CLUBS DE LECTURA

Se che gustan os libros, as historias e descubrir novas aventuras, o Club de Lectura é para ti.

Neste espazo poderás compartir as túas lecturas, falar sobre os teus personaxes favoritos, recomendar libros e coñecer novas historias xunto cos teus compañeiros e compañeiras.

Se estás en 5º ou 6º de Educación Primaria e queres participar nesta experiencia, agardámoste o martes 15 de setembro durante o recreo.

Nese encontro explicaremos como funciona o Club, que actividades realizaremos e como podes formar parte del. Anímate a participar e a compartir connosco o pracer de ler!

DESPEDIDA DOS CLUBS DE LECTURA

Chegamos ao final dunha nova edición dos Clubs de Lectura, unha experiencia que, unha vez máis, deixounos grandes momentos para recordar. Ao longo do curso, o alumnado participante compartiu lecturas, descubriu novas historias e gozou de encontros nos que os libros foron os verdadeiros protagonistas.

Cada páxina lida abriu a porta a aventuras, emocións e reflexións que enriqueceron esta viaxe lectora. Grazas á curiosidade, ao compromiso e á participación de todos e todas, os Clubs de Lectura convertéronse nun espazo de encontro, diálogo e aprendizaxe.

Para celebrar o remate desta actividade, organizamos unha pequena merenda de convivencia e fixemos entrega dos diplomas e agasallos cos que quixemos agradecer a implicación do alumnado.

Queremos dedicar unha especial despedida ao alumnado de 6º, que inicia unha nova etapa. Levade convosco o hábito lector, a curiosidade por descubrir novas historias e o pracer de seguir aprendendo a través dos libros.

Grazas a todos e todas por formar parte desta aventura. Agora toca descansar, gozar do verán e seguir atopando nos libros novos lugares aos que viaxar.

PECHE DO CLUB DE LECTURA DE ADULTAS

O martes 16 de xuño celebramos o peche a un novo curso do noso Club de Lectura "Ás seis no Seis", nun encontro cheo de emocións, lembranzas e bos momentos compartidos.

Foi unha tarde para mirar atrás e lembrar todo o vivido ao longo destes meses: libros que nos emocionaron, historias que nos fixeron pensar, personaxes que quedaron connosco e conversas que enriqueceron cada encontro. Un ano máis, a lectura converteuse na mellor escusa para compartir experiencias, descubrir novas perspectivas e fortalecer os lazos de amizade entre as integrantes do club.

Durante o encontro fixemos balance da nosa andaina lectora. Coincidimos en que este foi un curso cheo de descubrimentos literarios, de autoras e de historias que nos fixeron viaxar, rir e reflexionar. 

Con ilusión e curiosidade, xa deixamos preparada a selección de lecturas para o primeiro trimestre do curso 26-27. Escolléronse títulos variados, con propostas que prometen emoción, reflexión e moita conversa. O espírito lector segue vivo e con ganas de seguir explorando novos mundos. 

A celebración rematou coa tradicional merenda, un momento distendido no que as risas, as anécdotas e a boa compañía foron as verdadeiras protagonistas. Tamén fixemos entrega de diplomas e pequenos agasallos como mostra de agradecemento pola implicación, a participación e o entusiasmo que cada unha achega ao club.

Grazas a todas por facer de “Ás seis no Seis” moito máis ca un club de lectura: un espazo de encontro, diálogo, aprendizaxe e amizade. Desexámosvos un feliz verán, cheo de boas lecturas, novos descubrimentos e historias inesquecibles.

XABIER DOMÍNGUEZ CO CLUB DE LECTURA DE 5º

O Club de Lectura de 5º de Primaria celebrou un encontro co escritor Xabier Domínguez, autor do libro "Maxia de pedra". A actividade foi unha oportunidade para conversar sobre unha historia chea de maxia, intriga e acción, que nos transporta á Galicia castrexa e á época da romanización. 

