GUÍA DE LECTURAS VERÁN 2026

O sol ergue o seu pano dourado e o verán comeza a súa función máis esperada. As rúas énchense de risas, os días fanse longos e o aire trae arrecendo a aventura. É tempo de deixar voar a imaxinación, de facer malabares co tempo libre e de descubrir novas historias que fagan sorrir, soñar e aprender. 

Presentamos a nosa Guía de Lecturas de Verán, unha selección de títulos cheos de fantasía, emoción e aprendizaxe, pensada para acompañar cada momento destas vacacións. 

Cada libro é unha viaxe diferente, unha porta aberta a novas emocións e descubrimentos. Que esta guía sexa o mapa que conduza a momentos inesquecibles de lectura e descanso. 

Bo verán e felices lecturas!

Guía de lecturas verán 2026 de Biblioteca Seis do Nadal

DESPEDIMOS AO VOLUNTARIADO DE 6º

Baixo a carpa do Seis, o curso chega a súa última función. As luces acéndense e os 18 colaboradores e colaboradoras de 6º de Primaria despídense tras un ano cheo de ilusión e compromiso na biblioteca.

Foron malabaristas dos libros, equilibristas dos andeis e axudantes de pista nos recreos. Prepararon contos, organizaron exposicións e levaron o seu espectáculo solidario ao Centro de Día Atendo, enchendo de sorrisos e aprendizaxes cada encontro. O seu traballo fixo brillar a biblioteca con máis cor e alegría.

Grazas, artistas do voluntariado, por facer deste curso unha función inesquecible. Que a vosa nova etapa siga chea de maxia, soños e solidariedade.

DESPEDIDA DOS CLUBS DE LECTURA

Chegamos ao final dunha nova edición dos Clubs de Lectura, unha experiencia que, unha vez máis, deixounos grandes momentos para recordar. Ao longo do curso, o alumnado participante compartiu lecturas, descubriu novas historias e gozou de encontros nos que os libros foron os verdadeiros protagonistas.

Cada páxina lida abriu a porta a aventuras, emocións e reflexións que enriqueceron esta viaxe lectora. Grazas á curiosidade, ao compromiso e á participación de todos e todas, os Clubs de Lectura convertéronse nun espazo de encontro, diálogo e aprendizaxe.

Para celebrar o remate desta actividade, organizamos unha pequena merenda de convivencia e fixemos entrega dos diplomas e agasallos cos que quixemos agradecer a implicación do alumnado.

Queremos dedicar unha especial despedida ao alumnado de 6º, que inicia unha nova etapa. Levade convosco o hábito lector, a curiosidade por descubrir novas historias e o pracer de seguir aprendendo a través dos libros.

Grazas a todos e todas por formar parte desta aventura. Agora toca descansar, gozar do verán e seguir atopando nos libros novos lugares aos que viaxar.

PECHE DO CLUB DE LECTURA DE ADULTAS

O martes 16 de xuño celebramos o peche a un novo curso do noso Club de Lectura "Ás seis no Seis", nun encontro cheo de emocións, lembranzas e bos momentos compartidos.

Foi unha tarde para mirar atrás e lembrar todo o vivido ao longo destes meses: libros que nos emocionaron, historias que nos fixeron pensar, personaxes que quedaron connosco e conversas que enriqueceron cada encontro. Un ano máis, a lectura converteuse na mellor escusa para compartir experiencias, descubrir novas perspectivas e fortalecer os lazos de amizade entre as integrantes do club.

Durante o encontro fixemos balance da nosa andaina lectora. Coincidimos en que este foi un curso cheo de descubrimentos literarios, de autoras e de historias que nos fixeron viaxar, rir e reflexionar. 

Con ilusión e curiosidade, xa deixamos preparada a selección de lecturas para o primeiro trimestre do curso 26-27. Escolléronse títulos variados, con propostas que prometen emoción, reflexión e moita conversa. O espírito lector segue vivo e con ganas de seguir explorando novos mundos. 

