PECHE DO CLUB DE LECTURA DE ADULTAS

O martes 16 de xuño celebramos o peche a un novo curso do noso Club de Lectura "Ás seis no Seis", nun encontro cheo de emocións, lembranzas e bos momentos compartidos.

Foi unha tarde para mirar atrás e lembrar todo o vivido ao longo destes meses: libros que nos emocionaron, historias que nos fixeron pensar, personaxes que quedaron connosco e conversas que enriqueceron cada encontro. Un ano máis, a lectura converteuse na mellor escusa para compartir experiencias, descubrir novas perspectivas e fortalecer os lazos de amizade entre as integrantes do club.

Durante o encontro fixemos balance da nosa andaina lectora. Coincidimos en que este foi un curso cheo de descubrimentos literarios, de autoras e de historias que nos fixeron viaxar, rir e reflexionar. 

Con ilusión e curiosidade, xa deixamos preparada a selección de lecturas para o primeiro trimestre do curso 26-27. Escolléronse títulos variados, con propostas que prometen emoción, reflexión e moita conversa. O espírito lector segue vivo e con ganas de seguir explorando novos mundos. 

A celebración rematou coa tradicional merenda, un momento distendido no que as risas, as anécdotas e a boa compañía foron as verdadeiras protagonistas. Tamén fixemos entrega de diplomas e pequenos agasallos como mostra de agradecemento pola implicación, a participación e o entusiasmo que cada unha achega ao club.

Grazas a todas por facer de “Ás seis no Seis” moito máis ca un club de lectura: un espazo de encontro, diálogo, aprendizaxe e amizade. Desexámosvos un feliz verán, cheo de boas lecturas, novos descubrimentos e historias inesquecibles.

ENCONTRO LITERARIO CON ABRIL CAMINO

O mércores 20 de maio, os Clubs de Lectura do Ceip Plurilingüe Seis do Nadal e do IES Alexandre Bóveda reuníronse para compartir unha xornada literaria con Abril Camino, autora de “Mulleres que viven xuntas”, obra gañadora do XLII Premio Xerais de Novela 2025.

A novela lévanos á Galicia do franquismo para achegarnos ás vidas de Isabel e Chus, dúas mulleres obrigadas a vivir o seu amor nun tempo de silencios, medos e renuncias. É unha historia que rende homenaxe a todas esas vidas ocultas que durante moito tempo non tiveron voz na literatura nin na sociedade. 

Durante o encontro, Abril compartiu con nós como xurdiu a idea de escribir este libro: a partir dunha conversa coa súa nai sobre aquelas mulleres solteiras que vivían con outra muller e que, sen decilo abertamente, compartían vida e afectos.

A autora contou que quería escribir unha historia breve, polo que hai pouca descripción dos personaxes deixándoa á imaxinación do lector/lectora. Tamén explicou que o personaxe de Chus foi medrando ata converterse na verdadeira voz da memoria. Tiña claro que Isabel debía emigrar a Londres, unha cidade aberta e cosmopolita nos anos sesenta, símbolo de liberdade que en Galicia lles era negada.

Falouse dos grandes temas que atravesan a novela: a memoria histórica, a represión social, a emigración e a necesidade de vivir con autenticidade.

Abril explicou como o relato alterna dous tempos narrativos para reconstruír os cincuenta anos de vida compartida entre Chus e Isabel. O pasado aparece narrado en terceira persoa, ofrecendo unha viaxe polos antecedentes familiares, a marcha de Isabel a Londres e o nacemento da relación entre ambas. O presente, en cambio, está contado en primeira persoa por Chus, nos momentos previos ao enterro de Isabel, converténdose nun espazo de dor, nostalxia e lembranza.

Grazas, Abril, por este encontro onde a literatura, a memoria e as emocións déronse a man!