Durante o encontro, o alumnado presentou os traballos realizados sobre os petroglifos, un dos elementos centrais da obra, e formulou numerosas preguntas ao autor. Xabier respondeu moi amablemente, compartindo curiosidades sobre o proceso de creación e sobre os personaxes. Contounos que o nome da protagonista, Anxela, é tamén o da súa filla, e confesou que, se tivese que escribir de novo a historia, faría algúns cambios para darlle outro enfoque.

A conversa permitiu afondar nos temas principais da novela: a relación entre pai e filla, a importancia da arqueoloxía para coñecer o noso pasado histórico, a posta en valor do patrimonio cultural e natural galego e o coidado do medio ambiente como responsabilidade colectiva.

O autor explicou tamén que escolleu un gato con tres colas porque é a figura que mellor representa o misterio e a fantasía, símbolo da maxia que impregna toda a historia.

“Maxia de pedra” é unha obra cun enfoque didáctico e pedagóxico, que achega ao alumnado á prehistoria e á romanización en Galicia dun xeito ameno e atractivo. 

A través da lectura e da conversa co autor, o Club de Lectura puido descubrir como a literatura pode ser unha ponte entre a imaxinación e o coñecemento do noso patrimonio arqueolóxico e medioambiental.

ENCONTRO LITERARIO CON ABRIL CAMINO

O mércores 20 de maio, os Clubs de Lectura do Ceip Plurilingüe Seis do Nadal e do IES Alexandre Bóveda reuníronse para compartir unha xornada literaria con Abril Camino, autora de “Mulleres que viven xuntas”, obra gañadora do XLII Premio Xerais de Novela 2025.

A novela lévanos á Galicia do franquismo para achegarnos ás vidas de Isabel e Chus, dúas mulleres obrigadas a vivir o seu amor nun tempo de silencios, medos e renuncias. É unha historia que rende homenaxe a todas esas vidas ocultas que durante moito tempo non tiveron voz na literatura nin na sociedade. 

Durante o encontro, Abril compartiu con nós como xurdiu a idea de escribir este libro: a partir dunha conversa coa súa nai sobre aquelas mulleres solteiras que vivían con outra muller e que, sen decilo abertamente, compartían vida e afectos.

A autora contou que quería escribir unha historia breve, polo que hai pouca descripción dos personaxes deixándoa á imaxinación do lector/lectora. Tamén explicou que o personaxe de Chus foi medrando ata converterse na verdadeira voz da memoria. Tiña claro que Isabel debía emigrar a Londres, unha cidade aberta e cosmopolita nos anos sesenta, símbolo de liberdade que en Galicia lles era negada.

Falouse dos grandes temas que atravesan a novela: a memoria histórica, a represión social, a emigración e a necesidade de vivir con autenticidade.

Abril explicou como o relato alterna dous tempos narrativos para reconstruír os cincuenta anos de vida compartida entre Chus e Isabel. O pasado aparece narrado en terceira persoa, ofrecendo unha viaxe polos antecedentes familiares, a marcha de Isabel a Londres e o nacemento da relación entre ambas. O presente, en cambio, está contado en primeira persoa por Chus, nos momentos previos ao enterro de Isabel, converténdose nun espazo de dor, nostalxia e lembranza.

Grazas, Abril, por este encontro onde a literatura, a memoria e as emocións déronse a man!

ROTEIRO LITERARIO CON PEDRO FEIJOO

O luns 18 de maio, os Clubs de Lectura do CEIP Plurilingüe Seis do Nadal e do CEIP Alfonso Daniel R. Castelao compartimos unha xornada moi especial co escritor Pedro Feijoo, autor do libro “Pequena historia de Vigo”, que condensa séculos de historia da cidade en formato cómic. Guiados polas súas palabras emprendemos un roteiro literario polos recunchos máis emblemáticos e cheos de memoria da nosa cidade. 

