GUÍA DE LECTURAS VERÁN 2026

O sol ergue o seu pano dourado e o verán comeza a súa función máis esperada. As rúas énchense de risas, os días fanse longos e o aire trae arrecendo a aventura. É tempo de deixar voar a imaxinación, de facer malabares co tempo libre e de descubrir novas historias que fagan sorrir, soñar e aprender. 

Presentamos a nosa Guía de Lecturas de Verán, unha selección de títulos cheos de fantasía, emoción e aprendizaxe, pensada para acompañar cada momento destas vacacións. 

Cada libro é unha viaxe diferente, unha porta aberta a novas emocións e descubrimentos. Que esta guía sexa o mapa que conduza a momentos inesquecibles de lectura e descanso. 

Bo verán e felices lecturas!

Guía de lecturas verán 2026 de Biblioteca Seis do Nadal

DESPEDIDA DOS CLUBS DE LECTURA

Chegamos ao final dunha nova edición dos Clubs de Lectura, unha experiencia que, unha vez máis, deixounos grandes momentos para recordar. Ao longo do curso, o alumnado participante compartiu lecturas, descubriu novas historias e gozou de encontros nos que os libros foron os verdadeiros protagonistas.

Cada páxina lida abriu a porta a aventuras, emocións e reflexións que enriqueceron esta viaxe lectora. Grazas á curiosidade, ao compromiso e á participación de todos e todas, os Clubs de Lectura convertéronse nun espazo de encontro, diálogo e aprendizaxe.

Para celebrar o remate desta actividade, organizamos unha pequena merenda de convivencia e fixemos entrega dos diplomas e agasallos cos que quixemos agradecer a implicación do alumnado.

Queremos dedicar unha especial despedida ao alumnado de 6º, que inicia unha nova etapa. Levade convosco o hábito lector, a curiosidade por descubrir novas historias e o pracer de seguir aprendendo a través dos libros.

Grazas a todos e todas por formar parte desta aventura. Agora toca descansar, gozar do verán e seguir atopando nos libros novos lugares aos que viaxar.

PECHE DO CLUB DE LECTURA DE ADULTAS

O martes 16 de xuño celebramos o peche a un novo curso do noso Club de Lectura "Ás seis no Seis", nun encontro cheo de emocións, lembranzas e bos momentos compartidos.

Foi unha tarde para mirar atrás e lembrar todo o vivido ao longo destes meses: libros que nos emocionaron, historias que nos fixeron pensar, personaxes que quedaron connosco e conversas que enriqueceron cada encontro. Un ano máis, a lectura converteuse na mellor escusa para compartir experiencias, descubrir novas perspectivas e fortalecer os lazos de amizade entre as integrantes do club.

Durante o encontro fixemos balance da nosa andaina lectora. Coincidimos en que este foi un curso cheo de descubrimentos literarios, de autoras e de historias que nos fixeron viaxar, rir e reflexionar. 

Con ilusión e curiosidade, xa deixamos preparada a selección de lecturas para o primeiro trimestre do curso 26-27. Escolléronse títulos variados, con propostas que prometen emoción, reflexión e moita conversa. O espírito lector segue vivo e con ganas de seguir explorando novos mundos. 

A celebración rematou coa tradicional merenda, un momento distendido no que as risas, as anécdotas e a boa compañía foron as verdadeiras protagonistas. Tamén fixemos entrega de diplomas e pequenos agasallos como mostra de agradecemento pola implicación, a participación e o entusiasmo que cada unha achega ao club.

Grazas a todas por facer de “Ás seis no Seis” moito máis ca un club de lectura: un espazo de encontro, diálogo, aprendizaxe e amizade. Desexámosvos un feliz verán, cheo de boas lecturas, novos descubrimentos e historias inesquecibles.

CONTACONTOS E TEATRO EN INGLÉS

O xoves 4 de xuño o alumnado gozou dunha xornada moi especial en inglés da man de Ariadna Santana, actriz, cómica e cantante. A artista encheu o centro de risas, música e aprendizaxe a través do teatro e dos contos. 

Para o alumnado de Primaria, Ariadna representou a obra "The Magic Tree", unha historia chea de maxia, amizade e aventuras que fixo voar a imaxinación de todos. A través do xogo escénico e da participación activa, o inglés converteuse nunha ferramenta viva e divertida. 

Os máis pequenos e pequenas de Educación Infantil viaxaron con ela nun percorrido titulado "The Lollipop Trip", un contacontos cheo de cores, ritmo e emocións. Cancións, xestos e palabras en inglés mesturáronse para crear unha experiencia sensorial e educativa.

