21 dic 2016

FELICITACIÓN DE NADAL

A COMUNIDADE EDUCATIVA DO SEIS DO NADAL DESÉXAVOS QUE NO ANO 2017 A EMOCIÓN DA LEDICIA ENCHA TODAS AS VOSAS VIDAS.

18 dic 2016

GUÍA DE LECTURAS DE NADAL

Nadal é tempo de ilusión, de agasallar, de soñar, de compartir , de lecer, de xogar,... e tamén de ler.

Estas son as lecturas que traballaremos á volta de vacacións centradas no proxecto deste curso, viaxando polo mundo e as emocións.
Tamén recollemos neste tríptico libros de Agustín Fernández Paz e recomendacións de poesía e música para ler en familia.

Contaremos coa presenza dos autores/as e contacontos que compartirán momentos especiais con nós para falarnos dos seus libros.
"Para viaxar lonxe, non hai mellor nave que un libro”
(Emily Dickinson)

E neste Nadal emociónate coa lectura!!!!

12 dic 2016

CHEGOU O NADAL

Para ambientar este tempo de nadal, creamos un recanto moi acolledor presidido por unha cheminea e unha butaca na que sentar a facer as nosas lecturas da selección que fixo a biblioteca sobre o Apalpador, os Reis Magos, Papa Noel , historias e contos do Nadal.

8 dic 2016

CAIXAS VIAXEIRAS

Esta semana comezaron a súa andaina dúas caixas cun tesouro viaxeiro: diversos  materiais nos que descubriredes , viaxando polo mundo, as emocións de coñecer outros modos de vivir.
Os voluntarios/as da biblioteca foron os encargados/as de levalas  e presentalas ás dúas primeiras clases que poderán disfrutar delas.

Estarán nas aulas unha semana e transcurrido ese tempo  viaxarán polas outras e así todos e todas poderemos vivir e sentir novas emocións.

Desexámosvos unha emocionante viaxe!!!!

6 dic 2016

NOVIDADES

Novas lecturas que temos na biblioteca e que agardan por vós: libros para viaxar e coñecer outras culturas, poesía, lecturas que nos emocionan, cómics,...
Emociónate e descubre!!!!!!

30 nov 2016

CULTURGAL 2016

"Cultura, Comunidade, Futuro"
Este é o lema da novena edición de CulturgalFeira das Industrias Culturais, que se celebrará os días 2, 3 e 4 de decembro de 2016 no Pazo da Cultura de Pontevedra.
Ademais de poder achegarte aos máis de 80 stands adicados ao libro, música, teatro, audiovisual, infantil,.... 

Culturgal conta cun programa de ao redor de 120 actividades propias durante os tres días: concertos, espectáculos familiares, encontro con escritores/as , películas e outros productos culturais.

Acollerá tres espectáculos especiais protagonizados por SonDeSeu, Budiño e María Fumaça.

En Culturgal haberá lugar para a arte contemporánea a través da exposición " Pegadas na terra", na que 18 artistas galegos/as amosan diferentes vías de achegarse á natureza.

Existe un servizo de visitas guiadas en lingua de signos para aquelas persoas que o demanden.


Ligazón ao PROGRAMA:

28 nov 2016

O PAPAGAIO: XORNAL ESCOLAR MENSUAL

Xa temos na nosa biblioteca os números 1 e 2  do xornal escolar mensual "O Papagaio" de Edicións Moito Conto.


Nel trátanse temas como: actualidade, banda deseñada, ecoloxía, ciencia, tecnoloxía, historia, cultura,.....


Pasade pola biblioteca e botádelle un ollo!!!

27 nov 2016

DÍA CONTRA A VIOLENCIA DE XÉNERO

Ao longo desta semana estivemos traballando o tema nas aulas con contos , presentacións e vídeos cos que reflexionamos.
Escribimos distintas mensaxes e a pancarta co lema "Coordinámonos para vivir sen violencia de xénero".
O venres 25, despois do recreo, todas e todos fomos ao pavillón para facer un acto colectivo.
 Colocados  por grupos, o alumnado de segundo a sexto representou unha escenografía con vasos de cores e coa que manifestamos o noso rexeitamento ao maltrato.
Cando soaba a música o alumnado de infantil e primeiro levantaban os lazos .

