Para conmemorar o Día Internacional da Muller e a Nena na Ciencia, o alumnado puido desfrutar dunha interesantísima charla sobre o mundo da oceanografía da man de Juan e Patricia, oceanógrafos que traballan no CSIC de Vigo.
Juan explicounos que o seu traballo pódese centrar en 3 áreas: a pesca, a acuicultura e o medio mariño; e que eles se centran sobre todo no estudio dos fondos mariños para observar, entre outras cousas, se existe contaminación e poder tomar medidas.
Ademais, tamén nos presentou o proxecto OCEÁNICAS, que ten como obxectivo dar a coñecer o traballo de diferentes científicas que ao longo da historia dedicaron o seu traballo ao estudo dos océanos.
Por outra banda, Patricia explicounos como recolle as mostras do fondo mariño para despois analizalas. E tamén nos contou que antes de traballar no CSIC axudou a Armada a realizar cartografías dos fondos mariños, calcular mareas e temperaturas para axudar ao desembarco dos soldados...
Dende logo foi unha charla ben interesante na que a rapazada descubriu un mundo novo que lle resultou moi atractivo. Mostra diso foron a cantidade de preguntas que fixeron e as valoracións que realizaron:
- “Foi unha experiencia chulísima na que aprendemos moitas cousas sobre o mar e aínda por riba déronos unha pulseira e un código QR”.
- “Sinceramente, a min gustoume moito, é moi interesante o seu traballo”.
- “A min gustoume moito a explicación e que todos os homes e mulleres poden traballar na ciencia aínda que durante moitos anos iso non pasara. En xeral, gustoume moito este traballo”.
Ademais ao rematar a charla, Patricia e Juan, agasallaron aos rapaces e rapazas cunha pulseira e un adhesivo coa recomendación do Documental “El futuro del Océano” , que podedes desfrutar pulsando sobre o seu nome.
Moitas grazas pola vosa colaboración, Juan e Patricia.
No hay comentarios:
Publicar un comentario