AS FAMILIAS CONTAN

Durante os meses de abril e maio, as familias do Seis participaron activamente na Hora de Ler, achegándose ás aulas e biblioteca para compartir contos co alumnado. Pais, nais, avós e avoas convertéronse en contadores e contadoras de historias, facendo desa hora unha aventura chea de emcoiósn, palabras e imaxinación compartida. 

Cada visita transformou a aula e a biblioteca nun pequeno escenario onde os libros cobraban vida. Houbo contos clásicos, relatos inventados, historias de risa e de soños. O alumnado escoitou, participou e descubriu que ler tamén é un acto de encontro e afecto.

Esta iniciativa, promovida pola biblioteca escolar, reforzou o vínculo entre escola e familia, e fixo da lectura un espazo común de aprendizaxe e pracer. A Hora de Ler converteuse así nun tempo máxico onde as voces das familias fixeron vibrar as páxinas dos libros. 

Queremos agradecer a todas as familias que nos acompañastes durante estes meses, compartindo connosco esas lecturas que tanto desfrutamos e que nos permitiron pasar momentos  moi agradables e cheos de complicidade. Grazas por participar nesta fermosa experiencia. Agardámosvos no vindeiro curso!

LECTURAS COMPARTIDAS NA BOUZA

O 5 de xuño foi un día moi especial: o alumnado de 1º da ESO do IES Alexandre Bóveda e os nenos e nenas de tres anos do CEIP Plurilingüe Seis do Nadal compartiron unha fermosa xornada de lectura na Bouza.

Os maiores convertéronse en contadores e contadoras de historias, enchendo o espazo de palabras máxicas e aventuras que fixeron voar a imaxinación dos máis pequenos e pequenas. Cada conto foi unha viaxe compartida, un momento de encontro entre dous mundos que se miraban con curiosidade e tenrura.

A alegría estivo presente en cada sorriso, en cada ollada de sorpresa e en cada páxina lida con ilusión. Despois das lecturas, chegou o tempo do xogo: risas, carreiras e complicidade no parque. 

O peche da xornada trouxo agasallos, abrazos e unha foto de grupo que gardará para sempre a lembranza deste día. Unha experiencia que uniu xeracións a través da maxia dos contos e da alegría de compartir.

CELEBRANDO AS LETRAS GALEGAS

Celebramos o Mes das Letras Galegas cunha programación chea de música, cor e palabras. As actividades foron organizadas polos Equipos de Dinamización da Lingua Galega, Biblioteca e Música, que uniron esforzos para homenaxear a autora escollida este ano: Begoña Caamaño.

Durante o mes, o alumnado participou en diferentes propostas creativas. Pintouse a bandeira galega, realizáronse investigacións sobre a vida e obra de Begoña Caamaño, elaboráronse debuxos inspirados nos seus libros, programas de radio…

Un dos momentos máis especiais foi a visita da cantante Uxía Senlle, coa que o alumnado tivo a oportunidade de cantar “Begoñísima”, unha peza que encheu o centro de emoción e orgullo pola lingua e pola cultura galega.

Como colofón, todas as aulas participaron na creación dun mural colectivo inspirado no libro "Begoñísima", de Andrea Nunes, da editorial Cuarto de Inverno. Cada grupo elaborou diferentes elementos da obra, que se uniron nun gran traballo común. O resultado foi unha composición chea de simbolismo, creatividade e espírito de comunidade.

O Mes das Letras Galegas foi unha celebración compartida, un espazo para descubrir, cantar e crear en galego, mantendo viva a palabra e o legado de Begoña Caamaño.

ANIMACIÓN LECTORA CON PACO NOGUEIRAS

O alumnado de Educación Infantil gozou dunha fantástica animación lectora con Paco Nogueiras.

Coma sempre, Paco chegou coa súa inseparable maleta chea de contos e música, disposto a encher a biblioteca de risas, ritmo e imaxinación. Acompañado do seu acordeón e ukelele, fixo soar  historias tan fermosas como "Flores, Unha eiruga moi larpeira, Non é unha caixa é unha cidade e A banda que ninguén coñece". 

Cada conto converteuse nun pequeno espectáculo onde as  palabras, as rimas e as cancións se mesturaron para crear un ambiente máxico e cheo de alegría. O alumnado participou con entusiamo, cantando, movéndose e deixando voar a súa fantasía.