Cada curso foi deixando os lazos pequenos nunha caixa mentras o alumnado de sexto cubría un lazo grande.

Despois colocamos no vestíbulo do centro a montaxe co lazo e as mensaxes.


21 nov 2016

LECTURAS E RECURSOS PARA O 25 N

Estas son as lecturas que recomendamos para traballar e reflexionar sobre o tema e que podedes atopar en exposición  na biblioteca.


Información e recursos nas seguintes ligazóns:

-Recompilación da Biblioteca Víctor Sáenz
-ONU

16 nov 2016

O NOSO MAGOSTO

O día de San Martiño o tempo acompañounos e poidemos  disfrutar da festa do Magosto.
Adornamos a entrada cun mural coas castañas viaxeiras que decoraron o alumnado e as familias.

Primaria saltou ao ritmo das combas  e educación infantil e primeiro organizaron varias estacións de xogos: levar a castaña nunha culler e encestala nun cubo, tragacastañas,....

Todos xuntos bailamos "A bicicleta". E como remate o xogo dos globos en parellas.

Despois de tanto  esforzo, chegou a hora de comer as castañas que nos tiñan preparadas as mestras!! Riquísimas!!! A repoñer forzas e a tiznarnos as caras!!!!

Foi unha xornada moi divertida!!!!

7 nov 2016

RECURSOS PARA O MAGOSTO

 Esta semana estamos preparando todo para celebrar o Magosto o vindeiro venres 11 día de San Martiño.

Faremos xogos coas combas, coas castañas, baile con globos, tiznarémonos,...

O alumnado terá que aportar castañas xa amoxetadas para que non estouren e leña e ese día traer roupa cómoda.


Deixamos varias ligazóns con recursos para traballar o tema

Recompilación
Biblioteca
Víctor Sáenz

Recompilación
Biblioteca Outeiro de Matilda

Presentación Tempo de Magostos
Lecturas para esta data que atoparedes en exposición na biblioteca

4 nov 2016

DÍA DA CIENCIA EN GALEGO

O Día da Ciencia en Galego  2016 , 4 de novembro, céntrase nunha  temática, os legumes, en sintonía coa celebración no 2016 do Ano Internacional dos Legumes.

Moitos descubrimentos científicos xiraron arredor deste tema e o máis sobresaínte é o das leis de Mendel que as descubriu estudando a herdanza nos chícharos, razón pola cal o cartel do día da Ciencia en Galego trata o tema de Mendel e as súas tres leis.
O homenaxeado galego, Cruz Gallástegui, considérase o introdutor da xenética non só en Galicia, senón en España.
Nas seguintes ligazóns atoparedes información sobre o tema:

Unidade didáctica sobre Cruz Gallástegui
Album da Ciencia.Cultura Galega

3 nov 2016

NOVEMBRO,MES DA CIENCIA EN GALEGO NAS BIBLIOTECAS

Promóvose a celebración de novembro como MES DA CIENCIA EN GALEGO NAS BIBLIOTECAS en apoio da presenza da divulgación científica en galego en todas as bibliotecas.
A autora do manifesto é a arquitecta Isabel Aguirre de Urcola, Premio de Ciencia "María Josefa Wonenburger"(2015) , insistíu na importancia das bibliotecas como espazos de depósito do coñecemento, na diferencia entre información e coñecemento e na importancia de aprender a ciencia en galego nas escolas. Incidíu na sorte que temos os galegos de podermos contactar na nosa lingua con millóns de persoas por todo o mundo " algo que deberíamos darlle máis valor ". 

31 oct 2016

ACTIVIDADES POLO SAMAÍN

A última semana de outubro ambientamos a biblioteca convertíndoa nun espazo para tremer de medo.
O alumnado voluntario contounos dous contos: "Corre corre, cabaciña"  e " Tío Lobo"
Bruxas, vampiros, momias, cabazas,.... foron os protagonistas das lecturas  e das postais que decoraron para un samaín de medo!!!!


