

Descubrimos algúns intrumentos da música tradicional galega xogando co taboleiro do Tale Bot.

MARIONETA CANTAREIRA

Pintamos, recortamos e creamos a nosa marioneta cantareira seguindo as instrucións de montaxe.

CANTO SABES DAS CANTAREIRAS?

Escaneamos os códigos QR para aprender sobre as protagonistas das Letras Galegas.

A RUTA DAS CANTAREIRAS

Programamos o Coding Set para a nosa ruta coas tarxetas de retos.

"DÍA DO MEDIO AMBIENTE" NA RADIO DO SEIS

Neste novo programa da Radio do Seis, as clases de 1º A de Primaria e 5ºA de Edº Infantil únense para compartir consellos valiosos sobre como coidar o planeta. Ademais contan a historia de "Ra de tres ollos" para celebrar o Día Mundial do medio Ambiente, que se conmemora o 5 de xuño.

Xuntos podemos inspirar un cambio e garantir que o noso fogar, a Terra, siga sendo un lugar fermoso para vivir. 

ROTEIRO LITERARIO CO CLUB DE LECTURA

O pasado 29 de maio, o Club de Lectura de Adultas “Ás seis no Seis” embarcouse nunha viaxe cultural e emocional a Padrón, coa intención de seguir as pegadas de Rosalía de Castro. Despois de inspirarnos coa lectura da novela gráfica “Rosalía oculta” de Paula Mayor, decidimos explorar os lugares que gardan a memoria de Rosalía.

A primeira parada foi a Casa Museo Rosalía de Castro. Este espazo garda a esencia da poeta, ofrecéndonos un recuncho onde a súa poesía e lembranzas cobran vida.

Coa axuda de Alberto, o noso guía e técnico de turismo de Padrón, visitamos o Xardín Botánico. Neste espazo verde, puidemos coñecer diversas especies de plantas e árbores, incluíndo algunhas que forman parte do Catálogo Galego de Árbores Senlleiras. O percorrido polo xardín foi unha oportunidade para conectar coa natureza, tal e como Rosalía facía nas súas obras.

Continuamos o noso percorrido polas rúas de Padrón, cheas de historia e cultura. Visitamos a rúa Rosalía de Castro, o Pazo do Bispo de Quito, a Casa da Rúa do Sol, onde Rosalía pasou parte da súa infancia, e outros lugares significativos como a casa do Concello e a praza de Macías. Cada parada foi unha viaxe ao pasado, revivindo momentos cruciais na vida da escritora.

O noso paseo levounos tamén ao carón do río Sar, un río que foi tanto literario como vital para Rosalía. Este camiño culminou no Paseo do Espolón, baixo a mirada da estatua de Rosalía de Castro, recitamos algúns dos seus poemas máis coñecidos. A xornada rematou coa visita á Igrexa Parroquial de Santiago, onde se atopa o pedrón que lle dá nome á vila.

Foi unha fermosa xornada para lembrar, chea de aprendizaxe e emoción, onde a figura de Rosalía de Castro brillou con forza, guiándonos a través da súa vida e obra nesta vila!!!

FAMILIAS LECTORAS

Queremos agradecer a todas as familias que nos acompañastes durante estes meses, compartindo connosco esas lecturas que tanto desfrutamos e que nos permitiron pasar momentos moi agradables e cheos de complicidade. Grazas por participar nesta fermosa experiencia. Agardámosvos no próximo curso!

No mes de maio, estas foron as últimas familias que nos visitaron para contar contos como parte da actividade "Familias Lectoras":

Diego, pai de Dario e Mateo, 4º Ed. Infantil, contounos "Esto no es una selva". Un conto para comprender a importancia de colaborar para unha boa convivencia na casa.

Helia, nai de Brais, 5º Ed. Infantil, relatounos "Barbavoa". Que sucedería se unha doce avoíña se embarcase nun navío pirata? Quizais se dedique a facer adornos de ganchillo para os canóns ou a encher o barco de plantas. Pero a doce avoíña garda un segredo que terás que ler o libro para coñecer...

Sonia, nai de Diego, 3º de Primaria, compartiu "Yo voy contigo". Unha historia sinxela que reflexa a importancia de non renunciar a ser nós mesmos para encaixar ou gustarlle a outros.

Raquel, nai de Carmen, 5º Ed. Infantil, levounos á aventura con "Daniela e as mozas piratas". Hai un novo barco pirata navegando polos mares, ¡o Barco das Pirañas Intrépidas! Están a facerse famosas, salvan a xente en perigo e conseguen fabulosos tesouros.

Loreto, nai de Teo, 2º de Primaria, relatounos "O meu piollo máis eu". O título desta obra pica e incomoda igual que os piollos cando se aloxan nas nosas cabezas. Pero adoita suceder que o incómodo tamén resulta atractivo.

Antonio, pai de Roque, 5º Ed. Infantil, falounos de "Vilapaspán", unha aldea asombrosa, curiosa e misteriosa.