XUNTANZA NA BIBLIOTECA DO BÓVEDA

O 7 de maio, o Club de Lectura de Adultas “Ás seis no Seis” participou nun encontro literario na biblioteca do IES Alexandre Bóveda arredor da figura de Begoña Caamaño. A actividade foi coordinada por Fani González, profesora do IES e autora do libro "Begoña Caamaño. Xornalista e escritora" da Ed. Ir Indo.

Comezou cunha pequena presentación sobre a vida, o pensamento e a importancia literaria de Begoña Caamaño na que estivo acompañada de alumnas do Bacharelato de Artes, que realizaron unha fermosa escenificación inspirada nas súas novelas. A través da interpretación e  da expresión corporal conseguiron trasladarnos a intensidade emocional e simbólica das obras.

Comentamos as dúas obras escritas por Begoña Caamaño: "Circe ou o pracer do azul" e "Morgana en Esmelle". Ao longo da sesión falamos da maneira na que a autora revisa os personaxes femininos da mitoloxía e da literatura clásica para darlles voz propia e unha mirada máis libre e actual.

Foi unha tarde moi amena, na que puidemos compartir impresións e reflexións entre os dous clubs de lectura, creando un espazo de encontro arredor da literatura e facendo comunidade.

OLAIA SENDÓN E "A CASA GRANDE"

O luns 27 de abril os Clubs de Lectura do CEIP Plurilingüe Seis do Nadal e do IES Alexandre Bóveda compartiron un encontro literario coa escritora Olaia Sendón para conversar arredor da súa novela “A casa grande”, finalista do Premio Xerais 2025.

“A casa grande” é unha obra que non só se le, senón que se habita. Abriunos a porta a un territorio que todas recoñecemos: o da memoria, o das herdanzas e o dos silencios que fican entre as paredes de calquera fogar familiar.

A historia non é autobiográfica, mais parte desa emoción compartida que xorde cando o pasado familiar se converte en materia literaria.

Na novela, os obxectos teñen vida propia. Levan a pegada de quen os habitou e gardan as historias que outros deixaron atrás. Por iso, Olaia dedícalles varios capítulos: o álbum secreto, a foto, o secreter, a mesa de caoba, os rubís. Cada un deles convértese nun fío que une xeracións e recordos.

A casa que dá título á novela é real, situada en Corcubión, e serve de escenario para un relato que alterna presente e pasado cunha linguaxe sinxela e envolvente. A autora opta por ofrecer poucas descricións físicas dos personaxes, para que cada lector/lectora poida imaxinarlles o rostro e a presenza.

Durante o encontro, entregámoslle a Olaia un álbum coas fotos do noso Knolling literario, composto con obxectos e elementos significativos da historia.

Rematamos construíndo a nosa propia casa grande da lectura a partir de palabras que nos acompañarán sempre: memoria, fogar, silencio, familia, pasado, identidade, lembranzas, pertenza, conflito, esperanza.

Olaia asinou os exemplares cunha ilustración personalizada, deixando en cada unha de nós unha pegada única e o recordo dun encontro cheo de emoción e literatura compartida.

PEDRO FEIJOO NO CLUB DE LECTURA

O 22 de abril o Club de Lectura “Ás seis no Seis” do CEIP Plurilingüe Seis do Nadal e o Club de Lectura de Adult@s do IES Alexandre Bóveda compartiron unha xornada inesquecible coa visita do escritor Pedro Feijoo. O autor achegouse para conversar arredor da súa novela “Onde nacen as bestas”, un relato intenso que non deixa indiferente a ninguén.

En “Onde nacen as bestas”, Pedro Feijoo mergúllanos nunha historia chea de tensión, misterio e simbolismo. A través dun contexto rural e de personaxes complexos, o autor convida a reflexionar sobre os límites entre o humano e o salvaxe, entre a razón e os instintos máis primarios. Ispirada na lenda do lobishome de Allariz, Romasanta, a novela combina realidade e mito cunha forza narrativa que atrapa dende as primeiras páxinas.

Para acoller o encontro, o espazo decorouse para a ocasión cunha careta de lobo e elementos de costura, símbolos que evocan o universo da novela e a personalidade dos seus protagonistas. 

