XVIII XORNADA DOS CLUBS DE LECTURA

Mañá 29 de abril, celebrarase no Palacio de Congresos e Exposicións de Galicia, en Santiago de Compostela, a reunión anual do profesorado que coordina os clubs de lectura dos centros que participan no programa de Clubs de Lectura, da Consellería de Educación, Ciencia, Universidades e Formación Profesional.

Esta XVIII Xornada dos Clubs de Lectura reunirá a arredor de 600 persoas, entre participantes, relatores e persoas asesoras de formación do profesorado. 

Entregarase, así mesmo, o Premio dos Clubs de Lectura 2026, que desta vez recaeu no escritor Manuel Rivas por ser o autor galego máis lido nos clubs de lectura no curso 2024/2025.

Comezará a xornada cunha conversa virtual co autor premiado, continuaremos coa intervención do mediador e coordinador do Premio Mandarache Alberto Soler, disfrutaremos dunha conversa arredor doutros clubs de lectura en librarías e bibliotecas públicas e unha charla sobre clubs de lectura fácil. Pola tarde teremos sesións simultáneas coa experiencia de nove centros integrados no programa e a presentación da plataforma M8 por ler. O peche da xornada dará voz ás persoas que participan nos clubs de lectura. 

FONTE: BIBLIOTECAS ESCOLARES

DÍA MUNDIAL DO LIBRO 2026

Hoxe 23 de abril, celebramos o Día Mundial do Libro e do Dereito de Autor. É unha ocasión especial recoñecida pola UNESCO para homenaxear a importancia dos libros e dos dereitos de autor. 

Para conmemorar esta data, a Consellería de Educación, Ciencia, Universidades e Formación Profesional editou un cartel especial.

Acudiuse a unha persoa referente da literatura galega, neste caso á Doutora en Xornalismo, escritora e xestora cultural EVA MEJUTO, recoñecida polo lectorado infantil e xuvenil galego co Premio de Clubs de Lectura 2021.

Un fermoso agasallo para as bibliotecas escolares de Galicia que convida a celebrar o libro e a lectura:

Postal Día do Libro 2026

FONTE: BIBLIOTECAS ESCOLARES

PASAPORTES LECTORES E LECTÓMETRO

O Pasaporte Lector é coma o billete de entrada a un circo de aventuras literarias. Nel, cada neno e nena vai gardando os seus mellores trucos: os traballos que realizan despois de ler cada libro. Un recordo de todas as súas viaxes a través das súas páxinas a mundo incribles.

Nos Pasaportes Lectores, atopamos unha gran variedade de números circenses literarios: caligramas, escrita creativa, debuxos, resumos, opinións…

E moitos outros traballos que demostran o talento de cada artista! Sigamos enchendo estes pasaportes con aventuras, sorrisos e moita diversión. Que o espectáculo continúe!

Co obxectivo de motivar e rexistrar o tempo que dedican a lectura empregamos o lectómetro, un gráfico que se enche a medida que se len a lista de desafíos de lectura plantexados para todo o curso.

No noso circo lector, os nenos e nenas son as estrelas do espectáculo! Co obxectivo de motivar e rexistrar o tempo que dedican á lectura, utilizan o lectómetro: un gráfico que se vai enchendo cada vez que len un libro e completan os desafíos de lectura do curso. Así, entre saltos de palabras e malabares de historias, van avanzando e celebrando cada logro da súa xira de libros.

DÍA DO CÓMIC E DO TEBEO

O Día do Cómic e do Tebeo é unha celebración  que pretende recoñecer o valor do cómic e do tebeo, o peso da súa historia e a súa importancia no contexto actual, a súa diversidade, creatividade e calidade.

A autora do cartel deste ano é a ilustradora Candela Sierra, Premio Nacional do Cómic 2025.

O Grupo de Traballo "Comictecas" do Consello de Cooperación Bibliotecaria, do que forman parte as bibliotecas escolares de Galicia, presentou o ano pasado unha publicación para celebrar esta data: "Cómic. 50 recomendacións para bibliotecas".

FONTE: BIBLIOTECAS ESCOLARES

ENCONTRO PLAMBE 2026

O vindeiro 5 de marzo asistiremos ao Encontro do Plan de mellora de bibliotecas escolares correspondentes ao curso 2025/2026, con intervención de persoas expertas en diversos ámbitos relacionados coa lectura, a literatura e o deseño e a literatura galega. Ademais, presentarase o novo portal de Bibliotecas Escolares de Galicia.

