BUSCAMOS AXUDANTES

Se queres organizar, ler, colaborar... coa biblioteca e estás en 6º de Primaria, agardámosvos no recreo do mércores 2 de outubro para informarvos do seu funcionamento. Animádevos!!!

PROXECTO DOCUMENTAL ANUAL

Este curso o Seis convértese nunha Feira Artesanal co obxectivo de coñecer os nosos oficios tradicionais (cesteir@s, redeiras, carpinteir@s, zoqueir@s, oleir@s...) e a súa relación coa artesanía actual. 

Trasmitir ao noso alumnado o valor dos mesmos relacionado co noso patrimonio cultural e, ao mesmo tempo, o vinculamos cun consumo responsable, que aproveita os recursos de proximidade e a produción local.

Un proxecto no que seguiremos a traballar por un futuro sostible, reutilizando e dándolle unha segunda vida a materiais que xa temos e colaborando conxuntamente para acadar os Obxectivos ODS da Axenda 2030.

Tamén crearemos coas nosas mans obxectos artesanais de todo tipo.

Agardamos contar coa vosa colaboración nas distintas actividades de investigación e creación propostas dende o cole!!!

CLUBS DE LECTURA

Voltan os Clubs de Lectura do Seis!!!

Si estás en 5º e 6º de Primaria e queres participar, agardámoste o vindeiro venres 20 de Setembro no recreo. Explicaremos a súa organización e funcionamento. Animádevos a participar!!!

BIBLIOTECA ESCOLAR, A ESCENA!

O cartaz que acompañará as bibliotecas escolares de Galicia neste curso  "Representa unha obra teatral do poema de Xohana Torres "Eu tamén navegar", no que Penélope (da Odisea) deixa o tapiz que traballa e desfai e sae a vivir aventuras. Despois ao regreso remata o tapiz engadíndolle novos elementos da súa viaxe (o tapiz que hai detrás da nena que está a leer a obra teatral)" segundo indica a súa autora, a ilustradora e muralista Xoana Almar. 

PENÉLOPE

DECLARA o oráculo:

   «QUE á banda do solpor é mar de mortos,

   incerta, última luz, non terás medo.

   QUE ramos de loureiro erguen rapazas.

   QUE cor malva se decide o acio.

 

   QUE acades disas patrias a vindima.

   QUE amaine o vento, beberás o viño.

 

   QUE sereas sen voz a vela embaten.

   QUE un sumario de xerfa polos cons.”

 

Así falou Penélope:

   “Existe a maxia e pode ser de todos.

   ¿A que tanto novelo e tanta historia?

 

   EU TAMÉN NAVEGAR.»

Torres, Xohana (1992). Tempo de ría. Espiral Maior

Unha imaxe enraizada no cartelismo galego que abre as portas a traballar o teatro en todas as súas variantes. 

As nosas bibliotecas escolares saen a escena para ler, interpretar, radiar, escribir e gozar co TEATRO.

FONTE: BIBLIOTECAS ESCOLARES

CURSO 2024/2025

A CURTAMETRAXE DE 1º

O alumnado de 1º de Primaria estivo traballando nun proxecto cinematográfico incrible.

A súa curtametraxe titulada “A colleita de ratiño do Seis do Nadal” é unha obra maestra de imaxinación e de traballo en equipo. Os nenos e nenas asumiron diversos roles na produción, dende cámaras que capturaron cada movemento ata dobladores que deron vida aos personaxes. Tamén construiron escenografías detalladas manexando o son e a iluminación e moito máis.

O proceso de creación foi unha experiencia enriquecedora dende o comezo ata o final. Os nenos e nenas aprenderon sobre o traballo en equipo, a creatividade e a importancia da perseverancia e a paciencia. Desenvolveron habilidades técnicas e artísticas e descubriron o poder da narración visual.

Demostraron que con esforzo, dedicación e un pouco de maxia todo é posible.

As familias tamén participaron neste proxecto, na decoración das esceas.

ROBÓTICA EN EDº INFANTIL

Educación Infantil realizou, ao longo do curso, actividades de programación para iniciarse no uso das botoeiras de robots como o Escornabot, o Tale-bot e o Code&Go, co fin de traballar as nocións espaciais básicas a través das conmemoracións e outras temáticas (entroido, os números, as cores, as formas...).

Ademais, fixeron unha introdución á codificación con cores mediante a programación do Ozobot completando circuitos relacionados co Día da Paz e os seus símbolos.

GUÍA DE LECTURAS PARA O VERÁN

Estamos rematando o curso e chegan as vacacións, tempo para descansar, ir á praia, ao monte, viaxar... e tamén para ler!!!

Presentamos a nosa Guía de Lecturas para que pasedes "Un verán de película".

Narrativa, banda deseñada, libros informativos e música, son as nosas recomendacións para que disfrutedes no voso tempo de lecer.

Colabora co comercio local e merca nas súas librarías!!!

Bo verán!!! 

Guía de verán de Biblioteca Seis do Nadal

DESPEDIMOS OS CLUBS DE LECTURA

Os nosos Clubs de Lectura de alumnado remataron o martes 18 de xuño cunha xuntanza na que compartimos as nosas impresións sobre esta experiencia e a entrega de diplomas.

Recollemos as súas opinións sobre o seu funcionamento:

-Unha experiencia interesante por compartir cos compañeiros e compañeiras momentos e opinións sobre os libros lidos.

-Os encontros literarios cos autores, Pere Tobaruela, Xabier Domínguez e Pablo Prado.

-A visita ás dúas librarías.

-Os libros máis valorados: "Nerea. A invasión dos trastos" e "A Señorita Bubble. Baixo cero" (5º) e, "Unha veciña de película" (6º).

Moitas grazas a todos e todas por participar!!! Ata o curso que ven!!!

SELO BIBLIOTECA ESCOLAR SOLIDARIA

A nosa comunidade educativa está de noraboa!!!

Concedéronnos o “Selo Biblioteca Escolar Solidaria” neste curso 2023-2024, que recoñece e pon en valor aquelas bibliotecas que atenden as necesidades dos integrantes da comunidade educativa en materia de lectura e acceso ao coñecemento.

Este selo é un distintivo de calidade en termos de traballlo solidario a favor da comunidade educativa, no ámbito da lectura e as compensacións das desigualdades no acceso aos bens culturais e que conta con alumnado e familias voluntarias que contribúen á xestión e dinamización da biblioteca.

Esto foi posible grazas á colaboración e implicación de todas as persoas que formamos esta comunidade educativa. Nesta gran familia do Seis todos e todas contamos!!!

A Directora Xeral de Ordenación e Innovación Educativa Judith Fernández visitou o noso centro e fixo entrega do recoñecemento do Selo cun diploma que recolleron Martina, Nicolás, Breogán e Noa, en representación do voluntariado.

Parabéns a toda a comunidade educativa!!!