OBRADOIROS DE POLOS CREATIVOS: DESEÑO 3D E MÚSICA POLA PAZ

Durante estas últimas semanas, dentro das actividades do Polo Creativo, o alumnado de 3º e 5º de Primaria participaron en actividades STEM cuxo eixo temático foi a PAZ.

O alumnado de 3º de Primaria participou nun obradoiro de deseño e impresión 3D no que, partindo dunha reflexión sobre o significado da paz, cada neno e nena deseñou o seu símbolo da paz co programa Doodle3D. Logo, co apoio do profesorado, puideron ver como as súas ideas tomaban forma grazas á impresora 3D e, despois de completar todo o proceso, transformáronse en colgantes que cada un e unha levou como recordo desta experiencia.

 

Por outra banda, o alumnado de 5º de Primaria recibiu unha carta inspiradora do compositor Ludwig van Beethoven, na que lles explicaba o que supuña para el a paz e como a expresou a través da súa música, como fixo co Himno da Alegría. A partir desta mensaxe, desenvolveron un proxecto no que a rapazada construíron un piano con materiais sinxelos (cartón e papel de aluminio) conectados a Makey Makey e, tras programar as teclas en Scratch, foron capaces de interpretar o Himno da Alegría. 

A RADIO DO SEIS: DÍA DA PAZ

A Radio do Seis regresa cun novo programa, preparado con moito agarimo polas clases de 2ºB e 5º de Edº infantil B.

Este programa está dedicado á conmemoración do Día da Paz. Exploraremos a importancia desta data e reflexionaremos sobre como podemos contribuír a un  mundo máis xusto e pacífico. Os nosos pequen@s artistas tamén recitan dous fermosos poemas sobre a Paz.

Desfrutade desta nova entrega!!!

BIBLIOLAB: CONSTRUÍNDO A PAZ

Durante o mes de xaneiro, a BiblioLab foi un espazo de xogo, creación e aprendizaxe enfocada na convivencia e o respecto. As actividades deseñáronse para fomentar a colaboración, a creatividade e a comprensión de conceptos relacionados coa paz.

Comezamos coa composición dun quebracabezas temático. Despois, empregamos o Tale Bot para explorar elementos e personaxes vinculados á Paz.

Unha das actividades máis creativas foi a decoración de símbolos da Paz. Utilizando unha variedade de materiais, o alumnado expresou a súa visión da paz a través da arte.

Para estimular o traballo en equipo e o vocabulario, organizamos xogos de scrabble. Os equipos traballaron xuntos para construír palabras relacionadas coa Paz, promovendo a comunicación e a colaboración.

O xogo de dominó tamén tivo o seu espazo. A simple acción de repartir as pezas converteuse nunha oportunidade para aprender sobre a importancia de compartir e de traballar xuntos para alcanzar un obxectivo común. O xogo fomentou o pensamento estratéxico e a paciencia.

DÍA DA PAZ 2026

O venres 30 de xaneiro celebramos o Día da Paz e a Non Violencia cun acto colectivo no centro. 

A comunidade educativa vestiu de negro para simbolizar a tristura polos conflitos bélicos que azoutan diversos países do mundo. Este acto quixo ser unha manifestación visual do noso compromiso coa Paz e a nosa solidariedade coas vitimas da guerra. 

Un elemento central da conmemoración foi a localización nun mapamundi dos países en guerra traballados en cada ciclo: Ucraína, Siria, Sudán e Gaza. Permitiu visualizar a magnitude e o impacto global dos conflitos armados ao mesmo tempo que escoitabamos pola radio aos pregoeiros e pregoeiras que nos contaban o que está a acontecer neses países.

Elaboráronse pancartas con mensaxes que fomentan a Paz, a convivencia e o diálogo. Estas mensaxes reflicten a importancia de construír a Paz a través das palabras, os xestos e o traballo diario, sementando o respecto mutuo para crear un mundo mellor.

A conmemoración do Día da Paz e a Non Violencia foi unha oportunidade para reflexionar sobre a importancia da Paz e o noso papel na súa construción. A través de diversas actividades, a comunidade educativa reafirmou o seu compromiso cun mundo máis xusto e pacífico.

VOLUNTARIADO: CONTO POLA PAZ

Na nosa biblioteca, a colaboración do voluntariado é fundamental. Grazas ao seu compromiso, preparan e comparten lecturas adaptadas ás diferentes idades, achegando os libros ao alumnado máis pequeno dun xeito próximo, afectivo e motivador.

Para celebrar a Semana da Paz, o voluntariado preparou unha lectura moi especial para o alumnado de 1º de Educación Primaria: "Wangari y los árboles de la Paz", escrito por Jeanette Winter e publicado por Ed. Ekaré. 