Pedro Feijoo, destacou a importancia de investigación e documentación exhaustiva no seu proceso creativo. Contou que viviu durante un tempo en Rebordechao, para coñecer de preto o territorio e as persoas que inspiraron a súa historia.

Durante a conversa, compartiu anécdotas, reflexións e curiosidades abordando diferentes aspectos presentes na novela, como os incendios forestais, a crítica social e o papel da memoria colectiva na construcción das identidades.

A xornada rematou cun toque doce e entrañable: a tradicional bica branca de “A Casa das Bicas” de Soutelo Verde, que puxo sabor a unha tarde chea de emoción e complicidade.

O encontro con Pedro Feijoo foi unha oportunidade para dialogar sobre literatura, identidade e memoria. Moitas grazas, Pedro, por compartir connosco esta viaxe literaria.

VISITAS NO CLUB DE LECTURA DE ADULTAS

Este mes de abril, o Club de Lectura de Adultas “Ás seis no Seis” celebra dúas citas moi especiais. Dúas xornadas para conversar, compartir impresións e gozar da literatura en boa compañía.

O primeiro encontro, o 22 de abril, contará coa presenza do escritor Pedro Feijoo, para falar sobre a súa novela “Onde nacen as bestas”. Unha historia de violencia ancestral, silencios familiares e identidades ocultas ambientada en Galicia. Será unha oportunidade para afondar nesta obra e intercambiar reflexións co autor.

Uns días despois, o 27 de abril, recibiremos a Olaia Sendón, quen compartirá coas lectoras impresións sobre o seu libro “A casa grande”, unha obra que mergulla nas relacións familiares, a memoria e os segredos que habitan nas casas e nas persoas.

O Club de Lectura continúa a consolidarse como un espazo de diálogo, aprendizaxe e amizade arredor dos libros. Dúas citas importantes para seguir facendo comunidade a través da lectura.

ARANTZA PORTABALES INAUGURA O CLUB DE LECTURA

O xoves 18 de setembro, o Club de Lectura de Adultas "Ás seis no Seis" abriu as súas portas a unha nova tempada chea de misterio e lecturas. 

A escritora Arantza Portabales acompañounos nunha tarde especial, na que nos mergullamos nas páxinas do seu último libro, ”Asasinato na casa rosa”.

Vestidas de rosa, acompañamos á inspectora Iria Santaclara e a César Araujo na intrincada tarefa de desvelar os segredos da familia Villamor. Unha viaxe a través de mentiras, intrigas e a atmosfera enigmática dunha casa que garda máis do que amosa e que atrapa ao lector/lectora desde a primeira páxina.

Arantza compartiu con nós a esencia da súa obra: a súa inspiración, o proceso de creación da novela, a historia que se esconde detrás de cada personaxe e detalles. A súa proximidade e simpatía crearon un ambiente cálido e acolledor.

A novela "Asasinato na casa rosa", cos seus capítulos curtos e a súa linguaxe fluida, invita a mergullarnos nunha trama intricada onde nada é o que parece. 

Os personaxes, tanto principais como secundarios, están construidos con gran profundidade, explorando a súa psicoloxía e as súas motivacións. A autora amosa a complexidade das relacións humanas e a capacidade que teñen as persoas para ocultar a súa verdadeira identidade.

Ademais, a ambientación xoga un papel fundamental na novela. O pobo costeiro galego, co seu ambiente misterioso e as súas paisaxes evocadoras, convértese nun personaxe máis, contribuindo a crear unha atmósfera de suspense e intriga. Esta obra é só o comezo da serie "Os crimes de Loeiro" prometendo máis misterios por resolver.

O encontro rematou coa sinatura de libros, un momento máxico de conexión entre a autora e as lectoras. Compartimos doces, froita e unha infusión de xenxibre e limón que endulzaron a xornada.

Grazas, Arantza, por unha tarde inesquecible!

