SAMAÍN EN COIA

Este ano, a nosa exposición de cabazas de Samaín convertéronse en personaxes e elementos do barrio de Coia grazas á imaxinación e creatividade das nosas familias!

A praza da Miñoca apareceu chea de encanto, Coia en festas brillou con alegría, os volcáns sorprenderon coa súa forza, o parque da Bouza encheuse de natureza e maxia, o campo de fútbol latexou con paixón, o barco de Alfageme navegou entre lembranzas e Coia en obras mostrou tamén a vida dun barrio que medra e se transforma. 

Cada cabaza era unha obra de arte única, creada co agarimo e a colaboración das familias!

A exposición deixou claro que o Samaín é moito máis ca unha festa: é unha oportunidade para imaxinar, crear e facer barrio.

Ata o ano que vén. Que a maxia do Samaín siga acendendo a imaxinación e inspirando a todas e todos!

EXPOSICIÓN TEMÁTICA DE SAMAÍN

Este Samaín, a biblioteca convértese nun lugar onde a maxia se agocha entre as páxinas e o misterio aparece en cada recuncho. As pantasmas saen dos seus escondedoiros, as meigas preparan os seus feitizos, os monstros contan historias e os libros convídannos a vivir aventuras inesquecibles.

Na exposición de lecturas de Samaín atoparedes unha selección de libros terroríficos e misteriosos. Historias capaces de arrepiarvos e sorprendervos.

Atrévete a abrir un libro e descubrir o que se agocha no seu interior. Quizais atopes un castelo encantado, unha criatura fantástica, un enigma imposible de resolver ou unha aventura chea de perigos. Só precisas deixar voar a imaxinación e prepararte para entrar nun mundo de sombras, lendas e emocións.

Vive un Samaín moi especial entre pantasmas, monstros, meigas e libros cheos de maxia!

A nosa Guía de recomendacións para este samaín:

Guía de Lecturas Samaín 2026 de Biblioteca Seis do Nadal

MOCHILAS VIAXEIRAS

Unha nova aventura da Mochila Viaxeira está a piques de comezar! As historias xa están preparadas para percorrer as rúas do noso barrio, chegar ás vosas casas e encher de maxia, ilusión e momentos compartidos cada fogar. Son 19 mochilas que inician a súa viaxe!!!

Coia será o escenario desta fermosa viaxe, e cada familia, a protagonista dunha aventura na que os libros nos axudarán a soñar, descubrir e gozar xuntos. Porque un barrio tamén medra a través das historias que compartimos!

Dentro de cada mochila atoparedes

-Unha carta explicando o seu funcionamento e un listado do material.

-O Caderno Viaxeiro, o noso diario de aventuras. Queremos que o enchades de palabras, debuxos, cores, opinións e suxestións.

-Coia a través de Broli: Escolle o teu recuncho favorito de Coia e sácalle unha foto usando a Broli como marco.

Para que esta viaxe por Coia sexa todo un éxito, precisamos da colaboración de todas as familias.

Lembrade, a puntualidade é fundamental para que a mochila poida continuar a súa viaxe. Tratemos os libros e todos os materiais con agarimo, coma auténticos tesouros.

Busquemos un anaquiño de tempo para ler xuntos, mirar as ilustracións, contar historias e deixar voar a imaxinación.

XUNTANZA DO CLUB DE LECTURA ADULTAS

O Club de Lectura de adultas “Ás seis no Seis” reuniuse o luns 19 de outubro para dar comezo, con moita ilusión, ás lecturas deste primeiro trimestre.

Foi unha tarde para reencontrarse, conversar e compartir o pracer de ler xuntas. Entre recomendacións, opinións e ganas de descubrir novas historias, presentáronse os libros que acompañarán o club nas vindeiras semanas.

Coincidindo coa celebración do Día das Escritoras, tamén se gozou da lectura dos diferentes textos seleccionados por Bibliotecas Escolares para esta data tan especial. As palabras das autoras axudaron a seguir creando un espazo de encontro, reflexión e afecto arredor da literatura.