Completan a xornada un total de 16 experiencias de centros de moi diverso contido (funcionamento da biblioteca escolar, traballo por proxectos, voluntariado, radio, redes e bibliotecas do rural).

Un espazo de encontro, das máis de 900 persoas coordinadoras, no que as bibliotecas escolares deseñan o seu traballo, un ano máis!.

PROGRAMA

FONTE: BIBLIOTECAS ESCOLARES

XORNADA DE BIBLIOTECA CREATIVA 2026

O 28 de xaneiro asistiremos na EGAP á Xornada de Biblioteca Creativa que reunirá ás 211 persoas coordinadoras deste programa.

Inaugurará a xornada Manuel Rodríguez Calviño, abordando o valor das tecedoras como escritoras de historias, continuando con obradoiros simultáneos de escornabots, banda deseñada, colaxe, ficción dixital, creación, imprenta creativa, deseñar xogando e mapas téxtiles. Pecharán as experiencias de catro centros falando da evolución e desenvolvemento dos espazos creativos das súas bibliotecas.

PROGRAMA

FONTE: BIBLIOTECAS ESCOLARES

CALENDARIO DO LIBRO E DA LECTURA 2026

Calendario do Libro e da Lectura de Galicia 2026, coas datas, efemérides e conmemoracións máis salientables sobre os libros e a lectura.

As ilustracións son obra da ilustradora Lidia Cao.

O obxectivo deste calendario é fomentar a lectura e a normalización da presenza do libro en todos os sectores da sociedade. Trátase dunha ferramenta fundamental para a dinamización cultural e para difundir figuras senlleiras e datas claves da nosa cultura.

Pretende impulsar entre a cidadanía as actividades culturais arredor das 35 principais efemérides repartidas ao longo de todos os meses do 2026 ao redor das que se organizan distintas propostas.

Entre outras conmemoracións, celebramos

-Día da Ilustración (30 de xaneiro), homenaxeando ao humorista gráfico Siro López.

-Día das Artes Galegas (1 de abril), homenaxeando ao fotógrafo José Suárez.

-Día das Letras Galegas (17 de maio) que xirará ao redor da escritora Begoña Caamaño.

-Día da Lectura (3 de novembro), coincidindo co aniversario do nacemento de Xosé Neira Vilas.

-Día do Patrimonio Inmaterial (17 de outubro) e o Día da corrección de textos (27 de outubro) e o 22 de novembro, Día da música.

Neste ano 2026 destaca a conmemoración do Ano Oteriano tras a declaración oficial do Parlamento de Galicia co gallo de cumprirse o cincuenta aniversario do pasamento de Ramón Otero Pedrayo figura esencial das nosas Letras. 

Preme na imaxe para acceder ao documento en pdf.

XORNADA DE BIBLIOTECAS ESCOLARES 2025

O sábado 15 de novembro asistiremos a Xornada de Bibliotecas Escolares de Galicia 2025.

Daranse cita equipos de biblioteca, docentes, asesores/as dos centros de formación do profesorado e persoas expertas na temática do lema deste curso "Biblioteca escolar + Deseño = Viaxe á creatividade".

Unha xuntanza que falará de competencia e prácticas lectoras, libros, deseño, a colección, a planificación do traballo nas nosas bibliotecas, a alfabetización informacional...

Será, novamente, unha ocasión para o encontro entre o profesorado deste amplo colectivo de docentes que poñen en pé as bibliotecas escolares galegas, o reforzo de vínculos persoais e profesionais e, con toda seguridade, o comezo de novas colaboracións para o presente curso.

Programa

FONTE: BIBLIOTECAS ESCOLARES

DÍA DAS BIBLIOTECAS 2025

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administración autonómicas.

A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2025. 

O lema deste ano, “Contra a desinformación: bibliotecas”, pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.

As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas. 

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio, lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que pon en contacto con ese outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.

FONTE: BIBLIOTECAS ESCOLARES

VIAXE Á CREATIVIDADE

Un curso máis abrímoslle a porta á creatividade nas bibliotecas escolares, deste volta a través do DESEÑO.

O deseño que acompaña desde o inicio a comunicación escrita, que é orixe de tipografías, logotipos e páxinas, que consegue achegar a información da maneira máis impactante ou máis sutil. 

O deseño gráfico que atopamos desde a orixe dos tempos da escrita e que hoxe en día se espalla a través de aplicativos dixitais.

Unha oportunidade para crear desde as bibliotecas do hoxe e do futuro, tecendo desde a nosa propia historia, coas referencias imprescidibles das editoriais Nós ou Castrelos, do Laboratorio de Formas e Ediciós do Castro… e de mestres do cartelismo como Xosé Vizoso.

