A clase de 6º C preparou un programa para conmemorar o 5 de xuño, Día Mundial do Medio Ambiente. Nesta ocasión contaron coa colaboración dos nenos e nenas de 6º de Infantil A, para compartir as novidades do festival de fin de curso, que se celebrará o 18 de xuño.
Durante o programa, reflexionouse sobre a importancia de coidar o planeta, reducir o lixo e respectar a natureza.
Desfrutádeo!!!
Celebramos o Mes das Letras Galegas cunha programación chea de música, cor e palabras. As actividades foron organizadas polos Equipos de Dinamización da Lingua Galega, Biblioteca e Música, que uniron esforzos para homenaxear a autora escollida este ano: Begoña Caamaño.
Durante o mes, o alumnado participou en
diferentes propostas creativas. Pintouse a bandeira galega,
realizáronse investigacións sobre a vida e obra de Begoña Caamaño, elaboráronse debuxos
inspirados nos seus libros, programas de radio…
Un dos momentos máis especiais foi a visita da
cantante Uxía Senlle, coa que o alumnado tivo a oportunidade de
cantar “Begoñísima”, unha peza que encheu o centro de emoción e orgullo
pola lingua e pola cultura galega.
Como colofón, todas as aulas participaron na
creación dun mural colectivo inspirado no libro "Begoñísima",
de Andrea Nunes, da editorial Cuarto de Inverno. Cada grupo elaborou diferentes
elementos da obra, que se uniron nun gran traballo común. O resultado foi unha
composición chea de simbolismo, creatividade e espírito de comunidade.
O Mes das Letras Galegas foi unha celebración compartida, un espazo para descubrir, cantar e crear en galego, mantendo viva a palabra e o legado de Begoña Caamaño.
Queremos compartir convosco un traballo moi
especial que realizou a clase de 3 anos B con motivo da celebración do Día das
Letras Galegas. Os nosos pequenos e pequenas prepararon un programa de radio dedicado
a homenaxear a Begoña Caamaño.
Ao longo deste programa, descubriremos a vida da escritora e xornalista viguesa, e desfrutaremos da música de Uxía, que acompaña esta fermosa homenaxe.
Agardamos que o desfrutedes!!!
Este ano o 17 de maio, Día das Letras Galegas, está adicado á escritora e xornalista viguesa BEGOÑA CAAMAÑO. Muller comprometida co feminismo, coa lingua e coa nosa cultura, Begoña destacou pola súa voz valente e pola capacidade de reinterpretar os mitos clásicos desde unha mirada feminina e contemporánea.
.png)
A súa palabra,
tanto escrita como falada, foi un acto de resistencia e de esperanza. Nas súas
intervencións públicas e nos seus textos, reivindicaba o poder das mulleres
para transformar o mundo e reescribir a historia.
Begoña Caamaño deixou unha fonda pegada na literatura galega contemporánea. A súa voz continúa inspirando ás novas xeracións.
O seu traballo na radio, o seu activismo feminista e a súa escrita
converxen nun mesmo fío: o desexo de construir unha sociedade máis xusta, libre e consciente da súa identidade.
Para achegarnos á súa vida e obra, organizamos unha exposición bibliográfica que convida a descubrir a súa traxectoria e a celebrar o seu legado como símbolo do compromiso coa lingua, a cultura e a igualdade.
A clase de 1ºB de Primaria preparou este podcast co gallo da celebración do Día das Letras Galegas, adicado este ano á escritora Begoña Caamaño.
A través dunha entrevista divertida e imaxinativa a Begoña, os nenos e nenas dan vida á autora, descubrindo aspectos da súa vida, obra e compromiso coa lingua galega, o feminismo e a cultura.
Agardamos que o desfrutedes!
A clase de 3ºA de Primaria chega cunha nova edición da Radio do Seis, dedicada nesta ocasión a unha das festas máis fermosas e tradicionais da nosa terra: a Festa dos Maios.
