AGASALLOS AOS RETOS DOS RECREOS

Este venres celebrouse na biblioteca a entrega dos agasallos ao alumnado que completou todos os retos do folleto de recreos creativos. Ao longo do curso, participaron con entusiasmo nas propostas de Kapla, Korbo, Lego e Magsmarters, vinculadas ao PDI do circo, demostrando imaxinación, colaboración  e moitas ganas de aprender xogando.

Cada reto puxo a proba a capacidade de crear, construír e traballar en equipo, convertendo os recreos nun espazo de experimentación e diversión compartida. O resultado foi unha colección de creacións sorprendentes e un ambiente cheo de ideas e sorrisos. 

O equipo da biblioteca quere dar as grazas a todo o alumnado participante pola súa implicación e espírito colaborativo. Parabéns a todas e todos polos retos superados!

RETO KAPLA XUÑO

O gran circo do Seis está a piques de rematar a súa función!. Despois de meses cheos de risas, retos e aventuras compartidas, os seus protagonistas prepáranse para coller unhas merecidas vacacións. Pero antes de marchar… queda unha última misión!

Os artistas, malabaristas e equilibristas teñen que viaxar cara ao seu descanso, e precisan un tren moi especial para facelo. Durante este mes de xuño, as pezas de Kaplas serán as grandes protagonistas dos recreos na biblioteca. Con elas, haberá que construir o tren do circo, vagoneta a vagoneta, combinando imaxinación, equilibrio e traballo en equipo.

Este mes tamén traerá unha sorpresa moi esperada: a última pegatina para completar o folleto dos retos da biblioteca. Quen os teña poderá recoller un pequeno agasallo como recoñecemento polo esforzo, a creatividade e a colaboración demostrada ao longo do curso. 

Ata pronto, artistas do Seis! 

TRABALLO EN EQUIPO CON LEGO

Durante o mes de maio, a biblioteca encheuse de cores, pezas e imaxinación. Os Lego foron os protagonistas dos recreos, converténdose nun espazo de creación compartida onde o traballo en equipo foi a clave para acadar o reto do mes: deseñar un mago. 

A actividade serviu para fomentar a colaboración, a comunicación e o respecto polas ideas dos demais, demostrando que cando se constrúe en equipo, o resultado é sempre máis sorprendente. 

Os participantes que completaron o reto recibiron unha pegatina para a súa folla de retos, símbolo do esforzo, da creatividade e da ilusión compartida. 

RETO LEGO MAIO

Este mes de maio, a biblioteca énchese de maxia, cor e imaxinación. As pezas de Lego convértense nas protagonistas dun espectáculo cheo de fantasía.

Converte as túas ideas en arte! Emprega as pezas de Lego para deseñar un mago sobre plano. Podes inspirarte nos magos clásicos, nos personaxes de contos ou inventar o teu propio feiticeiro cheo de maxia e cor. 

A colaboración e o traballo en equipo farán posible esta actividade nos recreos. Engade unha nova pegatina á túa folla de retos da biblioteca.

CREATIVIDADE CON KORBO

Durante o mes de abril, a biblioteca transformouse nun auténtico circo de ideas e construcións grazas ás pezas Korbo. O espazo encheuse de imaxinación, enxeño e moita diversión mentras o alumnado convertíase en artistas da creación. 

O reto deste mes consistiu en deseñar e construir unha estrutura que lembrase ao incrible home bala. As mesas convertéronse en pistas de lanzamento, as pezas en engranaxes de soños, e cada grupo traballou en equipo para dar forma ás súas ideas.

Os resultados foron: estruturas cheas de cor, equilibrio e movemento, que demostraron a creatividade e o espírito colaborativo de todos os participantes.

Ao completar o desafío con éxito, cada participante recibiu unha nova pegatina para engadir á súa folla de retos da biblioteca, un recordo máis desta aventura chea de aprendizaxe, diversión e fantasía.

RETO KORBO ABRIL

Este mes de abril, a biblioteca transfórmase nun circo de ideas e construcións coas pezas de Korbo! Prepárate para un reto emocionante: crear unha estructura que lembre ao incrible home bala.

Inspirándonos no mundo do circo, imaxinade a emoción e a precisión necesarias para lanzar un home bala ao aire. Agora, trasladade esa imaxinación á construción e creade unha estrutura resistente e espectacular.

Ao completar o reto recibiredes unha nova pegatina para engadir a vosa folla de retos persoal.

RETO CREATIVO DE MARZO

Durante o mes de marzo, a biblioteca transformouse nun circo máxico, onde a imaxinación e a diversión foron os principais protagonista. Os bloques magnéticos convertéronse nas estrelas do espectáculo, ofrecendo aos nenos e nenas unha experiencia única.