A celebración rematou coa tradicional merenda, un momento distendido no que as risas, as anécdotas e a boa compañía foron as verdadeiras protagonistas. Tamén fixemos entrega de diplomas e pequenos agasallos como mostra de agradecemento pola implicación, a participación e o entusiasmo que cada unha achega ao club.

Grazas a todas por facer de “Ás Seis no Seis” moito máis ca un club de lectura: un espazo de encontro, diálogo, aprendizaxe e amizade. Desexámosvos un feliz verán, cheo de boas lecturas, novos descubrimentos e historias inesquecibles.

O GRAN CIRCO DO SEIS NA RADIO

Soa o redobre de tambores… chega o gran final da tempada radiofónica!

Hoxe despedimos o curso cun programa preparado por tres voces: Leonardo, Enya e Octavio, alumnado do Club de Lectura, encargados de poñer o final a un ano cheo de historias, aprendizaxes e emocións baixo o lema do noso PDI "O Gran circo do Seis". 

A carpa do circo péchase por vacacións, pero a maxia das historias e da aprendizaxe continúa.

Ata o vindeiro curso… e que siga o espectáculo!

EXPOSICIÓN FINAL PDI

Ao longo deste curso, mergullámonos nun fascinante universo de cores, emocións e aprendizaxes co noso Proxecto Documental: "O Gran Circo do Seis". Este proxecto converteuse no fío conductor das actividades do centro e no eixo vertebrador do proceso de ensino-aprendizaxe. 

A través de múltiples propostas, o alumnado explorou a historia do circo, as súas disciplinas e personaxes, a linguaxe propia do espectáculo e os valores que o acompañan: esforzo, cooperación, respecto, superación e alegría compartida.

Os resultados destas investigacións e creacións foron tomando forma nas aulas e corredores, ata culminar nunha exposición final que reuniu os traballos máis destacados do curso.

A exposición organizouse en diferentes espazos temáticos:

-Historia do circo; Viaxar, viaxar; A música do circo; Equilibrio e aire; Corpo e mente; Circo sensorial; Ler e ver o circo; Emocións.

-Arte e cor: a estética do circo a través da pintura con Botero, Picasso, Dalí e o circo de Calder.

O día 9 de xuño, en horario de tarde, recibimos ás familias. A visita á exposición converteuse nunha oportunidade para compartir procesos, descubrimentos e emocións, celebrando o traballo colectivo e a creatividade do alumnado. 

Para facilitar o percorrido, elaborouse unha guía da exposición que permitiu observar, coñecer e desfrutar cada espazo con calma e curiosidade.

No seguinte vídeo podedes ver unha pequena reportaxe da exposición.

AGASALLOS AOS RETOS DOS RECREOS

Este venres celebrouse na biblioteca a entrega dos agasallos ao alumnado que completou todos os retos do folleto de recreos creativos. Ao longo do curso, participaron con entusiasmo nas propostas de Kapla, Korbo, Lego e Magsmarters, vinculadas ao PDI do circo, demostrando imaxinación, colaboración  e moitas ganas de aprender xogando.

Cada reto puxo a proba a capacidade de crear, construír e traballar en equipo, convertendo os recreos nun espazo de experimentación e diversión compartida. O resultado foi unha colección de creacións sorprendentes e un ambiente cheo de ideas e sorrisos. 

O equipo da biblioteca quere dar as grazas a todo o alumnado participante pola súa implicación e espírito colaborativo. Parabéns a todas e todos polos retos superados!

VIAXANDO POLO MUNDO DO CIRCO

Ao longo das últimas semanas, o alumnado de 5º de Primaria estivo inmerso nun proxecto de investigación arredor do mundo do circo, no que combinaron aprendizaxe, creatividade e expresión oral.

Nesta ocasión, cada neno e nena investigou sobre un aspecto concreto: os tipos de circo, as profesións, a vida no circo ou o circo como arte.

A partir da información recompilada, prepararon as súas intervencións para compartilas na aula, así as exposicións orais convertíronse nun momento clave  da actividade, no que o alumnado puido poñer en práctica as súas habilidades comunicativas, expresar as súas ideas e aprender tamén das achegas dos compañeiros e compañeiras.

