OBRADOIRO DE PROGRAMACIÓN: SIMULACIÓN DOS MOVEMENTOS DA TERRA E DA LÚA

Con motivo do mes da ciencia en galego adicado este ano a astronomía e a figuras como Galileo e Enrique Vidal Abascal, o alumnado de 4º e 6º de Primaria participaron nun obradoiro de programación con Scratch.

Tras coñecer o motivo de por que se celebra esta conmemoración e coñecer o soño de Galileo a través do seguinte vídeo: A historia de Galileo Galilei, o alumnado programou unha pequena animación na que simulou o movemento de translación da Terra e da Lúa, repasando así a súa vez aspectos astronómicos traballados con anterioridade e outros conceptos matemáticos (direccionalidade, xiros, coordenadas...).

Tamén traballaron a biografía de Galileo.

PROGRAMA DE RADIO: PATRIMONIO, CIENCIA E 25 N

O patrimonio, o mes da ciencia e o 25N son os protagonistas do terceiro programa da Radio do Seis.

A clase de 5ºC preparou un programa con información sobre estas conmemoracións.

Desfrutade desta nova entrega!!!

CONTACONTOS POLA IGUALDADE

O voluntariado da Biblioteca preparou dúas lecturas para contar ao alumnado de 1º de Primaria  con motivo da conmemoración do 25N. Grazas polo voso traballo!!!

Os libros seleccionados foron:

Las chicas y los chicos también…¡pueden! Ed. Astronave

Unha lectura que da ferramentas aos nenos e nenas para que non teñan medo de ser quen son.

¡No me mires así! Ed. Tramuntana

Un libro que fala das diferencias e de que cada un de nós é único e diferente.

CULTURGAL 2024

Culturgal, a Feira das Culturas Galegas, celebra a súa 17ª edición no Pazo da Cultura de Pontevedra do 29 de novembro ao 1 de decembro.

Un lugar de encontro entre os públicos e artistas, profesionais e institucións. Un espazo para poñer en contacto a creadores e compañías con profesionais da xestión cultural, programadores, empresas e institucións. Os expositores da Culturgal son o corazón e o motor da Feira.

Ademais dos mais de 100 expositores, haberá unhas 200 actividades como presentación de libros, espectáculos musicais, contacontos, obradoiros, teatro, cine, danza, videoxogos...

O horario será de 11,30h a 21,00h.

Contaremos coa presenza de Manuel Rivas, Premio Nacional das Letras 2024 e con actuacións como “A nena e o grilo, o camiño das cores” de Magín Blanco e Ghazafellos.

Ligazón ao Programa

https://cultur.gal/wp-content/uploads/2024/11/ProgramaCulturgal2024-7.pdf

Máis información na páxina https://cultur.gal/

XOGANDO CON BRAZOLINDA

O luns 25 de novembro, desfrutamos dunha tarde de xogos en familia con Brazolinda.

Descubrimos novos xogos que nos foron explicando Irimia e Alegría e tamén coñecemos que materiais e tipos de madeira empregan no seu deseño e creación.

Grazas as todas as familias da nosa Comunidade Educativa que vos animastes a participar nesta iniciativa!!!

COUSTEAU. DESCUBRIDOR DOS MARES

Na clase de 6º de Edº Infantil B, continúan coa investigación sobre os mares. Facendo preguntas como: Quen os descubriu? Como sabemos que existe vida neles?

Dende a biblioteca proporcionaron  o libro “Genios de la ciencia. Cousteau. El descubridor de los mares”, Ed. Vegueta, que permitiu dar resposta a estas preguntas.

Leron o conto, falaron sobre os seus inventos e a súa repercusión. Visitaron algunhas páxinas como o National Geographic para completar os seus coñecementos e para rexistralos completaron unha infografía cos datos máis representativos deste científico.

OBRADOIRO: ALFABETIZACIÓN OCEÁNICA

O mércores 20 de novembro o alumnado de terceiro e cuarto de Primaria participou no obradoiro de "Alfabetización oceánica. Coñecer para conservar", organizado polo Centro de Investigación Mariña e o Campus do Mar da Universidade de Vigo.

A través de diferentes estacións de traballo manipulativo, puideron coñecer as características principais dos nosos océanos, investigar sobre os ecosistemas mariños e os animais que neles habitan, traballar con lupas electrónicas, afondar no coñecemento dos seres mariños grazas a microscopia e tamén recoñecer a importancia de manter as praias limpas (peneirando e clasificando os residuos que podemos atopar nelas).

Pasárono xenial e aprenderon unha chea de cousas. Moitas grazas Yolanda por este obradoiro!!!