O CLUB DE LECTURA DE ADULTAS DESPÍDESE

O luns 16 de xuño, nunha tarde moi calurosa, puxemos o peche, por este curso, ao noso querido Club de Lectura “Ás Seis no Seis”. Foi unha xornada chea de ledicia e emocións, onde cada unha de nós puido compartir o seu amor pola lectura e as experiencias vividas durante o ano.

Durante a reunión, dedicamos un tempo a conversar sobre o último libro que lemos,"Rosalía oculta" de Paula Mayor.

Tamén dedicamos un momento para valorar a experiencia do club ao longo do curso.  Todas coincidimos en que foi un ano cheo de historias, sorrisos e encontros literarios que nos permitiron coñecer novas autoras e xéneros. Agradecemos a cada participante pola súa implicación e entusiasmo, que fixeron deste club un espazo especial e acolledor para todas.

De cara ao vindeiro curso 25-26, fixemos unha selección de lecturas para o primeiro trimestre. Escollimos libros que prometen ser tan interesantes e desafiantes como os que lemos este ano. Estamos ansiosas por comezar a exploración de novas historias e aventuras literarias.

A tarde rematou coa nosa tradicional degustación de froita e doces, mentres compartiamos risas e conversas. Por último, entregamos diplomas e agasallos a todas as participantes como recoñecemento pola súa dedicación e entusiasmo.

Grazas a todas por facer deste curso  unha experiencia inesquecible. Desexámosvos un bo verán e esperamos con ilusión o próximo curso, onde seguiremos a compartir o noso amor pola lectura!

ROTEIRO LITERARIO CO CLUB DE LECTURA

O pasado 29 de maio, o Club de Lectura de Adultas “Ás seis no Seis” embarcouse nunha viaxe cultural e emocional a Padrón, coa intención de seguir as pegadas de Rosalía de Castro. Despois de inspirarnos coa lectura da novela gráfica “Rosalía oculta” de Paula Mayor, decidimos explorar os lugares que gardan a memoria de Rosalía.

A primeira parada foi a Casa Museo Rosalía de Castro. Este espazo garda a esencia da poeta, ofrecéndonos un recuncho onde a súa poesía e lembranzas cobran vida.

Coa axuda de Alberto, o noso guía e técnico de turismo de Padrón, visitamos o Xardín Botánico. Neste espazo verde, puidemos coñecer diversas especies de plantas e árbores, incluíndo algunhas que forman parte do Catálogo Galego de Árbores Senlleiras. O percorrido polo xardín foi unha oportunidade para conectar coa natureza, tal e como Rosalía facía nas súas obras.

Continuamos o noso percorrido polas rúas de Padrón, cheas de historia e cultura. Visitamos a rúa Rosalía de Castro, o Pazo do Bispo de Quito, a Casa da Rúa do Sol, onde Rosalía pasou parte da súa infancia, e outros lugares significativos como a casa do Concello e a praza de Macías. Cada parada foi unha viaxe ao pasado, revivindo momentos cruciais na vida da escritora.

O noso paseo levounos tamén ao carón do río Sar, un río que foi tanto literario como vital para Rosalía. Este camiño culminou no Paseo do Espolón, baixo a mirada da estatua de Rosalía de Castro, recitamos algúns dos seus poemas máis coñecidos. A xornada rematou coa visita á Igrexa Parroquial de Santiago, onde se atopa o pedrón que lle dá nome á vila.

Foi unha fermosa xornada para lembrar, chea de aprendizaxe e emoción, onde a figura de Rosalía de Castro brillou con forza, guiándonos a través da súa vida e obra nesta vila!!!

"A NOITE DAS CEBOLAS" NO CLUB DE LECTURA

O 24 de abril, o Club de Lectura "Ás seis no Seis" tivo a honra de recibir á escritora Rosa Aneiros, que falou sobre a súa obra "A noite das cebolas", galardoada co Premio Follas Novas 2025 de Narrativa.

