DÍA DO CÓMIC E DO TEBEO

O Día do Cómic e do Tebeo é unha celebración  que pretende recoñecer o valor do cómic e do tebeo, o peso da súa historia e a súa importancia no contexto actual, a súa diversidade, creatividade e calidade.

A autora do cartel deste ano é a ilustradora Candela Sierra, Premio Nacional do Cómic 2025.

O Grupo de Traballo "Comictecas" do Consello de Cooperación Bibliotecaria, do que forman parte as bibliotecas escolares de Galicia, presentou o ano pasado unha publicación para celebrar esta data: "Cómic. 50 recomendacións para bibliotecas".

FONTE: BIBLIOTECAS ESCOLARES

O VOLUNTARIADO CONTA

O voluntariado preparou dúas lecturas para contar ao alumnado de Infantil e 1º de Primaria na semana do 8M.

Mateo e Leo transportaron ao alumnado a un mundo de aventuras co conto popular "Once damas atrevidas". A través dunha viaxe imaxinaria por diferentes países, os nenos e nenas descubriron fitos culturais e paisaxísticos, participando activamente na narración e explorando a riqueza do noso planeta. Aprenderon sobre a importancia de perseguir os seus soños e non renderse ante as dificultades. 

Antía e Eva emocionaron aos nenos e nenas coa historia de "Salvaje", unha nena que vive en harmonía coa natureza. Esta inspiradora narración transmitiu valores como a liberdade, a valentía e a importancia de aprender do mundo que nos rodea. Unha oda á conexión coa natureza e ao poder da individualidade.

A través de contos buscamos inspirar ao noso alumnado a construír un futuro máis xusto e igualitario, onde todas as persoas teñan as mesmas oportunidades para crecer e desenvolverse plenamente.

Grazas ao voluntariado polo seu traballo e por compartir a súa paixón pola lectura!!!

AS MULLERES NO CIRCO

Durante a Semana da Muller, cada aula mergullouse nunha investigación fascinante sobre as Mulleres no circo ao longo da historia. Este proxecto enmárcase dentro do PDI do curso, que busca explorar diversos aspectos do Circo.

O noso obxectivo foi dar visibilidade ao papel fundamental que as mulleres desempeñaron no mundo do circo. Descubrimos historias inspiradoras de valentía, talento e innovación, que merecen ser contadas e recoñecidas.

Algunhas das mulleres extraordinarias que investigamos, cada unha unha pioneira no seu campo:

-Madame Saqui: a raiña da corda frouxa.

-Mabel Stark: a dama dos tigres.

-Rosa Matilda Richter, «Zazel»: a primeira muller bala.

-May Wirth: a raiña da acrobacia ecuestre.

-Pinito del Oro, Miss Mara, Paulina Schumann...

8M: DÍA INTERNACIONAL DA MULLER

O Día Internacional da Muller 2026, baixo o lema “Dereitos. Xustiza. Acción. Para TODAS as mulleres e nenas”, fai un chamamento á acción para derribar todas as barreiras que obstaculizan a igualdade na xustiza: leis discriminatorias, proteccións xurídicas débiles e prácticas e normas sociais nocivas que erosionan os dereitos das mulleres e as nenas.

A campaña suliña que, sin xustiza, os dereitos son só palabras, esixindo leis que protexan contra a violencia e a discriminación.

Acceso á educación, liberdade de expresión, seguridade en espazos públicos/dixitais e participación plena na vida cultural e científica.

Actualmente as mulleres teñen só o 64% dos dereitos xurídicos dos que gozan os homes a nivel mundial, o que fai urxente a acción no 2026.

A Axenda 2030 marca como Obxectivo Nº 5: Lograr a igualdade entre os xéneros e empoderar a todas as mulleres e nenas. As bibliotecas escolares de Galicia traballan todo o curso, en prol dunha igualdade efectiva na nosa sociedade, formando cidadanía crítica.

LECTURAS PARA O 8M

Con motivo do 8 de marzo, Día Internacional da Muller, a biblioteca propón unha selección de libros que nos axudan a reflexionar sobre a igualdade. A través destas historias coñecemos nenas e mulleres valentes que loitan polos seus soños e rompen estereotipos.