Así, entre libros e conversas, “Ás seis no Seis” segue medrando como unha comunidade lectora na que cada persoa achega a súa voz, as súas emocións e o seu amor polas historias.

SEMANA DA BIBLIOTECA

Do 19 ao 23 de outubro, a biblioteca convértese nun espazo para compartir lecturas, descubrir novas historias, ampliar coñecementos, compartir ideas e deixar voar a imaxinación. A biblioteca promove a cultura, favorece a convivencia e fortalece os lazos da comunidade. Un lugar para aprender, participar e medrar xuntos.

O martes, 20 de outubro teremos un Obradoiro de Radio da man de Damián Alonso. Pola mañá estará dirixido ao alumnado e pola tarde ao profesorado. Será unha oportunidade para aprender, expresarnos e dar voz ás historias e ás persoas do noso barrio.

Ao longo de toda a semana cada clase recollerá a súa Mochila Viaxeira, que levará libros e aventuras para compartir. Porque cando unha historia viaxa de casa en casa, tamén viaxa a imaxinación e medra a comunidade.

O xoves, 22 de outubro, recibiremos a Tanxarina, que presentará o espectáculo: “A biblioteca galáctica contra a IA fantástica”. Unha proposta para reflexionar, xuntos e xuntas, sobre o uso da tecnoloxía e sobre a importancia de coidar os libros, a lectura e a imaxinación.

Ademais… Poderedes visitar a nosa Exposición de Novidades e descubrir os últimos libros chegados á biblioteca para ler, recomendar e compartir.

A biblioteca é un espazo do barrio, aberto á participación, ao encontro e á creación de comunidade.

PREMIADOS NO 9º CERTAME "AS IMAXES DO PATRIMONIO"

O venres 16 de novembro, as clases de 1º de Primaria participaron na entrega de premios do 9º Certame de fotografía "As imaxes do patrimonio" Inmaterial Galego-Portugués, convocado pola Asociación cultural e pedagóxica Ponte...nas ondas!. 

A gala celebrouse no Auditorio do Centro Veciñal e Cultural de Valadares en Vigo coa actuación de Paco Nogueiras que foi o encargado de conducir o evento.

Lingua e música uniron a escolas galegas e portuguesas na gran festa do Día Internacional do Patrimonio.

O centro participou no certame con varias imaxes, proporcionadas polas familias da comunidade educativa, unha colaboración que permitiu poñer en valor escenas, lembranzas e tradicións ligadas ao patrimonio inmaterial. 

Na categoría de Ensino Primario, recibimos o 2º premio coa imaxe “Esfollando o millo”, de Simón Rodríguez.

Esta iniciativa contribúe a preservar a riqueza do patrimonio, transmitindo historias, coñecementos e tradicións ás novas xeracións. A través da fotografía, o alumnado achégase a formas de vida, costumes e expresións culturais que forman parte da identidade colectiva. 

As familias desempeñan un papel fundamental para manter viva a nosa identidade e cultura, achegando memoria, experiencias e vínculos coa contorna. Queremos agradecer a colaboración das familias!!!

Tedes máis información de como foi a xornada na seguinte ligazón: 

https://www.youtube.com/watch?v=Ecih8tTQL38

O 17 de outubro celebramos o Día Internacional do Patrimonio Cultural Inmaterial: "As persoas salvagardan o patrimonio vivo e enriquecen a diversidade cultural e a creatividade humana".

PROXECTO DOCUMENTAL ANUAL

“Coia, o barrio do Seis” é o proxecto documental que desenvolveremos ao longo deste curso 2026-2027 para coñecer mellor o noso barrio e fortalecer o vínculo entre o colexio e a súa contorna.

Queremos que o alumnado descubra e coñeza mellor o lugar no que vive: a súa historia, a cultura, as persoas, os espazos e todo aquilo que fai de Coia un barrio único.

A través da investigación, a observación e diferentes actividades, aprenderemos xuntos a coñecer, valorar, coidar e mellorar a nosa contorna, traballando tamén polos Obxectivos de Desenvolvemento Sostible da Axenda 2030 e por un futuro máis sostible.