O conxunto destas exposicións deron lugar á creación dun libro viaxeiro informativo sobre o mundo do circo.

CAMPAÑA CIRCO SEN ANIMAIS

O alumnado de 1º A centrou o traballo do PDI do circo deste curso en coñecer a orixe do circo moderno e, sobre todo, a evolución dos espectáculos circenses dede a perpectiva do uso de animaias silvestres. Investigamos como eran antes as funcións con "feras" e o moito que cambiaron os circos actuais, que apostan por alternativas creativas como animais animatrónicos ou hologramas.

Descubrimos que, por sorte, no noso país o uso de animais silvestres está prohibido pola Lei de Benestar Animal, pero tamén soubemos que noutros lugares do mundo aínda se permiten circos con animais. Isto pareceunos inxusto, porque todos os seres vivos deberían poder vivir libres no seu hábitat natural.

Moi sensibilizados coa causa, coñecemos tamén as duras condicións nas que moitos destes animais malviven e a importante labor das organizacións que os rescatan e readaptan en refuxios e santuarios. Por iso, decidimos poñer en marcha unha campaña no cole a favor da supresión dos circos con animais.

Prepararon unha exposición visual sobre o tema e unha recollida de sinaturas para todos os que queiran unirse a esta campaña.

“O circo é máis fermoso cando todos os animais son libres.”

CONTACONTOS E TEATRO EN INGLÉS

O xoves 4 de xuño o alumnado gozou dunha xornada moi especial en inglés da man de Ariadna Santana, actriz, cómica e cantante. A artista encheu o centro de risas, música e aprendizaxe a través do teatro e dos contos. 

Para o alumnado de Primaria, Ariadna representou a obra "The Magic Tree", unha historia chea de maxia, amizade e aventuras que fixo voar a imaxinación de todos. A través do xogo escénico e da participación activa, o inglés converteuse nunha ferramenta viva e divertida. 

Os máis pequenos e pequenas de Educación Infantil viaxaron con ela nun percorrido titulado "The Lollipop Trip", un contacontos cheo de cores, ritmo e emocións. Cancións, xestos e palabras en inglés mesturáronse para crear unha experiencia sensorial e educativa.

O CIRCO AO LONGO DA HISTORIA

O alumnado de 5º de Primaria participou nunha actividade de investigación enmarcada no PDI, centrada na evolución do circo ao longo da historia.

A proposta comezou cunha actividade  motivadora en forma de xogo de pistas por estación. Organizados en grupos, os nenos e nenas tiveron que resolver diferentes retos empregando o seu inxenio, a lóxica e o traballo en equipo. Cada proba superada permitíalles conseguir unha parte da liña do tempo do circo, que posteriormente serviría como base para o traballo de investigación. Foi unha xornada moi dinámica e divertida, na que a participación activa foi protagonista.

Unha vez rematada esta primeira fase, cada grupo encargouse dunha etapa histórica do circo. A partir dunha investigación guiada, o alumnado recompilou información relevante sobre as características  da súa época. Os cambios máis significativos e os elementos máis representativos.

Como produto final, elaboraron un cartaz no que sintetizaron a información e acompañaron con imaxes ilustrativas, traballando así a capacidade de selección, organización e presentación dos contidos.

Para completar a actividade, cada grupo realizou a súa exposición oral, compartindo co resto da clase o aprendido. Deste xeito, construiron entre todos unha liña do tempo do circo, integrando as diferentes etapas e comprendendo a súa evolución dun xeito global.

AS FAMILIAS CONTAN

Durante os meses de abril e maio, as familias do Seis participaron activamente na Hora de Ler, achegándose ás aulas e biblioteca para compartir contos co alumnado. Pais, nais, avós e avoas convertéronse en contadores e contadoras de historias, facendo desa hora unha aventura chea de emcoiósn, palabras e imaxinación compartida. 

Cada visita transformou a aula e a biblioteca nun pequeno escenario onde os libros cobraban vida. Houbo contos clásicos, relatos inventados, historias de risa e de soños. O alumnado escoitou, participou e descubriu que ler tamén é un acto de encontro e afecto.