30 oct 2016

SAMAÍN NO SEIS

Para celebrar o Samaín montamos na entrada do centro  unha exposición coas cabazas decoradas  polo alumnado e polas familias que representaban diferentes países do mundo : Inglaterra, Francia, China,... seguindo o noso proxecto viaxeiro.



Grazas ás familias pola vosa colaboración, creatividade e imaxinación!!!!

26 oct 2016

PROGRAMA SEMANA DE MEDO

Este é o Programa  para esta semana de Samaín
Exposición de cabazas
Un curso máis solicitamos a vosa colaboración e coas cabazas que decoredes cos  vosos  fillos e fillas montaremos unha exposición

Postal terrorífica
Facer unha ilustración sobre o medo en formato cartulina e escribir unha mensaxe en galego
Contacontos
Nos recreos do 26, 27 e 28 de outubro o alumnado voluntario contará  historias que nos farán tremer de medo!!!!!
Lecturas de medo
Xa temos en exposición todos os libros relacionados co medo na biblioteca e no vestíbulo. Neste samaín pasarémolo de medo...lendo!!!!! 

25 oct 2016

CELEBRAMOS O DÍA DA BIBLIOTECA

Para celebrar o Día da Biblioteca organizamos o horario para que as distintas clases pasaran pola biblioteca para desenvolver varias actividades:

-Ver a exposición de novidades
-A partir dos índices cada aula seleccionou e fixo unha lectura do libro "A volta ao mundo en oitenta contos"
-Recolleron as mochilas viaxeiras que iniciarán a súa andaina esta semana agardando o seu disfrute por parte das familias.
Van acompañadas dunha carta na que se explica o seu funcionamento e un listado do material .

Un caderno viaxeiro, espazo en branco para que enchades con debuxos, suxerencias, aportacións e comentarios que vos xurdan ao redor dos documentos que vos entregamos.


-Entrega dos carnets e das bolsas viaxeiras ao alumnado de educación infantil de tres anos.

20 oct 2016

CARTEL E PREGÓN DÍA DA BIBLIOTECA

Dende 1997, e cada 24 de outubro celebramos o Día da Biblioteca. A proposta xorde da Asociación Española de Amigos do Libro Infantil e Xuvenil, en colaboración co Ministerio de Educación, Cultura e Deporte  co obxectivo  de concienciar á sociedade da importancia  da lectura e como homenaxe e recoñecemento á labor dos bibliotecarios/as.

Cada ano encárgaselle a un escritor/a  e ilustrador/a a redacción do pregón e o diseño do cartel que se difunde entre todas as bibliotecas. Este ano as autoras seleccionadas son Ledicia Costas e Elena Odriozola, Premio Nacional de Literatura Infantil e Ilustración 2015, respectivamente.
(Preme na imaxe para acceder ao pregón)

"Un vagalume é unha illa diminuta extraviada na noite máis densa. Cen vagalumes, unha constelación misteriosa que marca o rumbo cara a outros universos. Así, con esa estratexia de luz, organízanse os libros que moran nas bibliotecas. Son aloumiños fosforescentes que incendian os soños e recompoñen os corazóns grises ata facelos recobrar o seu vermello brillante. Calquera individuo que padeza a síndrome do corazón gris, debería poñerse en mans dun experto e visitar unha biblioteca......."

19 oct 2016

BIBLIOTECA ESCOLAR,TERRITORIO DAS ARTES

 "Biblioteca escolar, territorio das artes" é o lema elixido este curso para o cartel da campaña  anual de bibliotecas escolares.
A imaxe creada por Minia Regos garda moitas sorpresas para as lectoras e os lectores; propón un xogo de exploración e aventura por este "territorio" complexo e engaiolante que é toda biblioteca escolar.