Coa
chegada da primavera, a natureza énchese de vida, de cor e de alegría, e os
Maios convértense nun símbolo dese renacer. Esta celebración, de orixe moi
antiga, está ligada ao mundo agrícola e serve para dar a benvida ao bo tempo e
agradecer os froitos que a terra nos ofrece.
A
través desta tradición tamén mantemos vivas os costumes populares, fomentamos a
convivencia e fortalecemos o sentimento de comunidade. Os cantos, as flores e
as creacións cheas de imaxinación fan dos Maios unha festa única e moi
especial.
Agardamos que desfrutedes desta nova entrega!
O Día do Libro celebrouse cunha función moi especial: O Gran Circo dos Libros. A nosa tradicional actividade de Madriñas e Padriños Lectores encheuse de maxia, cor e fantasía, transformando o patio nun auténtico espectáculo literario.
Baixo unha carpa imaxinaria, os libros
convertéronse en auténticos artistas: malabaristas das palabras,
equilibristas das emocións e magos das historias. Os máis maiores (3º, 4º, 5º e
6º de Primaria) asumiron o papel de padriños e madriñas lectoras, mentres que
os máis pequenos/as (Infantil, 1º e 2º de Primaria) foron o público entusiasta, disposto a deixarse levar pola maxia da lectura.
Para completar o espectáculo, os nenos e nenas máis pequenos prepararon fermosos marcapáxinas circenses, cheos de cor, que agasallaron aos seus padriños e madriñas.
A xornada deixounos momentos inesquecibles: historias compartidas, sorrisos cómplices e moita emoción. Cada lectura foi unha función única, un número cheo de maxia e amizade.
Ler é un espectáculo marabilloso!!!
O alumnado de 5º de Educación Infantil A e 2ºA de Educación Primaria elaborou un podcast moi especial para celebrar o Día do Libro.
Nesta ocasión, uníronse para compartir unha
historia chea de imaxinación e aprendizaxe: “A escada vermella”. Neste
relato, as nenas e nenos contan a historia dunha escada que non serve só para
subir, senón tamén para soñar. A través das súas voces, o conto cobra vida e
convídanos a descubrir como cada chanzo pode levar a novos mundos, aventuras e
emocións.
O 23 de abril celébrase o Día
Internacional do Libro, unha data que lembra a importancia da lectura, da
palabra escrita e da creatividade.
No noso centro, esta celebración é unha oportunidade para compartir historias, descubrir novos contos e dar protagonismo ás voces do alumnado. Desfrutádeo!!!
Hoxe 23 de abril, celebramos o Día Mundial do Libro e do Dereito de Autor. É unha ocasión especial recoñecida pola UNESCO para homenaxear a importancia dos libros e dos dereitos de autor.
Para conmemorar esta data, a Consellería de Educación, Ciencia, Universidades e Formación Profesional editou un cartel especial.
Acudiuse a unha persoa referente da literatura galega, neste caso á Doutora en Xornalismo, escritora e xestora cultural EVA MEJUTO, recoñecida polo lectorado infantil e xuvenil galego co Premio de Clubs de Lectura 2021.
Un fermoso agasallo para as bibliotecas escolares de Galicia que
convida a celebrar o libro e a lectura:
FONTE: BIBLIOTECAS ESCOLARES
A clase de 5ºA estivo traballando con moita ilusión para preparar un novo programa da nosa Radio do Seis. Nesta ocasión, o tema non podía ser outro que o Día do Circo, enmarcado no PDI deste curso.
Os micrófonos convértense en trapecios, as palabras fan malabares e as voces danzan coma auténticos artistas baixo a gran carpa da imaxinación.
Un programa con información e música sobre o mundo do circo. Unha nova aventura radiofónica que enche de cor e alegría os micrófonos do Seis. Desfrutádeo!
Como en anos anteriores, o IBBY promove a celebración do Día Internacional do Libro Infantil o 2 de abril, conmemorando o nacemento de Hans Christian Andersen.
O obxectivo é promocionar os bos libros infantís e xuvenís e a lectura entre os máis novos.