Esta iniciativa, promovida pola biblioteca escolar, reforzou o vínculo entre escola e familia, e fixo da lectura un espazo común de aprendizaxe e pracer. A Hora de Ler converteuse así nun tempo máxico onde as voces das familias fixeron vibrar as páxinas dos libros. 

Queremos agradecer a todas as familias que nos acompañastes durante estes meses, compartindo connosco esas lecturas que tanto desfrutamos e que nos permitiron pasar momentos  moi agradables e cheos de complicidade. Grazas por participar nesta fermosa experiencia. Agardámosvos no vindeiro curso!

OBRADOIRO DE POLOS: OPERACIÓN CIRCO

Durante as últimas semanas, o alumnado de 1º e 2º de Primaria participou, en sesións independentes, nun novo Obradoiro de Polos Creativos inspirado no libro “O gran circo das palabras” de Eva Mejuto.

Tras escoitar o contacontos e coñecer as aventuras de Rufo, a rapazada recibiu unha misión moi especial: Operación Circo. Para completala, tiveron que poñer en marcha as súas habilidades de observación, concentración e pensamento lóxico.

O reto consistía en construir paso a paso un circuito empregando a placa Makey Makey e o programa Scratch. A medida que avanzaban na montaxe, foron descubrindo como os diferentes elementos conectaban entre si para facer posible a interacción entre os obxectos físicos e o computador. Unha vez completado o dispositivo, chegou o momento de afrontar o desafío final. O pallaso do circo perdera as suas narices, atrapadas en diferentes trampas, e había que rescatalas sen cometer erros. 

A actividade inspirada nos xogos de habilidade e precisión, esixía pulso firme, atención e moita paciencia.

A través desta proposta, o alumnado iniciouse de maneira lúdica en conceptos vinculados ao desenvolvemento do pensamento computacional.

LECTURAS COMPARTIDAS NA BOUZA

O 5 de xuño foi un día moi especial: o alumnado de 1º da ESO do IES Alexandre Bóveda e os nenos e nenas de tres anos do CEIP Plurilingüe Seis do Nadal compartiron unha fermosa xornada de lectura na Bouza.

Os maiores convertéronse en contadores e contadoras de historias, enchendo o espazo de palabras máxicas e aventuras que fixeron voar a imaxinación dos máis pequenos e pequenas. Cada conto foi unha viaxe compartida, un momento de encontro entre dous mundos que se miraban con curiosidade e tenrura.

A alegría estivo presente en cada sorriso, en cada ollada de sorpresa e en cada páxina lida con ilusión. Despois das lecturas, chegou o tempo do xogo: risas, carreiras e complicidade no parque. 

O peche da xornada trouxo agasallos, abrazos e unha foto de grupo que gardará para sempre a lembranza deste día. Unha experiencia que uniu xeracións a través da maxia dos contos e da alegría de compartir.

"DÍA DO MEDIO AMBIENTE" NA RADIO DO SEIS

A clase de 6º C preparou un programa para conmemorar o 5 de xuño, Día Mundial do Medio Ambiente. Nesta ocasión contaron coa colaboración dos nenos e nenas de 6º de Infantil A, para compartir as novidades do festival de fin de curso, que se celebrará o 18 de xuño. 

Durante o programa, reflexionouse sobre a importancia de coidar o planeta, reducir o lixo e respectar a natureza. 

Desfrutádeo!!!

CINEMA NA BIBLIO

Durante o mes de maio, a nosa biblioteca encheuse de imaxes, risas e emocións coa celebración dun ciclo de cine en galego. Foi unha oportuidade para gozar do audiovisual na nosa lingua e redescubrir pequenas xoias que gardan os arquivos do Xabarín Club. 

Os nenos e nenas de Infantil e primeiros cursos de Primaria mergulláronse nas aventuras dun osiño entrañable: "As aventuras de Paddington". Nesta historia, o señor Gruber agasállalle a Paddington unha caixa de maxia para que aprenda os segredos dos grandes magos. Entre risas e ilusións, o público máis novo gozou dunha sesión chea de fantasía e amizade.