O percorrido comezou nas ruínas do Castelo de San Sebastián, situadas xusto detrás da torre do Concello. Desde alí puidemos gozar das vistas da cidade, imaxinando como sería aquel Vigo antigo que o libro nos axuda a reconstruír.

A seguinte parada foi o Banco dos Contos, que non serviu para narrar historias. Alí, segundo nos contou Pedro, os comerciantes sentaban para facer as contas das vendas dos seus produtos.

Paseamos pola cidade vella, reparando nos edificios e construcións que agochan segredos e historias. 

Na Porta do Sol detivémonos diante do edificio construido por Pacewicz, buscando na súa fachada a data de construción: 1902. Alí tamén coñecemos un detalle sorprendente: as marcas dos impactos da Guerra Civil que aínda se conservan na pedra. Un recordo  visible dun tempo escuro que nos convida a reflexionar sobre a memoria.

Na praza da Constitución, xogamos a atopar un reloxo de sol agochado entre os edificios, e na praza da Colexiata, Pedro aproveitou para falarnos da Oliveira, símbolo da cidade e testemuña silenciosa da súa historia.

O roteiro continuou ata a casa onde estaba a imprentade Juan  Compañel, que non é a que ten a placa visible, senón outra vivenda próxima. Alí atopamos unha indicación coa cita de Pedro Feijoo sobre o momento no que se imprimiu "Cantares Gallegos", o 17 de maio de 1863. Nesa mesma casa viviu Rosalía de Castro durante un tempo da súa estancia en Vigo, un feito que nos encheu de orgullo e emoción.

Ao rematar o percorrido, Pedro Feijoo lembrounos que está nas nosas mans contar todo o que vimos para que non se perda, e que as novas xeracións temos a responsabilidade de conservar a nosa memoria.

Foi un día cheo de aprendizaxe, historia e literatura, na que descubrimos que Vigo agocha relatos en cada recuncho. Grazas a Pedro por facernos mirar Vigo con outros ollos e por compartir connosco a súa paixón pola cidade.

XUNTANZA NA BIBLIOTECA DO BÓVEDA

O 7 de maio, o Club de Lectura de Adultas “Ás seis no Seis” participou nun encontro literario na biblioteca do IES Alexandre Bóveda arredor da figura de Begoña Caamaño. A actividade foi coordinada por Fani González, profesora do IES e autora do libro "Begoña Caamaño. Xornalista e escritora" da Ed. Ir Indo.

Comezou cunha pequena presentación sobre a vida, o pensamento e a importancia literaria de Begoña Caamaño na que estivo acompañada de alumnas do Bacharelato de Artes, que realizaron unha fermosa escenificación inspirada nas súas novelas. A través da interpretación e  da expresión corporal conseguiron trasladarnos a intensidade emocional e simbólica das obras.

Comentamos as dúas obras escritas por Begoña Caamaño: "Circe ou o pracer do azul" e "Morgana en Esmelle". Ao longo da sesión falamos da maneira na que a autora revisa os personaxes femininos da mitoloxía e da literatura clásica para darlles voz propia e unha mirada máis libre e actual.

Foi unha tarde moi amena, na que puidemos compartir impresións e reflexións entre os dous clubs de lectura, creando un espazo de encontro arredor da literatura e facendo comunidade.

4ª XUNTANZA DO CLUB DE LECTURA DE 6º

No mes de abril o Club de Lectura de 6º de Primaria mergullouse nunha nova aventura literaria da man de Ledicia Costas e o seu libro "Bruxas & Dragóns". Para iniciar esta viaxe máxica, cada participante preparou a súa bolsa de exploradora con obxectos imprescindibles: un bolígrafo para anotar descubrimentos, uns dados para tomar decisións e un mapa de ruta para non perder o camiño entre tanto misterio. 