Queremos que este sexa un proxecto compartido, no que escola, alumnado, familias e contorna camiñemos xuntos.

Agardamos contar coa vosa colaboración e participación nas diferentes actividades de investigación e creación que iremos propoñendo ao longo do curso!

BIBLIOTECA EN HORARIO DE TARDE

Co inicio das actividades extraescolares neste mes de setembro, retomamos tamén a apertura da biblioteca no horario de tarde co obxectivo de ofrecer un espazo de lectura, estudo e consulta.

Informamos dos horarios, normas e as actividades que se desenvolven. 

GUÍA DE LECTURAS VERÁN 2026

O sol ergue o seu pano dourado e o verán comeza a súa función máis esperada. As rúas énchense de risas, os días fanse longos e o aire trae arrecendo a aventura. É tempo de deixar voar a imaxinación, de facer malabares co tempo libre e de descubrir novas historias que fagan sorrir, soñar e aprender. 

Presentamos a nosa Guía de Lecturas de Verán, unha selección de títulos cheos de fantasía, emoción e aprendizaxe, pensada para acompañar cada momento destas vacacións. 

Cada libro é unha viaxe diferente, unha porta aberta a novas emocións e descubrimentos. Que esta guía sexa o mapa que conduza a momentos inesquecibles de lectura e descanso. 

Bo verán e felices lecturas!

Guía de lecturas verán 2026 de Biblioteca Seis do Nadal

PECHE DO CLUB DE LECTURA DE ADULTAS

O martes 16 de xuño celebramos o peche a un novo curso do noso Club de Lectura "Ás seis no Seis", nun encontro cheo de emocións, lembranzas e bos momentos compartidos.

Foi unha tarde para mirar atrás e lembrar todo o vivido ao longo destes meses: libros que nos emocionaron, historias que nos fixeron pensar, personaxes que quedaron connosco e conversas que enriqueceron cada encontro. Un ano máis, a lectura converteuse na mellor escusa para compartir experiencias, descubrir novas perspectivas e fortalecer os lazos de amizade entre as integrantes do club.

Durante o encontro fixemos balance da nosa andaina lectora. Coincidimos en que este foi un curso cheo de descubrimentos literarios, de autoras e de historias que nos fixeron viaxar, rir e reflexionar. 

Con ilusión e curiosidade, xa deixamos preparada a selección de lecturas para o primeiro trimestre do curso 26-27. Escolléronse títulos variados, con propostas que prometen emoción, reflexión e moita conversa. O espírito lector segue vivo e con ganas de seguir explorando novos mundos. 

A celebración rematou coa tradicional merenda, un momento distendido no que as risas, as anécdotas e a boa compañía foron as verdadeiras protagonistas. Tamén fixemos entrega de diplomas e pequenos agasallos como mostra de agradecemento pola implicación, a participación e o entusiasmo que cada unha achega ao club.

Grazas a todas por facer de “Ás seis no Seis” moito máis ca un club de lectura: un espazo de encontro, diálogo, aprendizaxe e amizade. Desexámosvos un feliz verán, cheo de boas lecturas, novos descubrimentos e historias inesquecibles.

EXPOSICIÓN FINAL PDI

Ao longo deste curso, mergullámonos nun fascinante universo de cores, emocións e aprendizaxes co noso Proxecto Documental: "O Gran Circo do Seis". Este proxecto converteuse no fío conductor das actividades do centro e no eixo vertebrador do proceso de ensino-aprendizaxe. 

A través de múltiples propostas, o alumnado explorou a historia do circo, as súas disciplinas e personaxes, a linguaxe propia do espectáculo e os valores que o acompañan: esforzo, cooperación, respecto, superación e alegría compartida.

Os resultados destas investigacións e creacións foron tomando forma nas aulas e corredores, ata culminar nunha exposición final que reuniu os traballos máis destacados do curso.

