VISÍTANOS UXÍA SENLLE

O martes 26 de maio recibimos no noso centro a Uxía Senlle, que nos presentou temas do seu proxecto "Indómitas. Nove ondas a Begoña Caamaño". Este libro-disco é unha homenaxe á escritora e xornalista Begoña Caamaño, figura das Letras Galegas 2026.

Definido pola propia autora como "unha carta íntima de amizade, memoria e gratitude", o proxecto combina música e literatura para reivindicar a memoria, a amizade e a liberdade das mulleres. 

Durante a actuación, Uxía estivo acompañada pola súa irmá Ana Senlle, e tamén participaron as Cantareiras do Seis, que puxeron voz e emoción a esta celebración tan especial.

O momento máis emocionante chegou cando todo o alumnado e profesorado presentes no ximnasio unimos as nosas voces para cantar "Begoñísima", enchendo o espazo de música, lembranza e alegría compartida. 

Foi unha xornada inesquecible na que celebramos a palabra, a música e a memoria de Begoña Caamaño, unha muller indómita que segue a inspirar ás novas xeracións.

XABIER DOMÍNGUEZ CO CLUB DE LECTURA DE 5º

O Club de Lectura de 5º de Primaria celebrou un encontro co escritor Xabier Domínguez, autor do libro "Maxia de pedra". A actividade foi unha oportunidade para conversar sobre unha historia chea de maxia, intriga e acción, que nos transporta á Galicia castrexa e á época da romanización. 

Durante o encontro, o alumnado presentou os traballos realizados sobre os petroglifos, un dos elementos centrais da obra, e formulou numerosas preguntas ao autor. Xabier respondeu moi amablemente, compartindo curiosidades sobre o proceso de creación e sobre os personaxes. Contounos que o nome da protagonista, Anxela, é tamén o da súa filla, e confesou que, se tivese que escribir de novo a historia, faría algúns cambios para darlle outro enfoque.

A conversa permitiu afondar nos temas principais da novela: a relación entre pai e filla, a importancia da arqueoloxía para coñecer o noso pasado histórico, a posta en valor do patrimonio cultural e natural galego e o coidado do medio ambiente como responsabilidade colectiva.

O autor explicou tamén que escolleu un gato con tres colas porque é a figura que mellor representa o misterio e a fantasía, símbolo da maxia que impregna toda a historia.

“Maxia de pedra” é unha obra cun enfoque didáctico e pedagóxico, que achega ao alumnado á prehistoria e á romanización en Galicia dun xeito ameno e atractivo. 

A través da lectura e da conversa co autor, o Club de Lectura puido descubrir como a literatura pode ser unha ponte entre a imaxinación e o coñecemento do noso patrimonio arqueolóxico e medioambiental.

O GRAN CIRCO DAS PALABRAS

O martes 19 de maio, Eva Mejuto compartiu co alumnado de 2º de Primaria unha sesión arredor do seu libro "O gran Circo das Palabras".

Durante o encontro, Eva explicou que a inspiración para escribir esta historia naceu da súa preocupación polo trato que reciben os animais nalgúns circos. Por iso decidiu crear un circo diferente, un espazo cheo de liberdade e creatividade, onde os animais puidesen facer o que máis lles apaixona: contar contos, bailar, tocar instrumentos, ler ou actuar. Un circo máxico, artístico e poético!

As ilustracións de Fernando Martín deron vida a este universo cheo de cor e movemento, convertendo cada páxina nun pequeno espectáculo visual.

O alumnado aceptou o reto que aparece ao final do libro: inventar o seu propio conto para representar. Cada grupo inventou unha parte da historia, fixo as súas ilustracións e presentoullas a Eva, que quedou encantada coa creatividade e o entusiasmo de todos e todas. Ademais, elaboraron un knolling literario, escollendo obxectos que simbolizaban o espírito do libro e organizándoos con moito coidado.

Eva rematou asinando os exemplares dos libros, deixando un recordo cheo de ilusión, imaxinación e amor pola lectura.

ENCONTRO LITERARIO CON ABRIL CAMINO

O mércores 20 de maio, os Clubs de Lectura do Ceip Plurilingüe Seis do Nadal e do IES Alexandre Bóveda reuníronse para compartir unha xornada literaria con Abril Camino, autora de “Mulleres que viven xuntas”, obra gañadora do XLII Premio Xerais de Novela 2025.

A novela lévanos á Galicia do franquismo para achegarnos ás vidas de Isabel e Chus, dúas mulleres obrigadas a vivir o seu amor nun tempo de silencios, medos e renuncias. É unha historia que rende homenaxe a todas esas vidas ocultas que durante moito tempo non tiveron voz na literatura nin na sociedade. 