A medida que avanzabamos polas páxinas, fomos descubrindo mundos cheos de trols, fadas e seres fantásticos. Cada lanzamento de dados abría unha nova porta, cada elección marcaba un destino distinto. O libro converteuse nun xogo de aventuras onde a imaxinación era a verdadeira guía.

Pero o máis sorprendente chegou na reunión do club: cada unha lera un libro diferente. A mesma portada, o mesmo título... pero seis historias distintas. Algunhas viaxaron por un mercado cheo de maxia, outras perderon o rumbo nun bosque encantado, houbo quen se mergullou no propio mundo da literatura e quen se atreveu a cruzar un pantano misterioso. En cada camiño agardaban inimigos, retos e finais inesperados: algunhas heroinas venceron, outras foron vencidas, e non atoparon un final feliz. 

 

Así, “Bruxas & Dragóns” converteuse nun espello de aventuras múltiples, onde cada lectura foi unha experiencia única. Un mesmo libro, seis destinos, seis viaxes que nos lembran que ler tamén é xogar, decidir e soñar.

OLAIA SENDÓN E "A CASA GRANDE"

O luns 27 de abril os Clubs de Lectura do CEIP Plurilingüe Seis do Nadal e do IES Alexandre Bóveda compartiron un encontro literario coa escritora Olaia Sendón para conversar arredor da súa novela “A casa grande”, finalista do Premio Xerais 2025.

“A casa grande” é unha obra que non só se le, senón que se habita. Abriunos a porta a un territorio que todas recoñecemos: o da memoria, o das herdanzas e o dos silencios que fican entre as paredes de calquera fogar familiar.

A historia non é autobiográfica, mais parte desa emoción compartida que xorde cando o pasado familiar se converte en materia literaria.

Na novela, os obxectos teñen vida propia. Levan a pegada de quen os habitou e gardan as historias que outros deixaron atrás. Por iso, Olaia dedícalles varios capítulos: o álbum secreto, a foto, o secreter, a mesa de caoba, os rubís. Cada un deles convértese nun fío que une xeracións e recordos.

A casa que dá título á novela é real, situada en Corcubión, e serve de escenario para un relato que alterna presente e pasado cunha linguaxe sinxela e envolvente. A autora opta por ofrecer poucas descricións físicas dos personaxes, para que cada lector/lectora poida imaxinarlles o rostro e a presenza.

Durante o encontro, entregámoslle a Olaia un álbum coas fotos do noso Knolling literario, composto con obxectos e elementos significativos da historia.

Rematamos construíndo a nosa propia casa grande da lectura a partir de palabras que nos acompañarán sempre: memoria, fogar, silencio, familia, pasado, identidade, lembranzas, pertenza, conflito, esperanza.

Olaia asinou os exemplares cunha ilustración personalizada, deixando en cada unha de nós unha pegada única e o recordo dun encontro cheo de emoción e literatura compartida.

XVIII XORNADA DOS CLUBS DE LECTURA

Mañá 29 de abril, celebrarase no Palacio de Congresos e Exposicións de Galicia, en Santiago de Compostela, a reunión anual do profesorado que coordina os clubs de lectura dos centros que participan no programa de Clubs de Lectura, da Consellería de Educación, Ciencia, Universidades e Formación Profesional.

Esta XVIII Xornada dos Clubs de Lectura reunirá a arredor de 600 persoas, entre participantes, relatores e persoas asesoras de formación do profesorado. 

Entregarase, así mesmo, o Premio dos Clubs de Lectura 2026, que desta vez recaeu no escritor Manuel Rivas por ser o autor galego máis lido nos clubs de lectura no curso 2024/2025.

Comezará a xornada cunha conversa virtual co autor premiado, continuaremos coa intervención do mediador e coordinador do Premio Mandarache Alberto Soler, disfrutaremos dunha conversa arredor doutros clubs de lectura en librarías e bibliotecas públicas e unha charla sobre clubs de lectura fácil. Pola tarde teremos sesións simultáneas coa experiencia de nove centros integrados no programa e a presentación da plataforma M8 por ler. O peche da xornada dará voz ás persoas que participan nos clubs de lectura. 