Biblioteca escolar, territorio das Artes convida a explorar fórmulas para espertar nos lectores e nas lectoras o interese por achegarse e apreciar os produtos artísticos, pero sobre todo  a experimentar o pracer de expresarse a través da música, a pintura, a arquitectura, a danza, o teatro, a literatura, a escultura, as artes visuais (cine, cómic, fotografía, videocreacións, videoxogos).


17 oct 2016

BENVIDA AO CURSO 2016-2017

Xa estamos de volta!!!!

Benvidos e benvidas a un novo curso  no que viaxaremos polo mundo, coñecendo diversas  culturas, e  tamén  ás emocións que sentimos e experimentamos en cada momento.


Dende os primeiros días do mes de outubro a biblioteca xa abriu as súas portas con actividades diversas dirixidas a toda á comunidade educativa.

Se grandes aventuras queres vivir á biblioteca terás que vir!!!

3,2,1,.....Comenza a viaxe!!!!

7 jul 2016

LECTURAS PARA O VERÁN

Xa estamos en vacacións tempo de descanso, de xogos, de pasear pola praia, de sol,....tempo de lecer , de aventuras, de viaxes,....e tamén de
 momentos para desfrutar coa lectura dun libro.
Esta é unha escolma de libros para estas datas
Boas vacacións!!! E neste verán non esquezas meter na túa maleta un libro!!!

8 jun 2016

VISITA DE FINA CASALDERREY

Hoxe recibimos a visita de Fina Casalderrey que compartiu co alumnado de quinto unha sesión para falar do seu libro "A historia da bicicleta dun home lagarto".
Fina falounos das súas experiencias e da importancia das palabras e das verbas,... respostando  ás diversas preguntas que o alumnado lle fixo : en que se inspirou para escribir o libro, sobre os personaxes e a historia,...

Fixémoslle entrega dun agasallo e asinou nos exemplares dos alumnos/as e no libro de lembranzas.
Grazas Fina por compartir con nós o teu tempo!!!!


1 jun 2016

LECTURAS COMPARTIDAS NA BOUZA

Para celebrar o mes do libro , o alumnado de terceiro do Cep Celso Emilio Ferreiro e o alumnado de catro e cinco anos do Seis do Nadal, fixemos unha actividade de lectura compartida no parque da Bouza.
Os grupos de terceiro recitaron poemas de Cantarolas de Xosé Neira Vilas e os grupos de infantil recitaron "Parece unha rosa" de Rosalía e "O astronauta" de Manuel María. Despois os maiores apadriñaron os máis pequenos lendo un libro en galego.

Rematamos esta bonita xornada agasallándonos uns marcapáxinas!!!


22 may 2016

CONTACONTOS

O xoves 19 de maio o alumnado de primeiro disfrutou dun contacontos da man de Iago López nunha actividade de animación á lectura co libro "Augusta e os seus medos".
Augusta é unha nena que está chea de soños, pero é tan medrosa que non consegue que ningún se lle cumpra. Ten medo a voar, medo a que se rían dela, medo a probar cousas novas...Un día, cansa de sentirse así, pídelles axuda aos seus pais. A partir dese momento, terá que pasar diferentes probas para decatarse de que a única forma de superar os medos é enfrontándose a eles.
Pasamos un rato moi divertido!!!!

19 may 2016

TRABALLOS SOBRE AS LETRAS GALEGAS

Na Semana das Letras Galegas, estivemos realizando diversas actividades sobre o autor homenaxeado MANUEL  MARÍA
No vestíbulo do cole montamos murais que decoramos cos seus poemas e libros . Un retrato feito por un compañeiro  xa xubilado e unha dedicatoria de Manuel María cando visitou o centro no ano 1992.

Para achegarnos a súa vida e obra proporcionamos  diversos recursos para que o profesorado poidera traballalo nas aulas.
Confeccionamos un díptico sobre o autor que se entregou ás familias.
Realizamos caligramas, ilustramos e fixemos debuxos dos seus poemas, recitamos os seus versos, retratos, actividades en liña,...

Recollemos nesta presentación unha pequena escolma dos distintos traballos