Ao longo da tarde, Rosa Aneiros desvelou algúns segredos do seu proceso creativo. Manifestou o seu desexo de que os lectores e lectoras se sintan especiais ao ler os seus escritos. Como ela mesma se define, é unha "escritora de compás": coñece o comezo e o final das súas historias, pero o que ocorre entre ambos puntos desenvolvese de maneira fluída e natural. Destacou tamén a importancia de manter un ritmo de lectura pausado, que permita un disfrute pleno do relato.

Rosa revelou que, aínda que a historia é inventada, inclúe elementos do seu entorno persoal. A novela está ambientada no faro de Meirás, e incorpora detalles sobre o cultivo de cebolas, algo que coñece grazas aos seus pais.

Ademais, a autora permitiunos afondar na personalidade de Abril, a protagonista da novela. Abril é unha muller que se atopa cunha segunda oportunidade para reconciliarse coa súa vida. A metáfora das cebolas, co proceso de ir sacando capas ata chegar ao fondo persoal, e a presenza do faro como guía no camiño son elementos centrais na obra.

No seu discurso, Rosa Aneiros mencionou algúns dos seus referentes literarios, como Miguel Hernández, Agustín Fernández Paz e Paul Auster..., figuras que deixaron unha pegada no seu traballo literario, enriquecendo o seu enfoque e estilo narrativo.

A novela aborda temas profundos como a beleza, a fraxilidade, a observación da natureza, os coidados, a memoria enganosa, a culpa e a íntima alegría de sentirse viva. É un libro para desfrutar pausadamente de cada palabra reflectindo a riqueza dos sentimentos humanos.

A visita de Rosa Aneiros foi unha experiencia inspiradora e enriquecedora para todas as presentes. Grazas Rosa, por compartir o teu tempo e a túa paixón pola literatura!

MARTA VILLAR CO CLUB DE LECTURA

O 6 de marzo no Club de Lectura de Adultas “Ás seis no Seis”, contamos coa presenza da xornalista e escritora Marta Villar, gañadora da XLI edición do Premio Xerais de Novela coa obra que nos veu comentar: “Detective Ferruchi”.

Marta compartiu unha tarde co noso club desbordando simpatia e anécdotas do conxunto de personaxes que poboan Umeiro e que, como a propia autora explicou, mostran a diversidade que atopamos na vida cotiá porque, non esquezamos, a vida ten unha mestura de persoas e cincunstancias de diferente tipo.

Co libro logra dar voz a colectivos minoritarios e tratar de rachar cos prexuicios que, desafortunadamente, todavía están presentes na nosa sociedade. Ao mesmo tempo, homenaxea ás traballadoras do textil da súa terra natal sen esquecer outros temas cercanos á autora como poden ser a emigración e a relación cos avós.

Para finalizar, agasallamos a Marta cuns detalles, entre os que adquiriu unha especial un dedal feito coa impresora 3D, tan relacionado co libro, feito co gallo do proxecto de artesanía que se desenvolve no centro ao longo deste curso.

Como xa vén sendo habitual no club, o colofón foi compartir un café con doces caseiros e froita de tempada antes de que Marta asinara os nosos exemplares do libro.

Non podemos estar máis que agradecidas á xenerosidade de Marta polo tempo e as historias compartidas.

XUNTANZA DO CLUB DE LECTURA

O Club de Lectura de Adultas "Ás seis no Seis" continua a súa andaina, reuníndose o mércores 26 de febreiro para falar do Premio Xerais de Novela 2024 “Detective Ferruchi”, xa que contaremos coa presenza da autora, Marta Villar, o vindeiro 6 de marzo.

Cando escomenza esta historia pensas que é unha novela negra pero a medida que imos avanzando na súa lectura descubrimos que a investigación dun crime é o elemento que permite tratar temas moi diversos da sociedade actual (a emigración, as mulleres que traballaron en cooperativas textís para Inditex, os colectivos minoritarios, a menopausa, o consumismo...). Unha novela con moitos personaxes con personalidades moi diferentes que nos sumerxen no acontecer diario das súas vidas.

