"A BIBLIOTECA GALÁCTICA" DE TANXARINA

O xoves 22 de outubro celebramos o Día das Bibliotecas co espectáculo “A biblioteca Galáctica contra a IA Fantástica” de Tanxarina Compañía de Títeres e o dramaturgo Carlos Labraña.

Esta adaptación teatral da novela de Carlos Labraña é unha defensa á amizade, á solidariedade e unha defensa dos libros, da lectura e da palabra escrita fronte a unha Intelixencia Artificial que quere acabar coa imaxinación e a fantasía.

A obra convídanos a descubrir o valor das historias e a coñecer algúns dos referentes máis importantes da literatura galega. Entre os seus personaxes atopamos o Lobo Namorado, da escritora Fina Casalderrey; Toribio, do escritor de Carlos Casares; e O Espantallo Amigo, personaxe creado por Xosé Neira Vilas.

A historia sitúanos na Biblioteca Galáctica, onde Ataulfo, o rato bibliotecario, descobre que os personaxes dos libros infantís están en perigo. Xunto con Ramón Lamote e Sara, deberá enfrontarse ao malvado profesor Smith e á súa IA Fantástica para liberar os seus amigos Toribio, Espantallo Amigo e Lobo Namorado da súa influencia.

Este espectáculo, nacido do traballo conxunto de Tanxarina e Carlos Labraña por encargo da Editorial Galaxia para celebrar o seu 75 aniversario no ano 2025, recibiu o Premio María Casares ao Mellor Espectáculo de Títeres, Obxectos e Formas Animadas.

Moitísimas grazas a Tanxarina por este espectáculo marabilloso que nos encantou e por lembrarnos que os libros son auténticas portas a outros mundos, que nos permiten soñar, aprender, imaxinar e vivir mil aventuras sen saír do mesmo lugar. Porque cada libro agocha un universo por descubrir!

DÍA DAS BIBLIOTECAS 2026

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administración autonómicas.

A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2026.   

O lema deste ano, "Sen profesionais, non hai bibliotecas", quere poñer no centro ás persoas que fan posible que as bibliotecas sexan moito máis que un simple conxunto de recursos, andeis e espazos.

As bibliotecas, como institución, son un servizo esencial para a cidadanía, que busca nelas un lugar de encontro, de intercambio de opinión e coñecemento.

Pero detrás de cada préstamo, cada consulta, cada actividade, cada recomendación e cada proxecto hai profesionais que traballan para garantir o acceso á cultura, acompañar as súas comunidades e facer das bibliotecas espazos abertos, inclusivos e accesibles para todos e todas.

Nesta data celebramos a todas as bibliotecas, tamén ás escolares. A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.

FONTE: BIBLIOTECAS ESCOLARES

MOCHILAS VIAXEIRAS

Unha nova aventura da Mochila Viaxeira está a piques de comezar! As historias xa están preparadas para percorrer as rúas do noso barrio, chegar ás vosas casas e encher de maxia, ilusión e momentos compartidos cada fogar. Son 19 mochilas que inician a súa viaxe!!!

Coia será o escenario desta fermosa viaxe, e cada familia, a protagonista dunha aventura na que os libros nos axudarán a soñar, descubrir e gozar xuntos. Porque un barrio tamén medra a través das historias que compartimos!

Dentro de cada mochila atoparedes

-Unha carta explicando o seu funcionamento e un listado do material.

-O Caderno Viaxeiro, o noso diario de aventuras. Queremos que o enchades de palabras, debuxos, cores, opinións e suxestións.

-Coia a través de Broli: Escolle o teu recuncho favorito de Coia e sácalle unha foto usando a Broli como marco.

Para que esta viaxe por Coia sexa todo un éxito, precisamos da colaboración de todas as familias.

Lembrade, a puntualidade é fundamental para que a mochila poida continuar a súa viaxe. Tratemos os libros e todos os materiais con agarimo, coma auténticos tesouros.

Busquemos un anaquiño de tempo para ler xuntos, mirar as ilustracións, contar historias e deixar voar a imaxinación.