Estas lecturas transmiten valores como o respecto, a igualdade de oportunidades, a liberdade e a importancia de recoñecer o papel das mulleres na sociedade. 

Porque os libros non só contan historias tamén nos axudan a aprender, a pensar e a construír un mundo máis xusto e igualitario.

Lecturas para o 8M de Biblioteca Seis do Nadal

8M NA RADIO DO SEIS

Coa maxia do Circo e a forza da Radio, os nosos artistas de 6ºB e 6º Infantil B uniron forzas para crear un programa moi especial. 

No marco da conmemoración do 8M, Día Internacional da Muller, estas dúas clases suben á pista para visibilizar o papel fundamental das mulleres no mundo do circo, en liña co noso PDI deste curso.

Desfrutade desta nova entrega!!!

SALÓN DO LIBRO 2026

O XXVII Salón do Libro Infantil e Xuvenil de Pontevedra, desenvolverase no Pazo da Cultura do 6 ao 22 de marzo do 2026.

A música, igual cas historias que habitan os libros, tivo desde o inicio dos tempos a finalidade de narrar o mundo, transmitir emocións e crear comunidade. Por iso, este ano o lema é Que non pare a música!

Os distintos espazos do Pazo da Cultura transformaranse en melodías, onde notas e palabras tecerán cada día unha chea de aventuras. Haberá, coma cada ano, sesións de contos, cine, teatro, maxia, circo, obradoiros creativos, videoxogos, exposicións de ilustración, poesía, cociña, camiñadas pola cidade… 

A música será o fío condutor dun programa no que poderemos gozar de concertos de todo tipo: rock, música clásica e tradicional. Haberá cantigas e arrolos para o público máis pequeno; verbenas, festivais e foliadas para toda a familia; regueifas literarias; obradoiros de canto, baile e construción de instrumentos…

Un programa de preto de 300 actividades escolares e familiares para bebés, rapazada, mocidade e tamén para o público adulto. Celebramos, nas datas do Salón, o inicio da primavera, o Día da Narración Oral, o Día Mundial da Poesía, o Día das Árbores e o Día da Síndrome de Down.

PROGRAMA

Máis información en

https://www.salondolibro.gal/

ENCONTRO PLAMBE 2026

O vindeiro 5 de marzo asistiremos ao Encontro do Plan de mellora de bibliotecas escolares correspondentes ao curso 2025/2026, con intervención de persoas expertas en diversos ámbitos relacionados coa lectura, a literatura e o deseño e a literatura galega. Ademais, presentarase o novo portal de Bibliotecas Escolares de Galicia.

Completan a xornada un total de 16 experiencias de centros de moi diverso contido (funcionamento da biblioteca escolar, traballo por proxectos, voluntariado, radio, redes e bibliotecas do rural).

Un espazo de encontro, das máis de 900 persoas coordinadoras, no que as bibliotecas escolares deseñan o seu traballo, un ano máis!.

PROGRAMA

FONTE: BIBLIOTECAS ESCOLARES

OBRADOIROS DE POLOS CREATIVOS: ENTRE FUNAMBULISTAS E PITONISAS

Nos últimos días, dentro das actividades do Polo Creativo, o alumnado de 4º e 5º de Primaria participou en experiencias STEM que tiveron como fío condutor o mundo do CIRCO. 

O alumnado de 4º de Primaria, baixo o título “Os funambulistas do Seis do Nadal”, construíron os seus propios camiños de funambulismo usando papel de aluminio, conectándoos á placa Makey-Makey e programándoos con Scratch. O reto consistiu en percorrer esas “cordas electrónicas” sen caer, superando probas como facelo cos ollos pechados ou cara atrás. 

Pola súa banda, o alumnado de 5º de Primaria trasladouse ao lado máis misterioso do circo para converterse en pitonisas e pitonisos dixitais. A través de Scratch, programaron un xogo de adiviñación para “predicir o futuro”. Crearon diálogos e estruturas lóxicas que respondían ás preguntas do usuario, abordando conceptos como condicións e variables.