Propoñemos mirar os libros desde a súa orixe, coñecer o proceso da edición, da composición, da escolla de tipos, papeis, cubertas e encadernacións, da revisión da maqueta e da difusión… e coñecer as persoas que forman parte dese mundo da edición e do deseño gráfico. Deseño gráfico que tamén trascende do mundo do libro e está presente na publicidade, a prensa, as etiquetas, as marcas corporativas… e en tantos outros ámbitos da nosa vida cotiá.

O cartel que Desescribir nos ofrece para este curso é unha porta aberta a esa creatividade a partir da raíz: o alfabeto e as infinitas posibilidades que permite a partir dunha sinxela pauta. Sumémoslle deseño ás bibliotecas escolares e enrolémonos nesta viaxe á creatividade! 

FONTE: BIBLIOTECAS ESCOLARES

DÍA DAS ESCRITORAS 2025

O DÍA DAS ESCRITORAS é unha iniciativa organizada entre a Biblioteca Nacional de España, a Federación Española de Mujeres Directivas e Executivas Profesionais e Empresarias (FEDEPE) e a Asociación Clásicas e Modernas, asociación  para a igualdade de mulleres e homes na cultura. Ademais, contará coa colaboración da Asociación Colexial de Escritoras e Escritores (ACE) e o Centro Español de Dereitos Reprográficos (CEDRO). Desde 2016 búscase reivindicar o labor e o legado das escritoras a través da historia. 

Como en edicións anteriores, a data elexida é o luns máis cercano á festividade de Teresa de Jesús, o 16 de outubro. A X Edición celébrase este ano 2025 o 13 de outubro baixo o lema

“1975: Escribide, compañeiras!”

"As escritoras activas ao redor de 1975 reflicten en moitas das súas obras o desexo dun cambio profundo e radical nas vidas das mulleres, denuncian a falta de liberdade e de autonomía, dan testemuño do que ocorre fóra de España, esixen unha nova orde amorosa e un cambio nas leis que as veu marxinando durante o franquismo".

Anna Caballé, comisaria de la X edición del Día de las Escritoras

Desde as bibliotecas escolares propomos que se visibilice a obra das escritoras galegas, ben a través dunha exposición, ben lendo fragmentos nunha maratón literaria ou mesmo nos clubs de lectura ou a través de actividades de investigación, exploración ou creación...

Na selección de textos en galego a transcrición dos distintos fragmentos decidiuse manter a ortografía da escrita orixinal previa ás convencións derivadas das Normas Ortográficas e Morfolóxicas do Idioma Galego de 1983. Alén de ser unha mostra da literatura do momento, é tamén un reflexo das dificultades que comportaba escribir nunha lingua que carecía dunhas normas ortográficas e morfolóxicas estables.

Vaia con esta escolma o noso agradecemento e recoñecemento a estas dez autoras, mulleres que nos anos 70 publicaron en galego, pola súa obra e o seu compromiso coa nosa lingua e a nosa cultura. 

Animamos a toda a comunidade educativa a participar nesta actividade que visibilizaremos a través desta páxina e nas redes sociais. #bescolaresgal #bescolaresgalabertas #DíaDasEscritoras25

SELECCIÓN DE TEXTOS EN GALEGO

FONTE: BIBLIOTECAS ESCOLARES

COMEZA A FUNCIÓN!!!

O luns 1 de outubro a Biblioteca abriu as portas da súa gran carpa!!! Ábrese o pano e comeza a función!!!

Todas as clases recibiron a invitación de Broli, a nosa mascota, que nos convida a visitala.

Na biblioteca agardávanos unha sorpresa que daba inicio ao PDI deste curso: unha carta e unha caixa que contiña diferentes elementos do circo para xogar, rir e compartir moitas aventuras circenses.

Poidemos ver a exposición de novidades, realizar os primeiros préstamos e desfrutar dos novos materiais.

A biblioteca convértese nun gran circo das palabras e das historias!!

Nos seus andeis agárdanvos milleiros de viaxes sorprendentes, aventuras cheas de acrobacias, retos de equilibrista e investigación dignas dos/das mellores ilusionistas.

Cada libro é un número distinto: uns fan rir, outros fan soñar, e algúns deixan coa boca aberta coma un gran espectáculo. Entre as súas páxinas saltan acróbatas de palabras, malabaristas de ideas e domadores de emocións. Un circo onde nós, os lectores e lectoras, somos o público entregado, disposto a deixarse sorprender e emocionar.