FONTE: BIBLIOTECAS ESCOLARES

PEDRO FEIJOO NO CLUB DE LECTURA

O 22 de abril o Club de Lectura “Ás seis no Seis” do CEIP Plurilingüe Seis do Nadal e o Club de Lectura de Adult@s do IES Alexandre Bóveda compartiron unha xornada inesquecible coa visita do escritor Pedro Feijoo. O autor achegouse para conversar arredor da súa novela “Onde nacen as bestas”, un relato intenso que non deixa indiferente a ninguén.

En “Onde nacen as bestas”, Pedro Feijoo mergúllanos nunha historia chea de tensión, misterio e simbolismo. A través dun contexto rural e de personaxes complexos, o autor convida a reflexionar sobre os límites entre o humano e o salvaxe, entre a razón e os instintos máis primarios. Ispirada na lenda do lobishome de Allariz, Romasanta, a novela combina realidade e mito cunha forza narrativa que atrapa dende as primeiras páxinas.

Para acoller o encontro, o espazo decorouse para a ocasión cunha careta de lobo e elementos de costura, símbolos que evocan o universo da novela e a personalidade dos seus protagonistas. 

Pedro Feijoo, destacou a importancia de investigación e documentación exhaustiva no seu proceso creativo. Contou que viviu durante un tempo en Rebordechao, para coñecer de preto o territorio e as persoas que inspiraron a súa historia.

Durante a conversa, compartiu anécdotas, reflexións e curiosidades abordando diferentes aspectos presentes na novela, como os incendios forestais, a crítica social e o papel da memoria colectiva na construcción das identidades.

A xornada rematou cun toque doce e entrañable: a tradicional bica branca de “A Casa das Bicas” de Soutelo Verde, que puxo sabor a unha tarde chea de emoción e complicidade.

O encontro con Pedro Feijoo foi unha oportunidade para dialogar sobre literatura, identidade e memoria. Moitas grazas, Pedro, por compartir connosco esta viaxe literaria.

VISITAS NO CLUB DE LECTURA DE ADULTAS

Este mes de abril, o Club de Lectura de Adultas “Ás seis no Seis” celebra dúas citas moi especiais. Dúas xornadas para conversar, compartir impresións e gozar da literatura en boa compañía.

O primeiro encontro, o 22 de abril, contará coa presenza do escritor Pedro Feijoo, para falar sobre a súa novela “Onde nacen as bestas”. Unha historia de violencia ancestral, silencios familiares e identidades ocultas ambientada en Galicia. Será unha oportunidade para afondar nesta obra e intercambiar reflexións co autor.

Uns días despois, o 27 de abril, recibiremos a Olaia Sendón, quen compartirá coas lectoras impresións sobre o seu libro “A casa grande”, unha obra que mergulla nas relacións familiares, a memoria e os segredos que habitan nas casas e nas persoas.

O Club de Lectura continúa a consolidarse como un espazo de diálogo, aprendizaxe e amizade arredor dos libros. Dúas citas importantes para seguir facendo comunidade a través da lectura.

3ª XUNTANZA DO CLUB DE LECTURA DE 6º

Durante o mes de febreiro, o Club de Lectura de 6º de Primaria mergullouse na historia de "Lúa do Senegal", escrita por Agustín Fernández Paz. Este libro narra a experiencia dunha nena migrante do Senegal que se traslada a Vigo e enfronta a saudade do seu fogar, costumes e amizades.

Ao principio, costounos comprender por que Khoedi, a protagonista, non lle gustaba a nosa cidade. Despois de recrear a viaxe da protagonista desde o Senegal ata Vigo tratando de poñernos na súa pel e se fósemos nós quen tiveramos que facer a viaxe á inversa, puidemos comprender mellor as emocións da personaxe.