Na semana de entroido non podían faltar os doces destas datas: filloas, chulas e orellas endulzaron as nosas conversas.

OS ANOS TRANQUILOS NO CLUB DE LECTURA

No Club de Lectura de Adultas "Ás seis no Seis", continuamos lendo e, para escomenzar o 2025, o mércores 22 de xaneiro, recibimos a visita da escritora Llerena Perozo Porteiro coa que conversamos sobre a súa obra “Os anos tranquilos”.

Llerena fíxonos participes de que a personaxe principal, María García, e de ficción pero tivo moi presente a súa avoa materna, ao comezo da novela, cando nos relata a súa infancia en Asturias e como tivo que fuxir  escapando da guerra.

Ao longo da tarde acompañamos a María García no seu percorrido polos fitos históricos máis importantes que aconteceron no S. XX e dos que foi testemuña aportando a súa ollada crítica e as súas reflexións.

Unha lectura na que o feminismo está presente en toda a historia, en cada acontecemento, suceso... que nos levan a empatizar coa protagonista, incluso cando se toma a xustiza pola man.

Nesta novela a autora reivindica o valor das mulleres fortes e valentes que se sobrepoñen ás adversidades e tentan buscar un futuro e así poder acadar os seus obxectivos.

Como é tradición no noso club non podían faltar os doces caseiros e o café que puxeron o remate a esta xornada tan amena e agradable. Moitas grazas LLerena!!!

ENCONTRO LITERARIO CON LEDICIA COSTAS

“Bruxas e meigas” foron as protagonistas da xuntanza do Club de Lectura “Ás seis no Seis”.

Libros de bruxería, pócemas, velas, un boneco bebé na súa cuna, a mesa camilla, as rosquillas e as revistas de corazón da estancia da bruxa Victoria... foron os distintos elementos cos que quixemos ambientar a biblioteca para o aquelarre literario coa escritora Ledicia Costas e conversar sobre o seu libro “Pel de cordeiro”.

Caracterizadas para ocasión, de negro e en semicírculo acompañanos a Catarina e  a Lola  no seu percorrido pola escuridade e a fantasía.

Ledicia contounos que a novela está moi unida a súa infancia, xa que vivía preto da consulta dunha bruxa e vía en que estado chegaban as persoas e como despois saían tranquilos. Tamén nos explicou a súa fascinación polo mundo da maxia e do alén.

Para documentarse a autora tivo que visitar a diferentes meigas e, moitas desas escenas, están recollidas na historia.

Coma sempre, rematamos coa sinatura dos libros e degustando doces caseiros.

Moitas grazas Ledicia por compartir con nós esta tarde máxica!!!

1ª XUNTANZA CLUB DE LECTURA DE ADULTAS

O luns 14 de outubro, inauguramos unha nova tempada do Club de Lectura de Adultas “Ás seis no Seis”. Este será o noso terceiro ano no que nos reuniremos na biblioteca, unha vez ao mes, para conversar sobre as lecturas escollidas ao longo do curso.

Iniciamos a nosa andaina literaria co último libro da escritora Ledicia Costas, “Pel de cordeiro” xa que contaremos coa presenza da autora o vindeiro mércores 23 de outubro.

Cada unha de nós foi aportando as súas reflexións e opinións sobre as protagonistas, Catarina e Lola, o contexto histórico, a temática (bruxería, erotismo, maternidade...).

Nesta xuntanza non podía faltar o café e os doces caseiros para endulzar as nosas conversas.

Un libro no que Ledicia Costas adéntrase no mundo da fantasía, do medo e dos espíritos, do “alén”, un tema moi presente no seus libros de literatura infantil e xuvenil como “Escarlatina, a cociñeira defunta, Os minimortos, Esmeraldina...”.

A seguinte lectura escollida será “Os anos tranquilos” de LLerena Perozo Porteiro.