Este fermoso conto narra a vida de Wangari Maathai, unha muller africana de kenia que gañou o premio Nobel da Paz en 2004. A través dunha linguaxe sinxela e ilustracións evocadoras, o libro conta a súa inspiradora loita a través do Movemento Verde, demostrando como unha soa persoa pode motivar a miles a tomar acción en defensa do medio ambiente e da paz. 

O voluntariado, coa súa dedicación e entusiasmo, logrou transmitir a esencia da historia de Wangari, inspirando aos nenos e nenas a reflexionar sobre a importancia da paz, o respecto, a solidariedade e o coidado polo medio ambiente.

CINEMA POLA PAZ

Durante este mes de xaneiro, a biblioteca ofreceu sesións de cinema nas que grandes e pequenos/as puideron desfrutar da curtametraxe animada "El niño, el topo, el zorro y el caballo". Esta produción, baseada no libro de Charlie Mackesy, é gañadora dun Óscar e un Bafta Film. 

Trátase dun conto universal e inspirador para todas as idades que narra como un neno, unha toupa, un raposo e un cabalo coñécense e forxan unha amizade inesperada, profunda e inquebrantable.

Xuntos aprenden valiosas leccións:

-O que máis necesita o mundo é un pouco de amabilidade.

-O amor non necesita o extraordinario para florecer.

-Nada pode vencer a bondade.

-A  vida non ten que ser perfecta.

-Cando se xuntan nubes de tormenta, todo o que tes que facer é  seguir adiante.

EXPOSICIÓN TEMÁTICA: LECTURAS POLA PAZ

Para conmemorar o 30 de xaneiro, Día da Paz e a Non Violencia, preparamos unha exposición con recursos bibliográficos que buscan informar, investigar e reflexionar sobre a convivencia e os valores que fomentan a Paz.

PROGRAMA DE RADIO: DÍA DA PAZ

As persoas do barrio de Coia son os protagonistas desta nova entrega da Radio do Seis.

A clase de 5ºC saíu ao noso barrio para entrevistar a diferentes persoas e preguntarlles sobre que pensan eles/elas que é a Paz para conmemorar o Día Escolar da Non Violencia e da Paz.

Desfrutade desta nova entrega!!!

OBRADOIRO DE PROGRAMACIÓN: O XARDÍN DA PAZ

Neste mes de xaneiro, con motivo da celebración do Día da Paz, o alumnado de 1º e 2º de Primaria participaron nun obradoiro de programación que lles permitiu traballar o pensamento computacional así como reflexionar sobre a importancia da paz e a convivencia. 

O obradoiro comezou co contacontos O xardín da Paz, unha historia que lles permitiu coñecer diferentes símbolos que representan a paz e a convivencia. Inspirados polo conto, os alumnos traballaron coa linguaxe dos computadores, aprendendo como se representan as imaxes a través de píxeles. Para reforzar esta aprendizaxe, realizaron unha actividade na que debuxaron en papel os símbolos que descubriran no conto.

 

A continuación, utilizando o programa MakeCode deron vida ás súas creacións a través da programación que puideron trasladar á placa Micro:bit.

VOLUNTARIADO: CONTOS POLA PAZ

Na biblioteca contamos coa colaboración do voluntariado sempre disposto a preparar lecturas para contar aos compañeiros e compañeiras máis pequenos/as.

Nesta ocasión, para a esta Semana da Paz, contaron dous contos ás clases de 2º de EP.

Xulia, Carmen, Laia e Coral, contaron "El árbol de la amistad", un fermoso álbum ilustrado que nos di que a a amizade é coma unha árbore máxica e preciosa que só medra si se rega con cariño e amabilidade hacia os outros.

Carmen, Mateo e Eire falaron sobre os refuxiados, “¿Que es un refugiado?”, no que inclúe testimonios de nenos e nenas refuxiados e de persoas refuxiadas que coñecemos como Malala.

DÍA DA PAZ 2025

O xoves 30 de xaneiro, celebramos un acto colectivo para conmemorar o Día da Paz e a Non Violencia.

A Paz constrúese cada día, coas nosas palabras, os nosos xestos e o noso traballo.

Cada un de nós pode ser un pequeno/pequena “Artesán da Paz”. Con palabras amables, axudando aos demais, con xestos de amizade... Se sementamos respecto, crecerá un mundo mellor para todos e todas.

Na pista de baloncesto, con roupa branca e portando colgantes en forma de corazón realizados con diferentes materiais  (cartulina, barro, pasta…), colocámonos formando dous corazóns.

Todos e todas xuntos, cantamos dúas cancións en lingua de signos e bailando no retrouso: "Corazón" de Magín Blanco e “Amizade para sempre” de Los Manolos.

As clases traballaron palabras relacionadas coa Paz (bicos, apertas, axuda, amor, ledicia, amizade, compartir, aloumiños…) coas que decoramos os chanzos das escaleiras en diferentes zonas do centro.

LECTURAS POLA PAZ

Para conmemorar o Día pola Paz e a Non Violencia preparamos unha escolma de lecturas sobre solidariedade, amizade, tolerancia, respecto…que están a disposición de todas e todos para traballar nas aulas.