A exposición organizouse en diferentes espazos temáticos:

-Historia do circo; Viaxar, viaxar; A música do circo; Equilibrio e aire; Corpo e mente; Circo sensorial; Ler e ver o circo; Emocións.

-Arte e cor: a estética do circo a través da pintura con Botero, Picasso, Dalí e o circo de Calder.

O día 9 de xuño, en horario de tarde, recibimos ás familias. A visita á exposición converteuse nunha oportunidade para compartir procesos, descubrimentos e emocións, celebrando o traballo colectivo e a creatividade do alumnado. 

Para facilitar o percorrido, elaborouse unha guía da exposición que permitiu observar, coñecer e desfrutar cada espazo con calma e curiosidade.

No seguinte vídeo podedes ver unha pequena reportaxe da exposición.

AS FAMILIAS CONTAN

Durante os meses de abril e maio, as familias do Seis participaron activamente na Hora de Ler, achegándose ás aulas e biblioteca para compartir contos co alumnado. Pais, nais, avós e avoas convertéronse en contadores e contadoras de historias, facendo desa hora unha aventura chea de emcoiósn, palabras e imaxinación compartida. 

Cada visita transformou a aula e a biblioteca nun pequeno escenario onde os libros cobraban vida. Houbo contos clásicos, relatos inventados, historias de risa e de soños. O alumnado escoitou, participou e descubriu que ler tamén é un acto de encontro e afecto.

Esta iniciativa, promovida pola biblioteca escolar, reforzou o vínculo entre escola e familia, e fixo da lectura un espazo común de aprendizaxe e pracer. A Hora de Ler converteuse así nun tempo máxico onde as voces das familias fixeron vibrar as páxinas dos libros. 

Queremos agradecer a todas as familias que nos acompañastes durante estes meses, compartindo connosco esas lecturas que tanto desfrutamos e que nos permitiron pasar momentos  moi agradables e cheos de complicidade. Grazas por participar nesta fermosa experiencia. Agardámosvos no vindeiro curso!

IX MERCADO SOLIDARIO DE LIBROS USADOS

A biblioteca organiza durante este mes de abril o IX Mercado Solidario de Libros usados, unha actividade que forma parte do programa Bibliotecas Escolares Solidarias.

O obxectivo principal deste mercado é dar unha segunda vida aos libros procedentes do expurgo da biblioteca, promovendo ao mesmo tempo valores de responsabilidade e solidariedade entre o alumnado. Trátase dunha excelente oportunidade para compartir, axudar e contribuír a un mundo máis xusto.

          -Datas: Do 21 de abril ao 8 de maio

       -Lugar: Vestíbulo do centro

O alumnado poderá levar un libro a cambio de achegar alimentos non perecedoiros (fariña, azucre, pastas, conservas...). Deste xeito, cada intercambio convértese nun xesto solidario.

A actividade está organizada polo voluntariado da biblioteca durante os recreos, de 11,30h a 12,00h.

Todos os alimentos recadados serán doados ao Banco de Alimentos de Vigo, contribuíndo así a apoiar ás persoas que máis o necesitan.

Grazas pola vosa colaboración nesta iniciativa solidaria!!

AS FAMILIAS CONTAN

Durante os meses de abril e maio, a biblioteca transformarase nun auténtico circo das palabras, un espazo cheo de emocións onde cada historia será unha función especial.

Queremos convidar ás familias a achegarse á escola para contar un conto e compartir un intre cheo de complicidade, ilusión e pracer pola lectura.

A actividade terá lugar na biblioteca, durante a Hora de Ler (de 12,00 a 12,20h).

Se eres membro da nosa comunidade educativa (pai, nai, avoa, avó...) e queres participar nesta aventura circense, só tes que enviarnos un correo a: bibliotecaseisdonadal@gmail.com indicando o teu nome, o nome do teu fillo/filla, o curso e a data proposta para a túa actuación.

"As familias contan" desenvolverase os meses de abril e maio, e cada sesión será unha nova función chea de contos, risas e emocións.

Animádevos a subir ao noso escenario lector e facer soar a maxia das palabras!!!