Os magsmarters foron a ferramenta clave para dar vida a este circo imaxinario. A cativada empregaron estes bloques magnéticos para construir estruturas cunha rampa.

Ao completar o desafío con éxito, cada participante recibiu unha nova pegatina para engadir á súa folla de retos. 

Os recreos convertéronse en momentos especiais de colaboración, traballo en equipo, compartir ideas e construir un ambiente de diversión e aprendizaxe mútuo.             

CREATIVIDADE CON LEGO

Durante os meses de xaneiro e febreiro, a biblioteca transformouse nun circo grazas á imaxinación e habilidade dos nenos e nenas que participaron. O elemento principal desta transformación foron as pezas de Lego, que serviron como ferramenta para dar vida a estruturas circenses e pallasos.

A actividade non só fomentou a súa creatividade e habilidades de construción, senón que tamén destacou a importancia do traballo en equipo e a colaboración. A biblioteca convértese así nun espazo de encontro, aprendizaxe e diversión.

RETO LEGO FEBREIRO

Chegou febreiro, e con el...o Entroido!🎉

Este mes, a biblioteca transfórmase nun circo máxico onde as pezas de Lego son grandes estrelas. 

Únete ao Gran Circo do Seis e deseña a cara dun pallaso usando pezas de Lego. Lembra empregar polo menos tres cores para que o teu pallaso sexa único e especial.

Durante os recreos na biblioteca axuda a construir o circo de Lego: cada man conta para crear un mundo de fantasía e dar renda solta á túa creatividade!. Completa o reto e engade unha nova pegatina á túa folla de retos! 🎪

RETO LEGO XANEIRO

En xaneiro, a biblioteca converterase nun incrible circo máxico onde as pezas de Lego serán as grandes estrelas. No gran circo do Seis, as pezas fan piruetas e equilibrios imposibles. Veremos estruturas que lembren ao circo: torres de acróbatas desafiando a gravidade, home bala feito de bloques, a carpa, a pista, o camión circense…

Durante os recreos de xaneiro, únete á diversión na biblioteca. Axúdanos a construir este marabilloso circo de Lego e recibirás unha pegatina para a túa folla de retos. Demostra o artista que levas dentro!

COLABORACIÓN E CREATIVIDADE CON KAPLA

A biblioteca converteuse nun auténtico circo de ideas grazas aos Retos Kapla. Durante os recreos, o alumnado transformou bloques de madeira en espectaculares estruturas, demostrando unha enorme creatividade e un espírito de colaboración. A participación foi masiva.

Os retos, inspirados no mundo do circo, puxeron a proba a imaxinación do alumnado.

Os Retos Kapla circenses non só foron unha actividade divertida, senón que tamén tiveron un impacto positivo na convivencia e na creatividade do alumnado. A través do xogo e da colaboración, aprenderon a resolver problemas xuntos, a respectar as ideas dos demais e a desenvolver o seu potencial creativo. A biblioteca converteuse nun espazo de aprendizaxe dinámico e enriquecedor.

RETO KAPLA DECEMBRO

Este decembro, a biblioteca transfórmase nun circo máxico onde as pezas de Kapla son as verdadeiras estrelas. No gran circo do Nadal, as pezas fan piruetas e equilibrios imposibles, ata converterse nunha espectacular árbore de Nadal! 

Únete á diversión durante os recreos de decembro. Achega a túa creatividade e habilidade para construír a árbore de Nadal máis orixinal. Traballa en equipo, comparte as túas ideas e... que comece o espectáculo!!!

 

Recolle a túa folla de retos na biblioteca. É o teu pasaporte á aventura! Se superas o reto do mes, recibirás unha fantástica pegatina para a túa folla. Se consigues as sete pegatinas ao longo do curso, recibirás unha pequena recompensa como premio ao teu esforzo e dedicación.

Non perdas esta oportunidade de ser parte do circo máis creativo da biblioteca!

RETOS CREATIVOS MENSUAIS

Preparádevos para un novembro cheo de emoción, sorpresa e moita creatividade. Presentamos...

OS RETOS MENSUAIS

Cada mes, un novo desafío, unha nova aventura, un novo material para descubrir e dar renda solta á túa imaxinación. Este novembro, imos... Construir!

O material estrela: KAPLA!

Acepta o reto e demostra a túa habilidade! Con Kapla, imos erguer a maior carpa de circo xamais vista! Unha carpa chea de maxia, cor e fantasía creada polas vosas mans.

Como participar?

É sinxelo! Só tes que achegarte á biblioteca durante os recreos de novembro e unirte á diversión. Traballa en equipo, comparte ideas e... Que comece o espectáculo!!!