PROXECTO FOTOGRAFÍA 2º: ROBERT CAPA

As  clases de 2º de Primaria continúan traballando no proxecto documental de fotografía.

Despois de coñecer a Vivian Maier e a Luis Ksado, achegámonos a outro fotógrafo que Olai Sendón nos presenta no seu libro “A fotógrafa Perpetua”, porque as súas fotos ademais de contar historias explican o mundo e axudan a recordar as cousas e a xente que se foron deixando atrás.

Aproveitando que o reto da biblioteca para este segundo trimestre é “Imaxina! Narrativas de Paz” e, partindo da foto “Muerte de un miliciano” de Robert Capa, fixemos como Olaia, a nosa propia reinterpretación empregando diferentes elementos.

Robert Capa é o pseudónimo que empregaban dous fotógrafos, Endre Ernő Friedmann e Gerda Taro, para publicar as súas reportaxes fotográficas sobre conflictos bélicos.

Agradecer ás familias a súa inestimable colaboración e implicación por este ilusionante proxecto no que estamos inmersas neste curso.

ROBÓTICA POLA PAZ

No mes de xaneiro dende os talleres de robótica organizados pola Bibliolab a rapazada de 4º, 5º e 6º de Primaria, estiveron traballando entorno a Paz con diversos obradoiros.

En 4º de Primaria recordaron algúns símbolos da Paz e despois deseñáronos en 3D co obxectivo de crear un colgante para imprimir na impresora. Verdade que fixeron auténticas obras de arte?

 

Nos curso de 5º de Primaria experimentaron cos efectos ópticos xogando coa luz e a escuridade, programando un holograma dunha pomba mensaxeira de Paz. Na seguinte ligazón podedes desfrutar dun exemplo da súa creación e das mensaxes que nos deixou a pomba:  https://scratch.mit.edu/projects/961727854

Queredes desfrutar da experiencia completa empregando unha pirámide holográfica? Na seguinte ligazón tedes o paso a paso: https://youtu.be/fIdq5WDF12M

 

En 6º de Primaria os obradoiro centráronse no uso de Scracth co fin de crear un videoxogo no que hai que recoller os símbolos da Paz, diferenciándoos dos que non o son. Queres probar os teus reflexos? Aquí tedes un exemplo: https://scratch.mit.edu/projects/964402102

Ademais, tamén construiron un pequeno instrumento musical para tocar o Himno da Alegría, como símbolo de unidade e fraternidade; e para crealo tiveron que programar en Scratch e usar a placa Makey-Makey para conseguir que un trozo de papel de aluminio e un cartón emitisen as notas desta melodía.

PROGRAMA DE RADIO: DÍA DA PAZ

Xa está aquí un novo programa da Radio do Seis.

Nesta ocasión os/as protagonistas son a clase de 5ºA, que nos falarán do Día Escolar da Non violencia e da Paz así como uns consellos para resolver os conflictos que poidan xurdir.

Desfrutadeo!!!

CINE POLA PAZ

Na última semana de xaneiro, dentro do programa de “Cine na Biblio”, proxectamos curtametraxes e videocontos coa temática do Día Escolar da Non Violencia e a Paz.

Os e as máis pequenas puideron ver “Azulado” de Saschka Unseld, a historia dun paraugas azul nun día de chuvia que precisa dunha man amiga na perigosa cidade. E “Piper” de Alan Barillaro, un paxariño que está aprendendo a valerse por sí mesmo pero non poderá facelo sen axuda.

As e os maiores do cole pola súa banda emocionáronse con “Viento” de  Edwin Chang, unha avoa e o seu neto intentando fuxir a un mundo mellor. E recordamos “E que podo facer eu?”, un album ilustrado de José Campanari e Jesús Cisneros que se encadra dentro da serie “Contos do Camiño” e do que temos a edición impresa na nosa biblioteca para que poidan desfrutar cando queiran.

BIBLIOLAB: ENREDAMOS COA PAZ

Durante o mes de xaneiro as actividades que se desenvolveron na BiblioLab tiveron como eixo temático a Paz.

Mensaxes de Paz

Desciframos mensaxes de paz empregando tarxetas de decodificación.

Reto Steam pola Paz

Cos materiais que se nos proporciona temos que conseguir que a pomba viaxe dunha punta a outra da aula sen movela nós.

Investigo na miña biblioteca

Coa axuda das tabletas e dos libros que nos proporcionan facemos fichas de investigación de persoas que loitaron pola Paz no mundo, Nelson Mandela e Malala.

Colgante pomba

Facemos un colgante da pomba da paz con ás en forma de abanico.

Taumatropo da Paz

Coloreamos os símbolos da paz, recortamos e facemos xirar as imaxes para crear sensación de movemento.

Taboleiros de robótica para escornabot e Tale-bot