O alumnado de cursos superiores tivo a oportunidade de descubrir unha serie rodada en Galicia: "Os argonautas". A protagonista, Alba, chega á vila de Rodas  para pasar o verán coa tía Helena. O que semellaba un tempo aburrido e solitario convértese nunha aventura chea de misterio, amizade e descubrimentos. A rapazada quedou tan intrigada que prometeu seguir a historia para saber que acontecera ese verán insquecible.

RETO KAPLA XUÑO

O gran circo do Seis está a piques de rematar a súa función!. Despois de meses cheos de risas, retos e aventuras compartidas, os seus protagonistas prepáranse para coller unhas merecidas vacacións. Pero antes de marchar… queda unha última misión!

Os artistas, malabaristas e equilibristas teñen que viaxar cara ao seu descanso, e precisan un tren moi especial para facelo. Durante este mes de xuño, as pezas de Kaplas serán as grandes protagonistas dos recreos na biblioteca. Con elas, haberá que construir o tren do circo, vagoneta a vagoneta, combinando imaxinación, equilibrio e traballo en equipo.

Este mes tamén traerá unha sorpresa moi esperada: a última pegatina para completar o folleto dos retos da biblioteca. Quen os teña poderá recoller un pequeno agasallo como recoñecemento polo esforzo, a creatividade e a colaboración demostrada ao longo do curso. 

Ata pronto, artistas do Seis! 

BIBLIOLAB: BEGOÑA CAAMAÑO

Durante o mes de maio, a Bibliolab centrou as súas actividades en dúas temáticas: o pensamento computacional e a celebración das Letras Galegas, dedicado a Begoña Caamaño. A través de xogos e creacións, o alumnado mergullouse no universo literario e tecnolóxico, combinando imaxinación e aprendizaxe.

Coas tarxetas de imaxes relacionadas coa vida e obra de Begoña Caamaño, realizouse un xogo de buscar parellas.

Cada participante decorou marcapáxinas de Begoña Caamaño e tamén se utilizou o lapis 3D para crear outros. 

Empregando unha  lupa vermella descubrimos o texto oculto en diferentes tarxetas. Despois, cubriuse unha ficha de investigación con toda a información atopada.

Inspirándose nas novelas de Begoña Caamaño, o alumnado escolleu un taboleiro temático e, cos dados de historias, inventou contos para narrar oralmente aos compañeiros e compañeiras. 

En Primaria, as historias foron programadas con Scratch online ou Scratch Jr, transformando a narración en animacións interactivas.

Nas obras de Begoña Caamaño mestúranse espazos reais e fantásticos. Para explorar este aspecto, realizouse un xogo de circuitos eléctricos: con cables, uníase cada imaxe co seu nome. Se a luz se acendía, significaba que a resposta era correcta. Ademais, completouse unha sopa de letras con termos e lugares das súa novelas. 

As heroínas das historias de Begoña tamén tiveron o seu espazo nos xogos de taboleiro:

-Xogo tipo parchís: as personaxes movíanse polo taboleiro seguindo as frechas, empregando o dado numérico, ata chegar á meta da súa cor.

-Xogo de pensamento computacional: unha versión avanzada do parchís, na que se traballaron os bucles e condicións, aplicando conceptos básicos de programación.

Na obra “Circe ou o pracer azul”, Begoña inspirouse en personaxes da mitoloxía grega. Nesta historia Penélope, a raíña de Ítaca, e Circe, a deusa e raíña de Eea, intercambian cartas nas que comparten os seus segredos, aventuras e ameazas que sofren os seus territorios. Tiramos o dado, colocamos as pezas e programamos o CODING SET para conseguir coller a todos os personaxes.

Na obra “Morgana en Esmelle”, Begoña inspirouse nas lendas da Idade Media coñecidas como materia de Bretaña ou Ciclo Artúrico. O alumnado escolleu un dos tres xogos propostos nas tarxetas e programou ao Tale-bot, guiando a Morgana e os cabaleiros de Artur polas súas misións.