SEMANA DA BIBLIOTECA

Do 19 ao 23 de outubro, a biblioteca convértese nun espazo para compartir lecturas, descubrir novas historias, ampliar coñecementos, compartir ideas e deixar voar a imaxinación. A biblioteca promove a cultura, favorece a convivencia e fortalece os lazos da comunidade. Un lugar para aprender, participar e medrar xuntos.

O martes, 20 de outubro teremos un Obradoiro de Radio da man de Damián Alonso. Pola mañá estará dirixido ao alumnado e pola tarde ao profesorado. Será unha oportunidade para aprender, expresarnos e dar voz ás historias e ás persoas do noso barrio.

Ao longo de toda a semana cada clase recollerá a súa Mochila Viaxeira, que levará libros e aventuras para compartir. Porque cando unha historia viaxa de casa en casa, tamén viaxa a imaxinación e medra a comunidade.

O xoves, 22 de outubro, recibiremos a Tanxarina, que presentará o espectáculo: “A biblioteca galáctica contra a IA fantástica”. Unha proposta para reflexionar, xuntos e xuntas, sobre o uso da tecnoloxía e sobre a importancia de coidar os libros, a lectura e a imaxinación.

Ademais… Poderedes visitar a nosa Exposición de Novidades e descubrir os últimos libros chegados á biblioteca para ler, recomendar e compartir.

A biblioteca é un espazo do barrio, aberto á participación, ao encontro e á creación de comunidade.

BIBLIOTECA ESCOLAR, DA INFORMACIÓN AO COÑECEMENTO

O lema para as bibliotecas escolares durante o curso 2026/27 convídanos a facernos preguntas e a buscar respostas, a ser persoas curiosas que busquen e que indagen, que seleccionen e traballen coa información para crear e compartir coñecemento. 

Un camiño que comeza e remata na biblioteca escolar, na que conviven diferentes fontes e distintas estratexias de busca, na que atopamos recursos variados que nos permiten transformar a información en coñecemento, na que se integra a cultura impresa e a cultura dixital.

Nestes tempos nos que a desinformación condiciona o noso rumbo a biblioteca escolar ten a obriga de visibilizar o seu papel na formación de persoas críticas e de ofrecer á súa comunidade programas estables e sistematizados de alfabetización informacional.

Rena Ortega representa no cartaz deste curso ese camiño que ela percorre cada vez que escribe e ilustra as súas obras. Chama a traballar coa información, a mirar fóra, a percorrer o camiño do coñecemento, a facerse preguntas e buscar respostas, a interesarse polo mundo que nos rodea. 

Un camiño de aprendizaxe compartida no que a biblioteca escolar ofrece diferentes recursos que acompañaran o proceso de traballo coa información, tanto na busca como na avaliación crítica, no tratamento e no compartir o aprendido.

FONTE: BIBLIOTECAS ESCOLARES

DÍA DAS BIBLIOTECAS 2025

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administración autonómicas.

A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2025. 

O lema deste ano, “Contra a desinformación: bibliotecas”, pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.

As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas. 

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio, lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que pon en contacto con ese outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.

FONTE: BIBLIOTECAS ESCOLARES

HISTORIAS CO BARDO ABELARDO

A Semana da Biblioteca é un momento especial para celebrar a importancia da lectura e da aprendizaxe na nosa escola. Este ano, contamos coa presenza do músico e contador de historias, Servando Barreiro, coñecido como o Bardo Abelardo!.

O mércores 22 de outubro, a biblioteca da escola transformouse nun escenario máxico. Os nenos e nenas de Edº Infantil, 1º, 2º e 3º de Primaria, reuníronse con ilusión para desfrutar dunha actuación chea de música e historias.

SEMANA DA BIBLIOTECA

Benvidos e benvidas ao maior espectáculo do ano! A Semana da Biblioteca, do 20 ao 24 de outubro, chega cargada de imaxinación, lectura e comunidade!

A nosa  Mochila Viaxeira é unha maleta chea de ilusión!!! Como un circo ambulante en miniatura, viaxa de casa en casa, sementando historias, risas e momentos máxicos en cada parada. Non perdas a oportunidade de recibila no teu fogar e descubrir os tesouros que garda!!.