RECREANDO PORTADAS DE LIBROS

Estas son as fotografias coas portadas dos libros que recreastes. Grazas a todas as persoas que vos animastes a participar neste terceiro e último reto da biblioteca por este curso!!!

RETO "OSEISMEDIA"

No terceiro e último reto deste curso Broli propón que, empregando materiais que teñamos por casa e unha boa dose de imaxinación e creatividade, recreemos a portada do noso libro favorito.

Tedes ata o 25 de maio para enviar a vosa portada e a recreación ao correo da biblio:

bibliotecaseisdonadal@gmail.com

Con todos os traballos que presentedes faremos un vídeo!!!

Animádevos!! Agardamos as vosas respostas!!!

PROXECTO FOTOGRAFÍA 2º: ROBERT CAPA

As  clases de 2º de Primaria continúan traballando no proxecto documental de fotografía.

Despois de coñecer a Vivian Maier e a Luis Ksado, achegámonos a outro fotógrafo que Olai Sendón nos presenta no seu libro “A fotógrafa Perpetua”, porque as súas fotos ademais de contar historias explican o mundo e axudan a recordar as cousas e a xente que se foron deixando atrás.

Aproveitando que o reto da biblioteca para este segundo trimestre é “Imaxina! Narrativas de Paz” e, partindo da foto “Muerte de un miliciano” de Robert Capa, fixemos como Olaia, a nosa propia reinterpretación empregando diferentes elementos.

Robert Capa é o pseudónimo que empregaban dous fotógrafos, Endre Ernő Friedmann e Gerda Taro, para publicar as súas reportaxes fotográficas sobre conflictos bélicos.

Agradecer ás familias a súa inestimable colaboración e implicación por este ilusionante proxecto no que estamos inmersas neste curso.

RETO "OSEISMEDIA"

Neste segundo reto, IMAXINA! NARRATIVAS DE PAZ, traballaremos dous Obxectivos ODS:

-O Nº16: Paz, Xustiza e Institucións Sólidas.

-O Nº17: Alianzas para acadar os obxectivos.

"Escoito cancións grises para pintalas de vida

Leo noticias tristes e eu póñolles ledicia 

Borro as nubes do ceo

Semento a terra de sorrisos

Reparto apertas sinceras

Para ir pechando feridas..."

Fragmento da canción “Efecto pasillo”. Imagina. 2015

O mundo que nos rodea non é perfecto. Cada día vemos, escoitamos, lemos algo que non nos gusta e desexaríamos ter unha variña máxica coa que poder borralas ou cambialas.

Colle un vídeo, unha foto, un artigo xornalístico, unha noticia da radio... e cámbiaos. Podes editar as imaxes, debuxar enriba, borrar o que che parece que sobra, crear unha noticia nova, etc.

Envíanos as túas creacións ao correo da Biblioteca (biblioteca seisdonadal@gmail.com) ou entrégallas a túa mestra ou mestre.

Xuntos podemos crear un mundo mellor, máis xusto, máis limpo, máis amable.

E ti, que Imaxinas!

Preme na seguinte ligazón para visionar o vídeo

https://vimeo.com/301028180

Agardamos as vosas respostas!!!

CONSELLOS PARA UN NADAL RESPONSABLE

O alumnado de 1º de Primaria comparte uns consellos para un consumo responsable nestas datas de Nadal.

RETO "OSEISMEDIA"

Xa están aquí os Retos da Biblioteca. Actividade de procura documental que nos permite traballar o proxecto anual e tamén os Obxectivos ODS da Axenda 2030.

Este primeiro reto ten que ver co Consumo Responsable.

Os recursos cos que conta o planeta son escasos e por iso é importante facer un uso responsable dos mesmos para garantir ás novas xeracións un mundo mellor e máis xusto.

O consumo responsable baséase en dúas máximas: consumir menos e o que consumamos sexa o máis sostible e solidario posible.

Propoñemos facer un anuncio sobre algún produto que sexa respetuoso co consumo responsable.

Podes facelo no formato audiovisual que queiras: unha cuña de radio (só voz), un cartel publicitario, un anuncio para televisión…

Os traballos que fagades podedes entregalos na biblioteca ou envialos ao noso correo:

bibliotecaseisdonadal@gmail.com

Agardamos as vosas respostas!!!

RESUMO DOS RETOS

Presentamos un resumo dos Retos mensuais, plantexados ao longo do curso, vinculados ao Proxecto Documental Anual, “O futuro que queremos”, centrado nos Obxectivos ODS da Axenda 2030.

Retos ODS de Biblioteca Seis do Nadal