OBRADOIRO DE PROGRAMACIÓN: FELICITACIÓN DE NADAL

Fomentar o coñecemento das nosas tradicións é fundamental para garantir a súa supervivencia; por iso, neste mes de decembro o alumnado de 5º de primaria participou nun obradorio de Scratch para achegarse a figura do Apalpador.

Neste obradoiro de programación que se realizou en galego para fomentar o uso do noso idioma no eido das ciencias, o alumnado tivo que programar unha postal de Nadal na que o protagonista foi o Apalpador, que este ano vén cargadiño de castañas.

 

A continuación podedes desfrutar dun exemplo desas postais e quizáis vos animedes a personalizala para enviarlla a amigos e familiares.

 

BO NADAL !

GUÍA DE LECTURAS NADAL 2024

Achegamos a nosa Guía de Lecturas cos libros que traballaremos nas aulas despois das vacacións de Nadal. Os autores e autoras compartirán co alumnado momentos para falar dos seus libros.

Tamén inclúe recomendacións para as familias de libros e xogos de mesa.

Preséntase en dous formatos: nun tríptico e en Canva.

Colabora co comercio local e merca nas súas librarías!!!

Neste Nadal moi artesanal agasalla libros!!!

Guía de lecturas Nadal 2024 de Biblioteca Seis do Nadal

CINE DE NADAL

Neste mes de decembro tivemos novas sesións de “Cine na Biblio”. De 3º a 6º de Primaria foron o venres 13, na hora do recreo, a ver Tabby McTat, unha adaptación do conto de Julia Donaldson e Axel Scheffler, sobre un gato que perde ao seu dono antes do Nadal.

As máis pequenas e pequenos do cole, o luns 16, puideron divertirse cunha das historias do “Raposo Grande e Malo”. O filme é unha adaptación das obras de banda deseñada de Renner. Dentro deste filme proxectamos o conto “Hai que salvar o Nadal”.

UN NADAL ARTESANAL

As aulas de 5º e 6º de Primaria foron as encargadas da decoración de nadal do vestíbulo.

O cartón foi o material empregado para facer un mercado artesanal, con casas e diferentes adornos feitos con fios, cordeis, botes, madeira... elementos reciclados ou naturais. 

As familias tamén colaboraron nesta decoración aportando diferentes adornos para a nosa Feira Artesanal de Nadal. Momentos para compartir creatividade e imaxinación entre toda a Comunidade Educativa nestas datas cheas de maxia e ilusión.

EXPOSICIÓN TEMÁTICA DE NADAL

Con motivo do Nadal, o Equipo de Biblioteca, fixo unha selección de fondos bibliográficos sobre historias, contos e personaxes destas datas:  o Apalpador, Reis Magos, Papa Noel, agasallos... cos que organizamos unha exposición chea de maxia!!!

"DISCAPACIDADE E NADAL" NA RADIO DO SEIS

O día das persoas con discapacidade e as tradicións de Nadal, son os protagonistas deste cuarto programa da Radio do Seis.

A clase de 5ºB preparou un programa con música e informacións sobre estas dúas conmemoracións.

Desfrutade desta nova entrega!!!

OBRADOIRO DE NARRACIÓN ORAL

O martes 10 de decembro, o voluntariado da biblioteca contou cun obradoiro de narración oral da man de Charo Pita.

Un obradoiro dinámico que comenzou cun xogo no que memorizou os nomes de todos os nenos e nenas e no que xurdiron moitas historias diferentes e divertidas.

Falou da importancia das palabras, da posición corporal, dos xestos, do silencio... deunos ferramentas que temos que ter presentes para contar e narrar de viva voz.

Un xogo no que todos e todas desfrutamos desta sesión e que os nosos voluntarios e voluntarias terán en conta para ser grandes narradores de historias e contos. Pasárono xenial.

Grazas Charo!!!

TANXARIÑA CON "TITIRICIRCUS"

O luns 9 de decembro, desfrutamos dun espectáculo de teatro de marionetas con TANXARINA coa representación de “TITIRICIRCUS”.

É a historia de dous traballadores do circo que recordan con marionetas de fíos o pasado da pista circense.

Ao longo da función foron aparecendo diferentes números: o home máis forte da Península Ibérica, o señor Bigotini, a serpe Josefina e o encantador Palindranat, o malabarista señor Tato, o monociclista do espectáculo, o señor Venancio... que contaron coa implicación do público entusiasmado.

Agasallaron cun exemplar asinado do libro “Titiricircus”, Ed. Kalandraka para a biblioteca.

Moitas grazas Tanxarina!!!

CHARLA DISCAMINO

O 5 de decembro visitaron o noso centro 7 persoas da asociación DisCamino.