A BIBLIOTECA POLAS TARDES

Co inicio das actividades extraescolares procedemos á apertura da Biblioteca polas tardes informando dos horarios, as normas e as actividades que se desenvolven.

CURSO 2025-2026

XVII XORNADA DE CLUBS DE LECTURA

O mércores 21 de maio, asistimos no Palacio de Congresos e Exposicións de Galicia, en Santiago de Compostela, á reunión anual do profesorado que coordina os clubs de lectura dos centros que participamos no programa de CLUBS DE LECTURA, da Consellería de Educación, Ciencia, Universidades e Formación Profesional.

Esta XVII Xornada dos Clubs de Lectura reuniu a máis de 500 persoas, entre participantes, relatores e persoas asesoras de formación do profesorado. 

Entregouse, o Premio dos Clubs de Lectura 2025, que recaeu na escritora Paula Carballeira por ser a autora galega máis lida nos clubs de lectura no curso 2023/2024.

A xornada contou coa intervención do mediador, investigador, escritor e especialista en LIX Freddy Gonçalves; a profesora, investigadora e formadora Gualdalupe Jover; disfrutamos dunha conversa arredor das redes que tecemos con librarías e bibliotecas públicas e de  sesións simultáneas coa experiencia de dez centros integrados no programa. O peche da xornada deu voz ao alumnado que forma parte dos clubs de lectura nunha conversa moderada por Freddy Gonçalves.

DÍA MUNDIAL DO LIBRO 2025

Hoxe 23 de abril, celebramos o Día Mundial do Libro e do Dereito de Autor. É unha ocasión especial recoñecida pola UNESCO para homenaxear a importancia dos libros e dos dereitos de autor. 

Para conmemorar esta data, a Consellería de Educación, Ciencia, Universidades e Formación Profesional editou un cartel especial. Este ano, a elección para crear o cartel recaeu en Manuel Núñez Singala, unha figura destacada da literatura galega actual. Núñez Singala, ademais de ser escritor, é o director do Servizo de Normalización Lingüística da Universidade de Santiago de Compostela e recoñecido polo seu traballo dirixido ao público infantil e xuvenil co Premio dos Clubs de Lectura en 2023.

Este agasallo ás bibliotecas escolares de Galicia, convida aos lectores e lectoras  a experimentar a maxia da lectura:

“… tremer en seguranza cun medo convulso, notar nos beizos o sabor dos labios amados… abrir un libro”.

Os libros teñen o poder de transportarnos a mundos descoñecidos e de facernos sentir emocións profundas e variadas.

Cartel do Día do Libro 2025.

FONTE: BIBLIOTECAS ESCOLARES 

ENCONTROS PLAMBE 2024-2025

O xoves 20  de marzo asistiremos aos Encontros do Plan de Mellora de Bibliotecas Escolares, correspondentes ao curso 2024/2025,  nos que haberá intervención de persoas expertas en diversos ámbitos relacionados coas bibliotecas, a lectura, a literatura de non ficción a intelixencia artificial, a competencia lectora, a alfabetización mediática e informacional, o fotoálbum.

Ademais, presentaranse un total de 19 experiencias de centros de moi diverso contido (funcionamento da biblioteca escolar, traballo por proxectos, ALFIN, lecturas compartidas, radio, biblioteca LIA. 3 e outros...).

Un espazo de encontro das máis de 860 persoas coordinadoras no que as bibliotecas escolares de Galicia saen a escena, un ano máis!

PROGRAMA

FONTE: BIBLIOTECAS ESCOLARES

DÍA DO CÓMIC E O TEBEO

O Día do Cómic e do Tebeo é unha celebración  que pretende recoñecer o valor do cómic e do tebeo, o peso da súa historia e a súa importancia no contexto actual, a súa diversidade, creatividade e calidade.

A autora do cartel deste ano é a ilustradora Bea Lema, Premio Nacional do Cómic 2024. Creadora do cartel "Xeografías lectoras na biblioteca escolar" , lema das bibliotecas escolares de Galicia no curso 2020/2021, no que nos  ofrece unha imaxe evocadora deses mundos imaxinarios que a lectura pode axudar a visitar e construír. 

O Grupo de Traballo "Comictecas" do Consello de Cooperación Bibliotecaria, do que forman parte as bibliotecas escolares de Galicia, vén de presentar unha publicación para celebrar esta data: "Cómic. 50 recomendacións para bibliotecas".

FONTE: BIBLIOTECAS ESCOLARES

Unha pequena mostra dos cómics que temos na nosa biblioteca e as novidades en banda deseñada deste mes de marzo.