Grazas a Paco Nogueiras e á Editorial Kalandraka por facer posible esta experiencia e por seguir sementando o amor polos libros e pola lectura!

XABIER DOMÍNGUEZ CO CLUB DE LECTURA DE 5º

O Club de Lectura de 5º de Primaria celebrou un encontro co escritor Xabier Domínguez, autor do libro "Maxia de pedra". A actividade foi unha oportunidade para conversar sobre unha historia chea de maxia, intriga e acción, que nos transporta á Galicia castrexa e á época da romanización. 

Durante o encontro, o alumnado presentou os traballos realizados sobre os petroglifos, un dos elementos centrais da obra, e formulou numerosas preguntas ao autor. Xabier respondeu moi amablemente, compartindo curiosidades sobre o proceso de creación e sobre os personaxes. Contounos que o nome da protagonista, Anxela, é tamén o da súa filla, e confesou que, se tivese que escribir de novo a historia, faría algúns cambios para darlle outro enfoque.

A conversa permitiu afondar nos temas principais da novela: a relación entre pai e filla, a importancia da arqueoloxía para coñecer o noso pasado histórico, a posta en valor do patrimonio cultural e natural galego e o coidado do medio ambiente como responsabilidade colectiva.

O autor explicou tamén que escolleu un gato con tres colas porque é a figura que mellor representa o misterio e a fantasía, símbolo da maxia que impregna toda a historia.

“Maxia de pedra” é unha obra cun enfoque didáctico e pedagóxico, que achega ao alumnado á prehistoria e á romanización en Galicia dun xeito ameno e atractivo. 

A través da lectura e da conversa co autor, o Club de Lectura puido descubrir como a literatura pode ser unha ponte entre a imaxinación e o coñecemento do noso patrimonio arqueolóxico e medioambiental.

O GRAN CIRCO DAS PALABRAS

O martes 19 de maio, Eva Mejuto compartiu co alumnado de 2º de Primaria unha sesión arredor do seu libro "O gran Circo das Palabras".

Durante o encontro, Eva explicou que a inspiración para escribir esta historia naceu da súa preocupación polo trato que reciben os animais nalgúns circos. Por iso decidiu crear un circo diferente, un espazo cheo de liberdade e creatividade, onde os animais puidesen facer o que máis lles apaixona: contar contos, bailar, tocar instrumentos, ler ou actuar. Un circo máxico, artístico e poético!

As ilustracións de Fernando Martín deron vida a este universo cheo de cor e movemento, convertendo cada páxina nun pequeno espectáculo visual.

O alumnado aceptou o reto que aparece ao final do libro: inventar o seu propio conto para representar. Cada grupo inventou unha parte da historia, fixo as súas ilustracións e presentoullas a Eva, que quedou encantada coa creatividade e o entusiasmo de todos e todas. Ademais, elaboraron un knolling literario, escollendo obxectos que simbolizaban o espírito do libro e organizándoos con moito coidado.

Eva rematou asinando os exemplares dos libros, deixando un recordo cheo de ilusión, imaxinación e amor pola lectura.

ENCONTRO LITERARIO CON ABRIL CAMINO

O mércores 20 de maio, os Clubs de Lectura do Ceip Plurilingüe Seis do Nadal e do IES Alexandre Bóveda reuníronse para compartir unha xornada literaria con Abril Camino, autora de “Mulleres que viven xuntas”, obra gañadora do XLII Premio Xerais de Novela 2025.

A novela lévanos á Galicia do franquismo para achegarnos ás vidas de Isabel e Chus, dúas mulleres obrigadas a vivir o seu amor nun tempo de silencios, medos e renuncias. É unha historia que rende homenaxe a todas esas vidas ocultas que durante moito tempo non tiveron voz na literatura nin na sociedade. 

Durante o encontro, Abril compartiu con nós como xurdiu a idea de escribir este libro: a partir dunha conversa coa súa nai sobre aquelas mulleres solteiras que vivían con outra muller e que, sen decilo abertamente, compartían vida e afectos.

A autora contou que quería escribir unha historia breve, polo que hai pouca descripción dos personaxes deixándoa á imaxinación do lector/lectora. Tamén explicou que o personaxe de Chus foi medrando ata converterse na verdadeira voz da memoria. Tiña claro que Isabel debía emigrar a Londres, unha cidade aberta e cosmopolita nos anos sesenta, símbolo de liberdade que en Galicia lles era negada.

Falouse dos grandes temas que atravesan a novela: a memoria histórica, a represión social, a emigración e a necesidade de vivir con autenticidade.