GUÍA USUARI@S DA RADIO

Guía Radio Biblioteca Seis do Nadal

O PRESTIGE

Un 13 de novembro de 2002, vertéronse nas costas galegas 77 mil toneladas de petróleo. Unha catástrofe natural coma esta ten que recordarse para que non volva suceder, por iso, o alumnado de 6º de Edº Infantil B traballaron na aula sobre o tema: falaron e lembraron o que aconteceu co Prestige, para despois, nunha especie de “Libriño acordeón”, crear a súa versión do acontecido, a través do debuxo e da narrativa.

Ademais exploraron a viscosidade do chapapote, e aproveitando que estamos no mes da ciencia, recordamos que necesitamos para “crear” este fluido non newtoniano: maicena, auga e cor negra para asemellar ao chapapote.

Tamén leron o conto “¡Nunca máis! A ollada da infancia". Ed. Kalandraka.

XOGOS DE MESA EN FAMILIA CON BRAZOLINDA

O vindeiro luns 25 de novembro as familias estades convidadas a xogar con BRAZOLINDA.

Entre as 16,30h e 18,30h poderedes pasar pola biblioteca, na que haberá diferentes xogos de mesa, para que xoguedes en familia, cos vosos fillos e fillas. Cada xogo será explicado por persoal de Brazolinda.

Non hai que anotarse previamente!!! 

Brazolinda é un proxecto de deseño e fabricación de xogos de mesa en galego que naceu no ano 2014. Os xogos están pensados para que poidan xogar xuntos grandes e pequenos, xa que o xogo en grupo e/ou en familia é unha actividade moi enriquecedora tanto dende o punto de vista da aprendizaxe de actitudes, dinámicas, habilidades motrices e mentais, potencia a concentración, o razoamento, a cooperación...

Tedes máis información na seguinte ligazón

https://brazolinda.com/gl/

Animádevos a vir xogar en familia con Brazolinda!!!

Agardámosvos!!! Desfrutaremos dunha tarde de xogos!!!

"O MAGOSTO" NA RADIO DO SEIS

O magosto é o protagonista do segundo programa da Radio do Seis.

A clase de 6ºA preparou un programa con información sobre este festa con gran tradición.

Desfrutade desta nova entrega!!!

Os cativos e cativas de 6º Edº Infantil B, gravaron a canción “1, 2, 3 castañas”, que estiveron traballando para celebrar o Magosto.

MAGOSTO 2024

O luns 11 de novembro, día de San Martiño, celebramos o Magosto no Seis.

Desfrutamos dunha mañá chea de xogos populares (comecastañas, relevo de castañas, trompos, brincacastañas, tres pés,a castaña ardente) e de degustación das castañas. Estaban boísimasss!!!!

A música acompañounos nesta xornada festiva!!!

Pasámolo moi ben!!!

ENTREGA DE PREMIOS "AS IMAXES DO PATRIMONIO"

Este venres 15 de novembro, na véspera do Día Internacional do Patrimonio, as clases de 5º de Edº Infantil asistiremos ao acto de entrega de premios do 7º Certame “As imaxes do patrimonio” Inmaterial Galego-Portugués, convocado pola Asociación cultural e pedagóxica Ponte...nas ondas!, nunha gala musical, no Auditorio do Centro Veciñal e Cultural de Valadares en Vigo.

O noso centro participou neste certame con varias imaxes que foron aportadas polas familias e que recollen historias como: un cantar de Reis, unha noiva no seu día de voda, unha familia de ebanistas e costureiras, un avó facendo unha meda de millo, un grupo de veciños posando nunha carretera, unha familia desfrutando do domingo no pobo, tocando a pandeireta na banda municipal de Avión e unha foto para o carnet de familia numerosa.

Na categoría de Ensino Primario, recibimos un accésit coa imaxe “A vendima”, de Roi Priego.

Queremos agradecer a todas as familias da nosa comunidade educativa a súa colaboración e o seu esforzo por buscar e seleccionar entre os seus álbums familiares aquelas fotografías que conteñen elementos do noso patrimonio. Unha fermosa maneira de coñecer e preservar a riqueza do noso patrimonio, sendo portadores de historias, coñecementos e tradicións e así transmitirllo ás novas xeracións. Parabéns!!!

OBRADOIRO "FALAMOS NAS ONDAS"

O martes 5 de novembro o alumnado de 5º de Primaria participou no obradoiro “Falamos nas ondas”, con Damián Alonso e Pancho Álvarez. 

Unha xornada na que coñeceron as seccións dun programa de radio, a arte da locución, o volume e a importancia da música.