Ana e Paula, nais de Simón e Guillermo, 5º de Ed. Infantil, emocionáronnos con "La ovejita que vino a cenar". Un conto cheo de valores como a amizade, a xenerosidade e a aceptación das diferenzas.

Daniel, pai de Arabia, 2º de Primaria, contounos a historia de “Superheroes da escola”, mostra aos nenos e nenas todos os segredos que deben coñecer para se converteren en auténticos superheroes no colexio. Aprenderán as principais normas que deben cumprir: traballar sempre en equipo, axudar aos demais, loitar contra as inxustizas ou dicir sempre a verdade, entre moitas outras…

Zoa, nai de Deva e Xela, 5º de Edº. Infantil, presentounos "A ovella que chocou un ovo". Un conto divertido e tenro que demostra que os grandes amigos son moito máis importantes que as grandes melenas.

Grazas a todas as familias por facer desta actividade un verdadeiro éxito! Agardamos seguir contando coa vosa participación no futuro.

LECTURAS COMPARTIDAS NA BOUZA

O 27 de maio, con motivo da conmemoración do Mes das Letras Galegas, o alumnado de 1º da ESO do IES Alexandre Bóveda e os nenos e nenas de Educación Infantil de tres anos do CEIP Plurilingüe Seis do Nadal reunímonos nunha actividade especial de lectura compartida na Bouza. Foi unha xornada chea de emocións onde os máis pequenos/pequenas  tiveron a oportunidade de escoitar historias contadas polos maiores.

O entusiasmo e a ledicia foron palpables en cada sorriso e en cada conto compartido. Os nenos e nenas gozaron enormemente escoitando as historias narradas polos seus compañeiros e compañeiras maiores. As imaxes capturadas durante a actividade amosan o moito que desfrutamos deste encontro.

A interacción entre os máis pequenos e os maiores foi entrañable. Os relatos non só fixeron voar a imaxinación dos pequenos/as, senón que tamén crearon lazos entre as diferentes xeracións.

O peche da xornada estivo marcado pola entrega de agasallos (feitos coa cortadora laser) e unha foto de grupo, que serviu de recordo desta fermosa experiencia compartida. Estes pequenos detalles fixeron que o evento fose aínda máis memorable e significativo para todos e todas os que participamos.

FOLIADA DAS LETRAS

O venres 23 de maio o noso centro co grupo de “Cantareiras do Seis” participamos na Foliada das Letras Galego-Portuguesas en Compostela.

Nesa xornada reivindicamos e celebramos o rico patrimonio oral galego-portugués e os nosos cancioneiros tradicionais. 

A Foliada foi unha auténtica romaría, chea de música, alegría e cultura. Cantar e bailar foron as actividades principais, e fixémolo con moito entusiasmo. Compartimos a nosa paixón polas letras e a música tradicional con outros grupos de escolas de Galicia e Portugal. Foi unha experiencia enriquecedora que nos uniu a todos nun lazo cultural e emocional.

Durante esta fermosa festa, as nosas voces encheron o aire de Compostela, reivindicando a riqueza e a diversidade das letras galego-portuguesas. Cada canción que interpretamos foi un tributo ao noso patrimonio común, e cada baile foi unha celebración da nosa identidade compartida.

No blog de Música podedes ver os vídeos da actuación:

https://opentagramamaxico.wordpress.com/2025/05/26/ponte-nas-ondas-pno/

PDI 6º DE PRIMARIA: SARGADELOS

Ao longo deste curso, o alumnado de 6º de Primaria mergullouse na rica historia de SARGADELOS, unha parte integral do noso patrimonio cultural galego. Este tema formou parte do Proxecto Documental Integrado (PDI) do centro, titulado "Feira artesanal no Seis do Nadal", onde exploraron diversas manifestacións da artesanía tradicional galega.

O proxecto ofreceu aos nenos e nenas a oportunidade de descubrir a orixe e a evolución da recoñecida fábrica de cerámica de Sargadelos. Aprenderon sobre os seus elementos máis característicos e como estes se integran na identidade cultural de Galicia.

Unha das actividades principais foi a creación dunha vaixela personalizada. Cada alumno/a deseñou as súas propias pezas empregando as cores típicas de Sargadelos, especialmente o azul. Esta actividade permitiu ao alumnado expresar a súa creatividade mentres comprendían mellor o deseño e a estética da cerámica tradicional.

O alumnado tamén aprendeu a escribir os seus nomes empregando a tipografía característica de Sargadelos. Este exercicio achegounos ao mundo do deseño gráfico e axudou a comprender a importancia da identidade visual desta marca.

Realizamos ademais un traballo de simetría cunha Meniña de Sargadelos. O alumnado tivo que completar a figura a partir da súa metade, o que lles permitiu afondar en conceptos matemáticos dun xeito visual e artístico, mentres seguían explorando os motivos e deseños propios da cerámica de Sargadelos.