Durante o encontro, Abril compartiu con nós como xurdiu a idea de escribir este libro: a partir dunha conversa coa súa nai sobre aquelas mulleres solteiras que vivían con outra muller e que, sen decilo abertamente, compartían vida e afectos.

A autora contou que quería escribir unha historia breve, polo que hai pouca descripción dos personaxes deixándoa á imaxinación do lector/lectora. Tamén explicou que o personaxe de Chus foi medrando ata converterse na verdadeira voz da memoria. Tiña claro que Isabel debía emigrar a Londres, unha cidade aberta e cosmopolita nos anos sesenta, símbolo de liberdade que en Galicia lles era negada.

Falouse dos grandes temas que atravesan a novela: a memoria histórica, a represión social, a emigración e a necesidade de vivir con autenticidade.

Abril explicou como o relato alterna dous tempos narrativos para reconstruír os cincuenta anos de vida compartida entre Chus e Isabel. O pasado aparece narrado en terceira persoa, ofrecendo unha viaxe polos antecedentes familiares, a marcha de Isabel a Londres e o nacemento da relación entre ambas. O presente, en cambio, está contado en primeira persoa por Chus, nos momentos previos ao enterro de Isabel, converténdose nun espazo de dor, nostalxia e lembranza.

Grazas, Abril, por este encontro onde a literatura, a memoria e as emocións déronse a man!

VISITA DE EVA MEJUTO

O alumnado de 4ºB esperaba con moita ilusión a chegada de Eva Mejuto, autora do libro "Queco e Kika". O martes 19 de maio foi un día moi especial, pois por fin puideron  coñecela en persoa e conversar con ela sobre o seu traballo.

Durante a entrevista, Eva compartiu con gran entusiasmo  a súa inspiración para crear a historia, explicou o seu proceso creativo e contou como é o traballo editorial que se agocha detrás de cada libro. Compartiu, tamén anécdotas divertidas e adiantou algunas pistas sobre os proxectos que está a preparar, o que espertou moita interese entre o alumnado.

“Queco e Kika" é unha historia chea de humor e de amor, na que se exploran valores tan importantes como a diversidade afectivo-sexual, a empatía, a familia escollida, o coidados dos animais, a aceptación das diferenzas e a tolerancia. Estes temas inspiraron ao grupo para crear fermosas ilustracións cheas de cor, imaxinación e sentimento. 

Con todas esas creacións elaboraron un mural de benvida para recibir a autora, que quedou marabillada co resultado. Ademais, Eva recibiu os debuxos como agasallo, un detalle que a fixo sorrir con emoción.

O encontro rematou cun momento moi especial: a sinatura dos exemplares do libro, deixando un recordo inesquecible dunha visita chea de emoción e aprendizaxe .

ROTEIRO LITERARIO CON PEDRO FEIJOO

O luns 18 de maio, os Clubs de Lectura do CEIP Plurilingüe Seis do Nadal e do CEIP Alfonso Daniel R. Castelao compartimos unha xornada moi especial co escritor Pedro Feijoo, autor do libro “Pequena historia de Vigo”, que condensa séculos de historia da cidade en formato cómic. Guiados polas súas palabras emprendemos un roteiro literario polos recunchos máis emblemáticos e cheos de memoria da nosa cidade. 

O percorrido comezou nas ruínas do Castelo de San Sebastián, situadas xusto detrás da torre do Concello. Desde alí puidemos gozar das vistas da cidade, imaxinando como sería aquel Vigo antigo que o libro nos axuda a reconstruír.

A seguinte parada foi o Banco dos Contos, que non serviu para narrar historias. Alí, segundo nos contou Pedro, os comerciantes sentaban para facer as contas das vendas dos seus produtos.

Paseamos pola cidade vella, reparando nos edificios e construcións que agochan segredos e historias. 

Na Porta do Sol detivémonos diante do edificio construido por Pacewicz, buscando na súa fachada a data de construción: 1902. Alí tamén coñecemos un detalle sorprendente: as marcas dos impactos da Guerra Civil que aínda se conservan na pedra. Un recordo  visible dun tempo escuro que nos convida a reflexionar sobre a memoria.

Na praza da Constitución, xogamos a atopar un reloxo de sol agochado entre os edificios, e na praza da Colexiata, Pedro aproveitou para falarnos da Oliveira, símbolo da cidade e testemuña silenciosa da súa historia.