O mércores 22 de outubro, prepárense para a gran función! Da man do Consorcio Editorial Galego, o noso mestre de cerimonias, o contacontos Servando Barreiro, guiaravos a través dun espectáculo de palabras, música e soños. 

Pola tarde, as familias convértense nas estrelas do noso circo! Participarán nunha tarde de xogos de mesa, onde a maxia e a alegría serán os ingredientes principais.

Achégate á biblioteca e déixate sorprender!

MAXIA E LITERATURA CO MAGO ÓSCAR

O venres 17 de outubro, o noso centro converteuse nun escenario de maxia e ilusión grazas ao incrible Mago Óscar (Magia en la Manga). Un evento que marcou o inicio das actividades do PDI dun xeito inesquecible. 

En dúas sesións que cautivaron a pequenos/pequenas e maiores, o mago Oscar presentou “A ilusión de ler”, un espectáculo onde a maxia e a literatura van da man. Con diferentes elementos, un libro, xogos de cartas, unha mesa, un pañuelo, transportounos a mundos fantásticos inspirados en grandes obras da literatura.

As cartas semellaban bailar entre a realidade e a ficción (A historia Interminable de Michael Ende), mentres que versos de Manuel Antonio e Gloria Fuertes creaban unha atmósfera máxica. Os poemas, coma se fosen susurros no aire, e a mesa levitando evocando a fantasía de Peter Pan, transportáronnos a un mundo de ilusión. 

O alumnado non foi un mero espectador/espectadora, senón que participou activamente en cada truco, converténdose en parte esencial da maxia. A sorpresa, o asombro e as risas foron a banda sonora dunha xornada inesquecible. Grazas Oscar!!!

VIAXE Á CREATIVIDADE

Un curso máis abrímoslle a porta á creatividade nas bibliotecas escolares, deste volta a través do DESEÑO.

O deseño que acompaña desde o inicio a comunicación escrita, que é orixe de tipografías, logotipos e páxinas, que consegue achegar a información da maneira máis impactante ou máis sutil. 

O deseño gráfico que atopamos desde a orixe dos tempos da escrita e que hoxe en día se espalla a través de aplicativos dixitais.

Unha oportunidade para crear desde as bibliotecas do hoxe e do futuro, tecendo desde a nosa propia historia, coas referencias imprescidibles das editoriais Nós ou Castrelos, do Laboratorio de Formas e Ediciós do Castro… e de mestres do cartelismo como Xosé Vizoso.

Propoñemos mirar os libros desde a súa orixe, coñecer o proceso da edición, da composición, da escolla de tipos, papeis, cubertas e encadernacións, da revisión da maqueta e da difusión… e coñecer as persoas que forman parte dese mundo da edición e do deseño gráfico. Deseño gráfico que tamén trascende do mundo do libro e está presente na publicidade, a prensa, as etiquetas, as marcas corporativas… e en tantos outros ámbitos da nosa vida cotiá.

O cartel que Desescribir nos ofrece para este curso é unha porta aberta a esa creatividade a partir da raíz: o alfabeto e as infinitas posibilidades que permite a partir dunha sinxela pauta. Sumémoslle deseño ás bibliotecas escolares e enrolémonos nesta viaxe á creatividade! 

FONTE: BIBLIOTECAS ESCOLARES

A ILUSIÓN DE LER

O vindeiro venres 17 de outubro contaremos coa presenza da compañía viguesa “Magia en la Manga” que realizará un espectáculo de maxia e animación á lectura, “A ilusión de ler”. 

Acompañaremos ao mago Oscar nunha aventura máxica polo universo dos libros e comprobaremos que a verdadeira maxia está agochada nas súas páxinas, onde os personaxes cobran vida e as historias convértense en asombrosos trucos de ilusionismo.

COMEZA A FUNCIÓN!!!

O luns 1 de outubro a Biblioteca abriu as portas da súa gran carpa!!! Ábrese o pano e comeza a función!!!