Abril explicou como o relato alterna dous tempos narrativos para reconstruír os cincuenta anos de vida compartida entre Chus e Isabel. O pasado aparece narrado en terceira persoa, ofrecendo unha viaxe polos antecedentes familiares, a marcha de Isabel a Londres e o nacemento da relación entre ambas. O presente, en cambio, está contado en primeira persoa por Chus, nos momentos previos ao enterro de Isabel, converténdose nun espazo de dor, nostalxia e lembranza.

Grazas, Abril, por este encontro onde a literatura, a memoria e as emocións déronse a man!

VISITA DE EVA MEJUTO

O alumnado de 4ºB esperaba con moita ilusión a chegada de Eva Mejuto, autora do libro "Queco e Kika". O martes 19 de maio foi un día moi especial, pois por fin puideron  coñecela en persoa e conversar con ela sobre o seu traballo.

Durante a entrevista, Eva compartiu con gran entusiasmo  a súa inspiración para crear a historia, explicou o seu proceso creativo e contou como é o traballo editorial que se agocha detrás de cada libro. Compartiu, tamén anécdotas divertidas e adiantou algunas pistas sobre os proxectos que está a preparar, o que espertou moita interese entre o alumnado.

“Queco e Kika" é unha historia chea de humor e de amor, na que se exploran valores tan importantes como a diversidade afectivo-sexual, a empatía, a familia escollida, o coidados dos animais, a aceptación das diferenzas e a tolerancia. Estes temas inspiraron ao grupo para crear fermosas ilustracións cheas de cor, imaxinación e sentimento. 

Con todas esas creacións elaboraron un mural de benvida para recibir a autora, que quedou marabillada co resultado. Ademais, Eva recibiu os debuxos como agasallo, un detalle que a fixo sorrir con emoción.

O encontro rematou cun momento moi especial: a sinatura dos exemplares do libro, deixando un recordo inesquecible dunha visita chea de emoción e aprendizaxe .

ROTEIRO LITERARIO CON PEDRO FEIJOO

O luns 18 de maio, os Clubs de Lectura do CEIP Plurilingüe Seis do Nadal e do CEIP Alfonso Daniel R. Castelao compartimos unha xornada moi especial co escritor Pedro Feijoo, autor do libro “Pequena historia de Vigo”, que condensa séculos de historia da cidade en formato cómic. Guiados polas súas palabras emprendemos un roteiro literario polos recunchos máis emblemáticos e cheos de memoria da nosa cidade. 

O percorrido comezou nas ruínas do Castelo de San Sebastián, situadas xusto detrás da torre do Concello. Desde alí puidemos gozar das vistas da cidade, imaxinando como sería aquel Vigo antigo que o libro nos axuda a reconstruír.

A seguinte parada foi o Banco dos Contos, que non serviu para narrar historias. Alí, segundo nos contou Pedro, os comerciantes sentaban para facer as contas das vendas dos seus produtos.

Paseamos pola cidade vella, reparando nos edificios e construcións que agochan segredos e historias. 

Na Porta do Sol detivémonos diante do edificio construido por Pacewicz, buscando na súa fachada a data de construción: 1902. Alí tamén coñecemos un detalle sorprendente: as marcas dos impactos da Guerra Civil que aínda se conservan na pedra. Un recordo  visible dun tempo escuro que nos convida a reflexionar sobre a memoria.

Na praza da Constitución, xogamos a atopar un reloxo de sol agochado entre os edificios, e na praza da Colexiata, Pedro aproveitou para falarnos da Oliveira, símbolo da cidade e testemuña silenciosa da súa historia.

O roteiro continuou ata a casa onde estaba a imprentade Juan  Compañel, que non é a que ten a placa visible, senón outra vivenda próxima. Alí atopamos unha indicación coa cita de Pedro Feijoo sobre o momento no que se imprimiu "Cantares Gallegos", o 17 de maio de 1863. Nesa mesma casa viviu Rosalía de Castro durante un tempo da súa estancia en Vigo, un feito que nos encheu de orgullo e emoción.

Ao rematar o percorrido, Pedro Feijoo lembrounos que está nas nosas mans contar todo o que vimos para que non se perda, e que as novas xeracións temos a responsabilidade de conservar a nosa memoria.

Foi un día cheo de aprendizaxe, historia e literatura, na que descubrimos que Vigo agocha relatos en cada recuncho. Grazas a Pedro por facernos mirar Vigo con outros ollos e por compartir connosco a súa paixón pola cidade.