O roteiro continuou ata a casa onde estaba a imprentade Juan  Compañel, que non é a que ten a placa visible, senón outra vivenda próxima. Alí atopamos unha indicación coa cita de Pedro Feijoo sobre o momento no que se imprimiu "Cantares Gallegos", o 17 de maio de 1863. Nesa mesma casa viviu Rosalía de Castro durante un tempo da súa estancia en Vigo, un feito que nos encheu de orgullo e emoción.

Ao rematar o percorrido, Pedro Feijoo lembrounos que está nas nosas mans contar todo o que vimos para que non se perda, e que as novas xeracións temos a responsabilidade de conservar a nosa memoria.

Foi un día cheo de aprendizaxe, historia e literatura, na que descubrimos que Vigo agocha relatos en cada recuncho. Grazas a Pedro por facernos mirar Vigo con outros ollos e por compartir connosco a súa paixón pola cidade.

IRIA MISA E " A EXCURSIÓN A CANS"

O 13 de maio, o alumnado de 5º de Primaria recibiu a visita da escritora Iria Misa, autora do libro “A excursión a Cans. Unha veciña de película”.

Tras unha pequena presentación de benvida,  Iria foi convidada a visionar os vídeos que o alumnado gravara inspirándose na súa obra. Como recordo, entregáronlle un díptico con códigos QR que permiten acceder a eses vídeos, elaborados con moita creatividade e entusiamo.

Durante o encontro, Iria contou que este libro naceu como un encargo do Festival de Cans, co obxectivo de achegar este evento rural e cinematográfico aos lectores e lectoras máis novos. 

 

A protagonista, Alice, leva ese nome en homenaxe á pioneira cineasta Alice Guy, e xa aparecía no anterior libro da autora "Unha veciña de película". Nesta nova aventura, Alice e os  xemelgos Elsie e Simón viaxan literalmente polo interior das curtametraxes que se proxectan en Cans, vivindo experiencias cheas de imaxinación e aprendizaxe.

A autora explicou tamén como aproveitou este recurso narrativo para introducir obras reais premiadas ou proxectadas no festival, para amosar o proceso de creación detrás das cámaras. Non faltaron tampouco os elementos icónicos do festival, como os chimpíns, os jalpóns  ou o Torreiro das Estrelas, que dan identidade a esta celebración tan especial. 

O alumnado participou activamente, facendo preguntas sobre o proceso creativo, os personaxes e as ideas que inspiran á autora, e descubrindo moitos segredos sobre o mundo do cinema e da escrita. A temática do libro permitiu reflexionar sobre a amizade, a comprensión mútua e a irmandade, ademais de coñecer máis de preto o Festival de Cans. 

A xornada rematou cun momento moi especial: Iria Misa asinou os exemplares do seu libro, deixando unha lembranza inesquecible desta visita inspiradora. 

Grazas, Iria, pola túa visita e por compartir connosco a maxia das túas historias!

ANXO FARIÑA E "A ESCOLA ROBOT"

O mércores 6 de maio o alumnado de 4º de Primaria tivo a sorte de recibir a visita do escritor e ilustrador Anxo Fariña, autor do libro "A Escola Robot". 

Durante a charla, Anxo Fariña explicou como xurdiu a idea do libro e cales foron as súas principais inspiracións, entre elas a súa paixón pola tecnoloxía e polos robots. O alumnado puido descubrir así non só a historia que se agocha nas páxinas de "A Escola Robot", senón tamén todo o proceso creativo que hai detrás dela: desde a primeira idea ata o resultado final. 

O autor compartiu tamén o seu traballo como ilustrador, amosando diferentes robots e personaxes do libro, así como outros debuxos inéditos. Un dos momentos máis emocionantes chegou cando realizou un debuxo en directo: escolleu a unha alumna e transformouna nun personaxe da Escola Robot, explicando paso a paso como dar vida a calquera idea a través do debuxo. 

O alumnado tamén tivo o seu protagonismo, xa que puido ensinar ao autor os seus propios traballos. Ao longo do curso crearon robots inspirados no libro e mesmo xogaron cun tale-bot nun taboleiro con ilustracións da historia. Anxo Fariña admirou as súas creacións e felicitounos polo seu entusiasmo e imaxinación.

A actividade foi moi participativa e chea de curiosidade. O escritor respondeu con atención a todas as preguntas e, para rematar, asinou exemplares do libro, deixando un recordo especial desta xornada.

Foi, sen dúbida, unha experiencia enriquecedora e inspiradora, que permitiu coñecer mellor o libro e achegarse ao traballo do seu autor dun xeito próximo, creativo e cheo de ilusión.