Tamén houbo actuacións musicais: un grupo de nenos e nenas tocaron e cantaron en directo dúas pezas tradicionais galegas.

Grazas a Ponte...nas ondas! por agasallarnos con este fantástico obradoiro!!!

CONTOS E LECTURAS PARA O MAGOSTO

Estamos en novembro, tempo de castañas e de magostos. O luns 11 de novembro, San Martiño, se o tempo nos acompaña, celebraremos o MAGOSTO no centro. Que ben o imos pasar!!!

Fixemos unha selección de lecturas para esta data e que podedes atopar en exposición na biblioteca.

E tamén algúns videocontos (premer sobre os títulos para acceder aos contidos).

A castaña Catarina

María a castañeira

A castaña que rebentou de risa

XORNADA DE BIBLIOTECAS ESCOLARES 2024

O sábado 9 de novembro asistiremos a Xornada de Bibliotecas Escolares de Galicia 2024.

Daranse cita equipos de biblioteca, docentes, asesores/as dos centros de formación do profesorado e persoas expertas na temática do lema deste curso "Biblioteca escolar, a escena!".

Unha xuntanza que falará do poder do Teatro como soporte para diferentes relatos, da interpretación como linguaxe poderosa... que eloxiará á biblioteca e á escola alfabetizadora; o papel facilitador da biblioteca a través dos novas linguaxes e espazos, dos proxectos, do fomento da lectura, da participación das familias, da creación de redes...

Será, novamente, unha ocasión para o encontro entre o profesorado deste amplo colectivo de docentes que poñen en pé as bibliotecas escolares galegas, o reforzo de vínculos persoais e profesionais e, con toda seguridade, o comezo de novas colaboracións para o presente curso.

Programa

FONTE: BIBLIOTECAS ESCOLARES

OS CLUBS DE LECTURA ABREN O TELÓN

Os nosos Clubs de Lectura xa saíron a escena e empezaron a súa andaina!!!

O 29 de outubro tivemos a primeira reunión co club de lectura de 5º de Primaria e, o 5 de novembro,  con 6º de Primaria.

Entregamos a carpeta coa guía do club, un marcapáxinas e escollemos as nosas primeiras lecturas: 

-“A Señorita Bubble. Baixo cero”, de Ledicia Costas, para 5º.

-"Charlie e a fábrica de chocolate", de Roald Dahl, para 6º.

Lemos a información sobre o funcionamento, organización e normas que rexiran as nosas xuntanzas.

Compartimos unhas galletas que fixeron máis doce estes momentos nos que intercambiamos as nosas opinións sobre o club de lectura. Agardan moitas sorpresas!!!

NOVEMBRO, MES DA CIENCIA EN GALEGO

“Toda sociedade precisa coñecer e interpretar o mundo para desenvolverse nel de forma satisfactoria. A ciencia é un xeito especial de coñecemento do mundo que se desenvolveu en Occidente desde o Renacemento e eclosiona coa Modernidade nos séculos XIX e XX. É responsable do noso progreso tecnolóxico e industrial, pero tamén foi da man do complexo tecno-militar desde o século XVI, da consolidación do capitalismo e da expansión colonial europea. Toda esta historia está reflectida nas bibliotecas e fan que debamos volver a elas continuamente. Tamén está reflectida na tradición oral, nos hábitos e na cultura material”.

     Felipe Criado-Boado

Desde a Consellería de Cultura, Lingua e Xuventude en colaboración coa Consellería de Educación, Ciencia, Formación Profesional e Universidades, vense impulsando a celebración anual do mes de novembro como o  MES DA CIENCIA EN GALEGO NAS BIBLIOTECAS. 

Iníciase esta actuación coa elección dunha imaxe e a difusión dun texto, a modo de MANIFESTO, de Felipe Criado-Boado, arqueólogo e director do Instituto de Ciencias do Patrimonio do CSIC. Foi premio nacional de investigación 2023.

O manifesto para este ano 2024, abrirá moitas rutas de traballo e investigación coas que poder sementar e degustar a ciencia nas nosas bibliotecas escolares.

Desde a Asesoría de bibliotecas escolares realizouse unha recompilación de recursos dixitais, relacionados coa ciencia, en galego, que se pon a disposición de todas as bibliotecas: libros e unidades didácticas descargables en formato pdf, páxinas web de institucións, museos e asociacións de profesores e divulgadores científicos, convocatorias e propostas, blogs de ciencia dos centros educativos, experiencias de bibliotecas escolares, etc. 

FOLLETO INFORMATIVO: MES DA CIENCIA EN GALEGO NAS BIBLIOTECAS

MATERIAIS: MES DA CIENCIA EN GALEGO