Ademais, coñecemos a costa galega e os seus faros a través das figuras de Sargadelos, que representan algúns dos máis emblemáticos. Para facer a aprendizaxe máis vivencial, elaboramos un circuíto eléctrico onde as figuras dos faros cobraban vida ao acender unha bombilla. Con esta actividade, unimos arte, xeografía e ciencia, traballando conceptos como o funcionamento dos circuítos eléctricos de maneira creativa e significativa.

Aproveitando a celebración do Entroido, levamos a temática un paso máis alá: o alumnado elaborou máscaras inspiradas en Sargadelos e caracterizouse con disfraces baseados na cerámica galega.

En conxunto, todas estas actividades serviron para coñecer e valorar o legado de Sargadelos, fomentando ao mesmo tempo a expresión plástica, a imaxinación, o pensamento matemático e científico e o respecto polo patrimonio galego. Este proxecto interdisciplinar enriqueceu o coñecemento dos nenos e nenas, ao tempo que cultivou un profundo aprecio pola cultura e tradicións galegas.

MICROBIT EN EDº FÍSICA

Dende a área de Edº Física realizamos unha actividade coa Microbit. Un material que programando a tarxeta podemos colocar unha serie de leds prendidos ou apagados, deixándonos entrever diferentes formas e debuxos.

Durante a clase, realizamos un xogo chamado “a bomba” onde o alumnado debe de saltar a través dunhas liñas de aros colocados no chan, debendo descifrar o camiño correcto onde non hai bombas (os leds que están apagados).

Colocamos dous conxuntos de aros, para un equipo A e para un equipo B. Dous alumn@s, terán dúas tarxetas microbit e tabletas. Situaranse ao final dos dous grupos de aros e, segundo avanzan os compañeir@s, saltando de liña en liña polos aros dende o lado contrario, terán a función de ir mirando a tarxeta e dicir a cada alumn@ se hai bomba no aro que saltaron. Se houbese bomba no aro, colocaránse ao final da fila e se acertasen avanzarán hacia a seguinte fila. Así ata que consigan pasar polos aros ata o final do percorrido.

Todo o equipo deber ser capaz de cruzar o campo minado para conseguir o reto.

Foi unha actividade moi divertida onde o alumnado participou cooperando para descrifrar o enigma do percorrido.

Dende a área de EF traballouse, tanto habilidades como capacidades físicas básicas, entre elas: a coordinación dinámica xeral a través dos saltos, a forza, o equilibrio e a resistencia. Así como, a concentración e cooperación traballando en equipo.

VISITA DE IRENE ALONSO

O venres 23 de maio, o alumnado de 2º de Primaria tivo a oportunidade de participar nun encontro literario coa escritora Irene Alonso Gasalla, quen compartiu a súa obra "Refugallo o espantallo".

Foi unha xornada chea de aprendizaxe e diversión, na que Irene interactuou de maneira activa cos nenos e nenas, fomentando a súa curiosidade e creatividade.

A sesión comezou coa presentación a cargo de Denis e Heitor, un acto que a autora confesou ser a primeira vez que acontecía, quedando moi satisfeita e encantada coa calidez e entusiasmo dos pequenos presentadores.

Irene iniciou a súa charla introducindo o tema da reciclaxe preguntando ao alumnado polas catro cousas que levaba feitas con materiais reciclados: os pendentes, o anel, a bufanda e o bolso. Explicou que ela tamén é afeccionada a recoller materiais de refugallo para darlles unha nova vida.

Unha das actividades máis interesantes foi a clasificación de varios obxectos en función do tempo que tardan en degradarse, como bolsas, latas… facéndonos reflexionar sobre o impacto ambiental dos residuos.

Durante o encontro, Irene preguntoulles polos animais que aparecen na súa historia, acompañando a pregunta cun divertido xogo de memoria onde debían identificar imaxes de animais que formaban parte ou non do relato.

Lemos xuntos o apartado de inicio do libro, onde se fala de "Lecer".

Outro momento especial foi cando Irene mostrou unha pedra, en forma de corazón, que decorara. Inspirados por esta idea, o alumnado amosou as súas propias pedras decoradas, compartindo a súa creatividade coa autora.

Para finalizar, Irene propuxo un xogo no que a rapazada debía ler frases e decidir se estaban ben ou mal. Esta actividade fomentou a reflexión crítica e a comprensión lectora.

Tamén se lles deu a oportunidade de facer preguntas sobre a protagonista Comba e a historia do libro.

Mentres Irene asinaba exemplares, os nenos e nenas puxéronse mans á obra para crear as súas propias buxainas usando tapóns de botellas e palillos, unha actividade que reforzou a importancia da reciclaxe e a reutilización.

Moitas grazas, Irene, por ensinarnos a importancia de coidar o medio ambiente e de reciclar!!! Foi unha experiencia enriquecedora que todos e todas desfrutamos moito!!!