OLAIA SENDÓN E "A CASA GRANDE"

O luns 27 de abril os Clubs de Lectura do CEIP Plurilingüe Seis do Nadal e do IES Alexandre Bóveda compartiron un encontro literario coa escritora Olaia Sendón para conversar arredor da súa novela “A casa grande”, finalista do Premio Xerais 2025.

“A casa grande” é unha obra que non só se le, senón que se habita. Abriunos a porta a un territorio que todas recoñecemos: o da memoria, o das herdanzas e o dos silencios que fican entre as paredes de calquera fogar familiar.

A historia non é autobiográfica, mais parte desa emoción compartida que xorde cando o pasado familiar se converte en materia literaria.

Na novela, os obxectos teñen vida propia. Levan a pegada de quen os habitou e gardan as historias que outros deixaron atrás. Por iso, Olaia dedícalles varios capítulos: o álbum secreto, a foto, o secreter, a mesa de caoba, os rubís. Cada un deles convértese nun fío que une xeracións e recordos.

A casa que dá título á novela é real, situada en Corcubión, e serve de escenario para un relato que alterna presente e pasado cunha linguaxe sinxela e envolvente. A autora opta por ofrecer poucas descricións físicas dos personaxes, para que cada lector/lectora poida imaxinarlles o rostro e a presenza.

Durante o encontro, entregámoslle a Olaia un álbum coas fotos do noso Knolling literario, composto con obxectos e elementos significativos da historia.

Rematamos construíndo a nosa propia casa grande da lectura a partir de palabras que nos acompañarán sempre: memoria, fogar, silencio, familia, pasado, identidade, lembranzas, pertenza, conflito, esperanza.

Olaia asinou os exemplares cunha ilustración personalizada, deixando en cada unha de nós unha pegada única e o recordo dun encontro cheo de emoción e literatura compartida.

ENCONTRO CON LUCÍA MOJÓN

O xoves 30 de abril, o alumnado de 1º desfrutou coa visita de Lucía Mojón, que compartiu un contacontos sobre o seu libro “Biscoito de castañas”.

Trátase dun divertido álbum ilustrado que nos lembra o valor da imaxinación, dos momentos compartidos en familia, das receitas de cociña e da sabedoría dos nosos maiores. 

Unha aventura arredor dunha tarde de outono, unhas castañas desaparecidas e unha viaxe polo noso magosto e as lendas que o acompañan.

O alumnado pasouno xenial, participou, bailou e fixo os sons que aparecen na historia. Tamén lle fixeron preguntas  á autora.

O remate, Lucía asinou os exemplares do libro mentras recibía con ilusión os debuxos que o alumnado elaborou inspirándose na obra. Grazas, Lucía, pola túa visita!

OLAIA SENDÓN E "O PIRATA BRUNO"

O luns 27 de abril recibimos, un curso máis, a visita de Olaia Sendón, quen mantivo un encontro moi especial co alumnado de 2º de Primaria para conversar sobre o seu libro "O pirata Bruno". 

Trátase dun texto cheo de ritmo e xogos sonoros que combina a narrativa de aventuras coa divulgación do patrimonio marítimo galego. A historia non é só a viaxe de Bruno, un neno nacido nunha illa cuxa vida dá un xiro inesperado ao atoparse cun barco pirata, senón tamén unha porta aberta ao mundo da navegación e da cultura mariñeira. 

A través da lectura, os nenos e nenas descobren o mar desde unha perspectiva lúdica e educativa, grazas a un glosario de léxico mariñeiro que introduce termos técnicos do mar e un apartado interactivo sobre os faros de Galicia- como a Torre de Hércules, o Faro Vilán- que invita a identificalos e coñecelos mellor. 

Durante o encontro, Olaia contou que decidiu escribir esta historia porque os seus fillos pasaron unha etapa na que lles fascinaban os piratas, e porque o mar e a auga son elementos fundamentais para ela, fontes de inspiración e orde nas súas ideas creativas.

Compartiu tamén detalles do seu proceso creativo, explicando que gozou moito escribindo e ilustrando o libro, un traballo que lle levou todo un verán (2019) e que finalmente se publicou no 2025. As ilustracións, moi chamativas, están realizadas con só tres cores -vermello, negro e branco-, o que lles dá unha forza visual moi especial.

O alumnado participou con entusiasmo, formulando preguntas e amosando os marcapáxinas que elaboraron inspirándose na lectura e nas ilustracións do libro. 

O encontro rematou cun momento moi emotivo: Olaia asinou os exemplares e fixo dedicatorias personalizadas a cada neno e nena, deixando un recordo inesquecible. 

Moitas grazas, Olaia, pola túa visita e por inspirar ao noso alumnado coa túa creatividade e amor polo mar.