Na semana na que ten lugar o “Día das persoas con diversidade  funcional”, compartiron co alumnado de 5º e 6º de Primaria as súas historias persoais  e o importante papel que ten DisCamino no seu día a día, esforzándose diariamente por alcanzar as súas metas.

Moitas grazas por acompañarnos e compartir con nós estas fermosas experiencias!!!

2ª XUNTANZA CLUB DE LECTURA 5º

Continuamos coas xuntanzas dos clubs de lectura.

O xoves 5 de decembro, o Club de Lectura de 5º reuniuse na biblioteca para conversar sobre “A Señorita Bubble. Baixo cero”, de Ledicia Costas.

Nesta ocasión preparamos un taboleiro de xogo, con imaxes e números, e a través dun robot contestar ás distintas preguntas sobre a lectura.

Tamén comentamos os personaxes, a temática e a imaxe de Papa Noel. Foi unha lectura que lles encantou!!!

O vindeiro libro será "Maxia de pedra" de Xabier Domínguez. 

BIBLIOLAB: "REDEIRAS"

No mes de novembro, as actividades que se desenvolveron na BiblioLab tiveron como eixo temático o mar e o oficio das “Redeiras”.

XOGOS DE PESCA SEN REDE

Diferentes xogos: Collemos as canas e tentamos ser o pescador/a que colle máis peixes.

Coa baralla de cartas tentamos ser o xogador/a que pesque máis grupos seguindo as instrucións.

PESCAMOS NOS LIBROS

Buscamos nos libros os distintos tipos de redes que tecen as redeiras.

ANTES E AGORA

Observamos as imaxes de como cambiou o oficio das redeiras. Tecemos entre todos unha rede co material que nos proporcionan.

A PROFUNDIDADE DO MAR

Compoñemos os distintos quebracabezas mariños.

ROBÓTICA

Xogo de parellas de imaxes relacionadas coas ferramentas e o vocabulario do oficio de redeiras.

Á ABORDAXE

Subimos a bordo das historias de piratas. Buscamos as imaxes que hai na lámina e inspirámonos para inventar a nosa historia.

FACEMOS BARCOS

Collemos un folio e seguindo as instrucións facemos barcos de papiroflexia.

DÍA DAS PERSOAS CON DISCAPACIDADE

Para conmemorar o 3 de decembro, “Día das persoas con disCAPACIDADE” contamos coa presenza de Marisol Bravos, mestra e escritora que compartiu unha charla con alumnado, familias e profesorado.

Presentounos o seu libro “Unha historia de superación”, na que conta a súa vida, dende os seus inicios nos que sufriu a enfermidade da polio e todo o proceso, o apoio da súa familia, como os seus pais lle ensinaron a ler e escribir, fixéronlle os bastóns para poder desprazarse, cursou o bacharelato e fixo maxisterio. Exerceu a docencia no ensino público durante 37 anos.

Traballa pola accesibilidade, a eliminación de barreiras arquitectónicas e a inclusión.

Un exemplo de loita e superación!!!

Agasallounos cun exemplar do seu libro que asinou para a biblioteca. Moitas grazas Marisol!!!

Dende o Equipo de Biblioteca fixemos unha selección de lecturas sobre diversidade e  inclusión.

OBRADOIRO DE OLARÍA

Continuamos traballando co PDI deste curso “Feira artesanal” e o venres, 22 de novembro, o alumnado de segundo de Primaria tivo a sorte de desfrutar dun obradoiro de olaría impartido por unha nai ceramista de 2ºB, María Gómez, que nos ensinou a modelar o barro no torno ata convertelo en pezas como cuncas.

Despois o alumnado modelou unha peza, con forma de peixe, con pasta de modelar de secado rápido que, unha vez seco, pintaron na aula.

Ao final, cada alumno e alumna que quixo tivo a oportunidade de probar a modelaxe de arxila no torno e fixeron varias pezas de distintas formas entre todos e todas.

Foi unha experiencia xenial crear algo coas túas propias mans! Moitas grazas, María!

25N NO SEIS DO NADAL

“Tecendo redes coa igualdade” foi o lema que centrou as actividades e o acto colectivo que se desenvolveu para esta data, 25 de novembro, Día Internacional da eliminación da violencia contra a Muller.

Selección de lecturas que tivemos en exposición para ler, pensar e reflexionar.

Xa na pista e cos nosos petos violetas formamos círculos bailando e cantando a canción “Abre as xanelas” de Lupe Ces e Raquel Domínguez, co retrouso en lingua de signos.

Cada clase decorou os banderíns con elementos de mulleres artesáns empregando diferentes materiais  que recollen a súa importancia nos oficios tradicionais.