En 2026, o país elexido é Chipre, e
o cartel fixérono dúas creadoras de libros infantís. O tema deste ano é “Planta historias e o mundo florecerá”, un fermoso lema que recoñece o valor
das historias, os libros e a lectura, así como o seu potencial para mellorar o
mundo, ao tempo que enfatiza a necesidade de adoptar opcións de vida máis
respetuosas co medio ambiente.
A novidade deste ano é que foron os
propios nenos e nenas de 19 escolas os que elexiron a ilustración e o texto:
ilustración de Sandra Eleftheriou e a mensaxe de Elena Perikleous.
O texto comeza así:
“Había unha vez unha crianza que ansiaba vivir mellor que os
heroes dos contos de fadas, que só vivían felices para sempre.
Dende Gálix unénse a esta
conmemoración salientando o importante papel que ten a literatura infantil e
xuvenil (LIX) na nosa lingua no crecemento e desenvolvemento das crianzas.
Cartaz creado por María Lires e o manifesto escrito por María Solar. Xuntos simbolizan o poder emancipador dos libros e a imaxinación, invitándonos (sexamos crianzas ou xa non) a soñar sen límites.
No Día Internacional da Narración Oral, conmemórase a arte de narrar de viva voz, manifestación artística tamén denominada contacontos.
Festival Atlántica, Sete Falares e NOGA (Narración
Oral Galega) celebran xuntos esta data.
Nesta edición, o manifesto realizouno Camiño Noia e o cartel é de Rachel Boo.
FONTE: NOGA E BIBLIOTECAS ESCOLARES
O Día do Cómic e do Tebeo é unha celebración que pretende recoñecer o valor do cómic e do tebeo, o peso da súa historia e a súa importancia no contexto actual, a súa diversidade, creatividade e calidade.
A autora do cartel deste ano é a
ilustradora Candela Sierra, Premio Nacional do Cómic 2025.
O Grupo de Traballo "Comictecas" do Consello de Cooperación Bibliotecaria, do que forman parte as bibliotecas escolares de Galicia, presentou o ano pasado unha publicación para celebrar esta data: "Cómic. 50 recomendacións para bibliotecas".
FONTE: BIBLIOTECAS ESCOLARES
Durante a Semana da Muller, cada aula mergullouse nunha investigación fascinante sobre as Mulleres no circo ao longo da historia. Este proxecto enmárcase dentro do PDI do curso, que busca explorar diversos aspectos do Circo.
Algunhas das mulleres extraordinarias que investigamos, cada unha pioneira no seu campo:
-Madame Saqui: a raiña da
corda frouxa.
-Mabel Stark: a dama dos
tigres.
-Rosa Matilda Richter, «Zazel»: a
primeira muller bala.
-May Wirth: a raiña da acrobacia
ecuestre.
-Pinito del Oro, Miss Mara,
Paulina
Schumann...
O Día Internacional da Muller 2026, baixo o lema “Dereitos. Xustiza. Acción. Para TODAS as mulleres e nenas”, fai un chamamento á acción para derribar todas as barreiras que obstaculizan a igualdade na xustiza: leis discriminatorias, proteccións xurídicas débiles e prácticas e normas sociais nocivas que erosionan os dereitos das mulleres e as nenas.
.png)
A campaña suliña que, sin xustiza, os dereitos son só palabras, esixindo leis que protexan contra a
violencia e a
discriminación.
Acceso á educación,
liberdade de expresión,
seguridade en espazos públicos/dixitais e participación
plena na vida cultural e científica.
Actualmente as mulleres teñen só o 64% dos dereitos xurídicos dos que
gozan os homes a nivel mundial, o que fai urxente a acción no 2026.
A Axenda 2030 marca como Obxectivo Nº 5: Lograr a igualdade entre os xéneros e empoderar a todas as mulleres e nenas. As bibliotecas escolares de Galicia traballan todo o curso, en prol dunha igualdade efectiva na nosa sociedade, formando cidadanía crítica.