Ao poñerse no lugar da protagonista, lograron conectar cos seus sentimentos e comprender a importancia de acoller e respectar a todas as persoas, independentemente da súa orixe. 

3ª XUNTANZA DO CLUB DE LECTURA DE 5º

A reunión do Club de Lectura de 5º de Primaria o venres 27 de febreiro foi unha experiencia moi especial. Comezamos compartindo as nosas impresións sobre o libro "Animais fantásticos de aldea". Cada neno/nena tivo a oportunidade de expresar o que máis lle gustou da historia, cales son os personaxes favoritos e que escenas nos chamaron a atención. Foi un momento moi enriquecedor onde aprendimos a valorar diferentes perspectivas e a escoitar con atención.

A continuación, trasladámonos á aula croma para vivir unha aventura creativa. O obxectivo era recrear a portada do libro. Cada participante converteuse nun dos personaxes, imitando as súas posturas e expresións características. Fixemos fotografías para integrar as imaxes na portada orixinal, converténdoos en verdadeiros protagonistas. 

O resultado foi fantástico! Ademais de divertirnos moito, conseguimos: sentirnos parte da historia e experimentar a lectura dunha maneira diferente e emocionante.

2ª XUNTANZA DO CLUB DE LECTURA 6º

O xoves 15 de xaneiro, o Club de Lectura de 6º de Primaria embarcouse nunha doce aventura na Fábrica de Chocolate de Willy Wonka! A emoción era palpable mentres cada membro buscaba o seu billete dourado, o pase máxico para entrar neste mundo de fantasía.

Unha vez dentro, as nosas lectoras foron recibidas cunha exuberancia de chocolates. Degustaron sabores exóticos, descubriron recheos sorprendentes e saborearon a cremosidade do chocolate con leite e a dozura do chocolate branco. Cada bocado era unha nova experiencia, unha viaxe para os sentidos.

Pero a aventura non rematou aí! Os membros do club de lectura transformáronse en Oompa Loompas, os famosos traballadores da fábrica, coa misión de construír a súa propia casa de chocolate. A tarefa non foi fácil, xa que a tentación de probar os deliciosos ladrillos de chocolate era inmensa. Tiveron que demostrar forza de vontade para non caer no río de chocolate e ser expulsados!

A través da cooperación e o traballo en equipo, os Oompa Loompas lograron superar a proba e construír unha fermosa casa de chocolate. Compartindo ideas e materiais, demostraron que xuntas podían conseguir calquera obxectivo. A súa dedicación e espírito de equipo impresionaron a Willy Wonka, que lles permitiu levar as súas creacións para a casa!

Foi unha xuntanza marabillosa chea de risas, aprendizaxe e, por suposto, moito chocolate. Un día para recordar e celebrar a maxia da lectura e a amizade.

2ª XUNTANZA DO CLUB DE LECTURA DE 5º

O xoves 9 de decembro, o Club de Lectura de 5º de Primaria reuniuse para comentar o seu segundo libro: "A Señorita Bubble. Baixo cero". A xuntanza estivo chea de risas, participación e boas lecturas. Realizáronse diversas actividades para dinamizar e explorar a historia e os seus personaxes.

Compartimos as nosas opinións sobre a trama, os lugares máis emocionantes e os personaxes máis memorables. Debatimos sobre as motivacións da Señorita Bubble e os desafíos que enfrentou na súa aventura. Cada membro do club expresou a súa perspectiva, enriquecendo a comprensión colectiva da obra. 

Un dos momentos máis divertidos foi o xogo de preguntas. Cada resposta correcta achegábanos unha peza do puzzle da portada do libro. A medida que avanzábamos, a imaxe ía tomando forma, creando un ambiente de colaboración e entusiasmo. 

A reunión do club de lectura foi un éxito rotundo. Reforzamos o noso amor pola lectura, compartimos ideas e experiencias, e pasámolo xenial. Agardamos con ilusión a nosa próxima aventura literaria!