Todas as clases recibiron a invitación de Broli, a nosa mascota, que nos convida a visitala.

Na biblioteca agardávanos unha sorpresa que daba inicio ao PDI deste curso: unha carta e unha caixa que contiña diferentes elementos do circo para xogar, rir e compartir moitas aventuras circenses.

Poidemos ver a exposición de novidades, realizar os primeiros préstamos e desfrutar dos novos materiais.

A biblioteca convértese nun gran circo das palabras e das historias!!

Nos seus andeis agárdanvos milleiros de viaxes sorprendentes, aventuras cheas de acrobacias, retos de equilibrista e investigación dignas dos/das mellores ilusionistas.

Cada libro é un número distinto: uns fan rir, outros fan soñar, e algúns deixan coa boca aberta coma un gran espectáculo. Entre as súas páxinas saltan acróbatas de palabras, malabaristas de ideas e domadores de emocións. Un circo onde nós, os lectores e lectoras, somos o público entregado, disposto a deixarse sorprender e emocionar.

CELEBRAMOS O DÍA DAS BIBLIOTECAS

Nesta semana demos comenzo coas actividades na biblioteca: escollemos os libros que levamos en préstamo, preparamos os pasaportes lectores, vimos as primeiras novidades, cada aula recolleu a súa mochila viaxeira, o voluntariado comenzou co seu traballo solidario e de contacontos, recordamos normas de funcionamento...

As Mochilas Viaxeiras iniciaron a súa andaina aos vosos fogares dende este mes ata finais de maio que regresarán á biblioteca.

Con esta proposta queremos que as familias poidades compartir momentos en torno aos libros e a lectura.

Levan unha carta explicando o seu funcionamento e un listado do material así como un caderno viaxeiro, en branco, para escribir, debuxar, pegar unha foto, suxerencias... deixar a vosa pegada para compartir co resto da aula!!!

Tamén acompaña unha proposta de actividade para facer en familia, relacionada co PDI, que logo formarán parte da exposición que organizaremos no centro.

Agardamos que as desfrutedes!!!

APERTURA CON... ANXO MOURE

Outro curso máis a biblio abre as súas portas para engaiolarnos coas súas aventuras, misterios e retos; ofrecéndonos un lugar para a lectura, a aprendizaxe e o lecer.

Con motivo desta apertura, contamos coa visita de Anxo Moure que nos lembrou a importancia de coidar o planeta movéndonos de forma sostible, de coidar as árbores facendo fincapé nas árbores autóctonas e incluso da importancia de quererse a un mesmo e de tratar con respecto aos demais a través da historia de Xacia.

Falounos de diferentes oficios tradicionais e contounos a historia de "Caramulo e a carpinteira dos soños".

E, en medio de tantos contos, tamén houbo tempo para cantar e bailar, xa que a biblio non só é un espazo de lectura, senón tamén para compartir momentos que non esqueceremos.

Grazas Anxo, artesán da palabra!!!

DÍA DAS BIBLIOTECAS 2024

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administración autonómicas.

A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2024. 

A edición deste ano, baixo o lema “Por un futuro sostible”, pretende destacar o papel fundamental que desempeñan todas as tipoloxías de bibliotecas (públicas, escolares, universitárias, especializadas e nacionais/rexionais)  na consecución dos Obxectivos de Desenvolvemento Sostible da Axenda 2030.

A través das súas coleccións, servizos e actividades cos usuarios/as, as bibliotecas contribúen a construir unha sociedade cada vez mellor informada, máis igualitaria, solidaria e xusta, plenamente consciente da necesidade de levar un modo de vida sostible como compromiso coas xeracións futuras.

As bibliotecas son espazos accesibles, abertos á participación da cidadanía, que busca nelas un lugar de encontro, de intercambio de opinións e coñecemento.

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio, lugares que contribúen á formación dunha cidadanía crítica, activa e comprometida. O seu traballo de deseño e planificación de atividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas quedara atrás.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que pon en contacto con ese outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.

FONTE:BIBLIOTECAS ESCOLARES